លោក សូរិយ៉ា ប្រាសាទ ស៊ូប៊ែរឌី អ្នករាយការណ៍ពិសេសអ.ស.ប។ ផា លីណា
Wed, 18 June 2014
ឃុតសុភចរិយា
ភ្នំពេញប៉ុស្តិ៍
ភ្នំពេញៈ លោក សូរិយ៉ា ប្រាសាដ ស៊ូប៊ែរឌី (Surya P. Subedi) អ្នករាយការណ៍ពិសេសរបស់អង្គការសហប្រជាជាតិ (អ.ស.ប) ទទួលបន្ទុកផ្នែកសិទ្ធិមនុស្សកាលពីថ្ងៃអង្គារបានជួបពិភាក្សាការងារកែទម្រង់ការបោះឆ្នោតជាមួយលោក អ៊ឹម សួស្ដី ប្រធានគណៈកម្មាធិការជាតិរៀបចំការបោះឆ្នោត។
លោក ទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោត (គ ជ ប) បានប្រាប់ ភ្នំពេញ ប៉ុស្តិ៍ ថា ក្នុងជំនួបនោះលោក ស៊ូប៊ែរឌី បានលើកឡើងផ្ដោតសំខាន់ទៅលើបញ្ហាកំណែទម្រង់ការបោះឆ្នោតនៅ កម្ពុជា ថា ឈានដល់កម្រិតណា និងសាកសួរអំពីផលលំបាកដែល គ.ជ.ប ជួបប្រទះមុន និងក្រោយថ្ងៃបោះឆ្នោត ហើយបានរំឭកពីអនុសាសន៍លោកកាលពី ឆ្នាំ២០១៣ ផងដែរ។
ក្នុងជំនួបនោះ លោក អ៊ឹម សួស្ដី បានឆ្លើយតបទៅលោក ស៊ូប៊ែរឌី ថា គ.ជ.ប បានខិតខំអនុវត្តតាមអនុសាសន៍ណែនាំរបស់លោកបានមួយចំនួន និង កំពុងបន្តក្នុងនោះ គ.ជ.ប បានលុបចោលនូវទម្រង់ ១០១៨ ដោយជំនួសនូវទម្រង់ថ្មី ដែលកំណត់ពីអត្តសញ្ញាណច្បាស់លាស់។ ជាមួយគ្នានេះ គ.ជ.ប ក៏បានផ្លាស់ប្ដូរសមាសភាពថ្មី ពីររូបមកពីស្ថាប័នតុលាការ។
លោក ទេព នីថា បានបញ្ជាក់ដោយដកស្រង់សម្ដីផ្ទាល់របស់លោក អ៊ឹម សួស្ដី ដែលបានថ្លែងប្រាប់លោក ស៊ូប៊ែរឌី ថា៖ «ទោះជាបែបណាការធ្វើកំណែទម្រង់ប្រព័ន្ធបោះឆ្នោតបាន លុះត្រាតែមានការធ្វើកំណែទម្រង់ច្បាប់បោះឆ្នោតជាមុនហើយការធ្វើកំណែទម្រង់ច្បាប់បោះឆ្នោតមិនមែនជាតួនាទីរបស់ គ.ជ.ប ទេ។ គ.ជ.ប គ្រាន់តែជាអ្នកប្រតិបត្តិច្បាប់ប៉ុណ្ណោះ»។
ពាក់ព័ន្ធទៅនឹងបញ្ហាលំបាក លោក ទេព នីថា បានបញ្ជាក់ថា ចាប់ពីថ្ងៃឃោសនារហូតដល់ថ្ងៃបោះឆ្នោត គ.ជ.ប មិនមានបញ្ហាខ្លាំងទេ ប៉ុន្តែក្រោយថ្ងៃបោះឆ្នោត ឆ្នាំ២០១៣ ទើបមានផលលំបាក ពីភាពចម្រូងចម្រាសខ្លាំងខាងផ្នែកនយោបាយបង្កដោយគណបក្សដែលទទួលបានអាសនៈតិចនៅក្នុងរដ្ឋសភា។
ក្នុងជំនួបនោះ លោក ស៊ូប៊ែរឌី ក៏សាកសួរពីក្រុមជំនាញពី ប្រទេសជប៉ុន ដែលបានមកសហការស្រាវជ្រាវអំពីការរៀបចំធ្វើកំណែទម្រង់ច្បាប់បោះឆ្នោត តើមានការវិវឌ្ឍនិងទទួលបានលទ្ធផលយ៉ាងណាដែរ។
កាលពីថ្ងៃចន្ទលោក ស៊ូប៊ែរឌី បានជួបជាមួយលោក អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ ដោយលើកឡើងបញ្ហា ៤ ចំណុច ស្តីពីពលករនិងកម្មករនៅកម្ពុជា។ លោកស្នើឲ្យលោក អ៊ិត សំហេង ពន្យល់ពីស្ថានភាពសិទ្ធិមនុស្សពាក់ព័ន្ធនឹងសិទ្ធិពលករ និងកម្មករនៅ កម្ពុជា ផងដែរ។ នេះបើ តាមការបញ្ជាក់ពីលោក ហេង សួរ អ្នកនាំពាក្យក្រសួងការងារ កាលពីម្សិលមិញ។
លោក ហេង សួរ បញ្ជាក់ឲ្យដឹងពីជំនួបនោះថា លោក អ៊ិត សំហេង លើកថា រដ្ឋាភិបាលកម្ពុជាបានគិតគូររួចហើយ ពីការបញ្ជូនពលករខ្មែរពី ប្រទេសថៃ មកកម្ពុជាវិញ។ ក្រសួងក៏ផ្តល់ជំនាញនិងសេវាការងារដល់ពលករទាំងនោះដែរ។
ស្នើតបវិញក្រសួងការងារក៏បានសុំជួបជាមួយដៃគូអភិវឌ្ឍន៍នានានិងប្រព័ន្ធអង្គការសហប្រជាជាតិនៅ ប្រទេសថៃ ដើម្បីឲ្យពួកគេជួយអន្តរាគមន៍ឲ្យមានការគោរពសិទិ្ធមនុស្សជាមូលដ្ឋានលើពលករខ្មែរដែលរស់នៅ និងធ្វើការងារក្នុង ប្រទេសថៃ។
ក្រៅពីជំនួបនេះលោក ស៊ូប៊ែរឌី ក៏បានជួបពិភាក្សាការងារជាមួយក្រុមសង្គមស៊ីវិលផងដែរ។នេះបើតាមការឲ្យដឹងពីលោក សៀ ភារម្យ ប្រធានលេខាធិការដ្ឋាននៃក្រុមបេសកកម្មពិសេសសិទ្ធិលំនៅឋានពីម្សិលមិញ។
លោក សៀ ភារម្យ បានប្រាប់ថា ក្នុងជំនួបនោះក្រុមអង្គការសង្គមស៊ីវិល បានលើកបញ្ហាប្រឈមជាច្រើនទាក់ទងទៅនឹងសារាចរលេខ ០១ របស់រាជរដ្ឋាភិបាលដែលផ្ដោតលើការផ្អាកបណ្ដោះអាសន្នការផ្ដល់ដីសម្បទានសេដ្ឋកិច្ចទៅឲ្យក្រុមហ៊ុននានា និងការប្រើប្រាស់ប្រព័ន្ធតុលាការរបស់ក្រុមហ៊ុននិងអាជ្ញាធរជាយន្តការដាក់សម្ពាធលើសកម្មជនដីធ្លី បរិស្ថាន សហជីព និងសកម្មជនសិទ្ធិមនុស្ស។ លោកថ្លែងថា៖ «បច្ចុប្បន្នក្រុមហ៊ុនឯកជននិងមន្ត្រីរដ្ឋាភិបាលមួយចំនួនបានប្រើប្រព័ន្ធតុលាការធ្វើជាឈ្នាន់ដើម្បីបំបាក់ឬគាបសង្កត់ទៅលើសកម្មជនដីធ្លី បរិស្ថាន សហជីព និងសិទ្ធិមនុស្សឲ្យបញ្ឈប់ការតវ៉ាប្រឆាំងនឹងពួកគេ»៕