ដោយ៖ ថុល ស្រីលក្ខណ៍
ថ្ងៃអង្គារ ទី17 មិថុនា 2014
http://vodhotnews.com
មើលរូបភាពបន្ថែម
ប្រាសាទព្រះវិហារ មើលពីចំងាយ (រូបថត៖ ពេជ្រ សុធារី)
រដ្ឋាភិបាលកម្ពុជាមិនធ្វើពិធីរំលឹកខួបថ្ងៃឈ្នះក្តីប្រាសាទព្រះវិហារ
រដ្ឋាភិបាលកម្ពុជាមិនធ្វើពិធីរំលឹកខួបលើកទី៥២ ដែលតុលាការយុត្តិធម៌អន្តរជាតិទីក្រុងឡាអេ ICJ បានសម្រេចឲ្យភាគីកម្ពុជាឈ្នះក្តីលើភាគីថៃក្នុងសំណុំរឿងប្រាសាទព្រះវិហារកាលពីថ្ងៃទី១៥ ខែមិថុនាឆ្នាំ១៩៦២នោះទេ។
ការមិនធ្វើពិធីនេះ ចំពេលដែលស្ថានការណ៍នយោបាយនៅថៃប្រែប្រួលហើយពលករខ្មែររាប់ម៉ឺននាក់ត្រូវបានយោធាថៃចាប់បញ្ជូនមកវិញ។ប៉ុន្តែមន្ត្រីរដ្ឋាភិបាលកម្ពុជា ឲ្យដឹងថាការធ្វើរំលឹកខួបថ្ងៃដែលកម្ពុជាឈ្នះក្តីលើសំណុំរឿងប្រាសាទព្រះវិហារនោះ ធ្លាប់ធ្វើតាំងពីសម្តេចព្រះនរោត្តមសីហនុនៅមានព្រះជន្ម ដើម្បីបង្ហាញពីស្នាព្រះហស្តរបស់ព្រះអង្គ។
រដ្ឋលេខាធិការក្រសួងវប្បធម៌ និងវិចិត្រសិល្បៈ លោក ជុច ភឿន មានប្រសាសន៍ថា ថ្ងៃទី១៥ខែមិថុនាឆ្នាំ១៩៦២ មិនមានក្នុងពិធីបុណ្យជាតិនោះទេ ប៉ុន្តែលោកចាំថាពិធីបុណ្យនេះធ្លាប់ប្រារព្ធធំម្តង។
លោកស្រី ជា វណ្ណាត អ្នកវិភាគឯករាជ្យ មានប្រសាសន៍ថា ជ័យជម្នះរបស់ព្រះបាទនរោត្តមសីហនុនៅឆ្នាំ១៩៦២ ជាស្នាព្រះហស្តប្រវត្តិសាស្ត្រ ដែលមានការទទួលស្គាល់នៅលើឆាកអន្តរជាតិថា ប្រាសាទព្រះវិហារជារបស់ខ្មែរ «បើកាលណា ប្រវត្តិសាស្ត្រអត់មានការរំលឹកអីទេ ធ្វើឲ្យយើងពីមួយជំនាន់ទៅមួយជំនាន់ភ្លេចបាត់ ហើយប្រទេសមួយដែលមានវប្បធម៌ អរិយធម៌ មានប្រវត្តិហ្នឹង គឺដោយសារការនិយាយតតគ្នាពីមួយជំនាន់ទៅមួយជំនាន់ ឲ្យកូនចៅមានការចងចាំ។ បើមិនបានរំលឹកទេពីមួយជំនាន់ទៅមួយជំនាន់ភ្លេចបាត់ »។
លោកស្រី ជា វណ្ណាត ចង់ឲ្យរដ្ឋាភិបាលកម្ពុជាចាក់ផ្សាយស្នាព្រះហស្តនេះតាមកញ្ចក់ទូរទស្សន៍ជាតិ គ្រប់កម្មវិធីបុណ្យជាតិ ដូចជាបុណ្យចំរើនព្រះជន្ម បុណ្យរំលឹកខួប និងពិធីបុណ្យជាតិផ្សេងៗទៀត។
លោក ជាង សុខា ប្រធានកម្មវិធីអភិវឌ្ឍន៍ធនធានយុវជនដែលហៅកាត់ថា YRDPឲ្យដឹងដែរថា មិនមែនត្រឹមតែស្នាព្រះហស្តក្នុងការឈ្នះក្តីប្រាសាទព្រះវិហារនោះទេ ដែលមិនបានរំលឹក សូម្បីតែមុខវិជ្ជា ប្រវត្តិសាស្ត្រខ្មែរ ក៏ក្រសួងអប់រំកំពុងពិចារណា ដកករណីនេះចេញពីការប្រឡងដែរ «ប្រទេសមួយដែលប្រជាពលរដ្ឋ មិនយល់ពីប្រវត្តិសាស្ត្ររបស់ខ្លួន ប្រទេសនោះមិនអាចរីកចម្រើនបានឡើយ ហើយការដឹកនាំនឹងអាចដើរទៅតាមផ្លូវដដែលៗ មានន័យថា វាជាន់ប្រវត្តិសាស្ត្រដដែល មានន័យថា យើងមិនបានចាប់យកតម្លៃនៃប្រវត្តិសាស្ត្រ ឲ្យប្រែក្លាយទៅជាមេរៀនសម្រាប់ដឹកនាំប្រទេស ឬផ្តល់ឲ្យក្មេងជំនាន់ក្រោយ»។
បើជារដ្ឋាភិបាលមិនបានរំលឹកខួប ដែលកម្ពុជាឈ្នះក្តី លើសំណុំរឿងប្រាសាទព្រះវិហារ ១៥ ខែមិថុនា ឆ្នាំ១៩៦២ ក៏ដោយតែរដ្ឋាភិបាលបានធ្វើពិធីធំដុំ នៅថៃ្ងទី៧ ខែកក្កដា ឆ្នាំ ២០០៨ ជាថ្ងៃអង្គការ UNESCO ចុះបញ្ជីប្រាសាទព្រះវិហារជាសម្បត្តិបេតិកភណ្ឌពិភព។ ប៉ុន្តែមួយសប្តាហ៍ក្រោយមក រដ្ឋាភិបាលទីក្រុងបាងកក បានបញ្ជួនទាហានរបស់ខ្លួនមកកាន់តំបន់ប្រាសាទព្រះវិហារ ដើម្បីទាមទារគ្រប់គ្រងដីទំហំ៤,៦គីឡូម៉ែត្រក្រឡានៅជុំវិញប្រាសាទនេះ ដែលនាំសំណុំរឿងក្តីត្រូវបានបញ្ជួនទៅតុលាការយុត្តិធម៌អន្តរជាតិឡើងវិញ៕
សូមសរសេរមមកាន់អ្នកស្រី ថុល ស្រីលក្ខណ៍ តាមរយៈ sreyleak@vodhotnews.com