ដោយ៖​ បាន វិទ្យា​
ថ្ងៃពុធ ទី18 មិថុនា 2014
http://vodhotnews.com

មើលរូបភាពបន្ថែម

គ្រោះទឹកជំនន់នៅកម្ពុជា កាលពីឆ្នាំ២០១៣

ធនាគារ​អភិវឌ្ឍន៍អាស៊ី (ADB) នឹង​ផ្តល់​ជំនួយឥតសំណង​ចំនួន ២​លាន​ដុល្លារ ពី​មូលនិធិ​ជប៉ុន​សម្រាប់​កាត់បន្ថយ​ភាពក្រីក្រ ក្រោម​ហិរញ្ញប្បទាន​ពី​រដ្ឋាភិបាល​ជប៉ុន ដើម្បី​ជំរុញ​ការលើកកម្ពស់​ការគ្រប់គ្រង​ហានិភ័យ​គ្រោះមហន្តរាយ​នៅ​កម្ពុជា​។​

​សេចក្តីប្រកាស​ព័ត៌មាន​របស់​ធនាគារ​អភិវឌ្ឍន៍អាស៊ី ចេញផ្សាយ​ថ្ងែ​ទី​១៨ ខែមិថុនា ឲ្យដឹងថា ប្រទេស​កម្ពុជា​ជួបប្រទះ​គ្រោះរាំងស្ងួត និង​គ្រោះ​ទឹកជំនន់ ដែល​បង្ក​ឲ្យមាន​ផលប៉ះពាល់​ដល់​ប្រជាពលរដ្ឋ​ក្រីក្រ​ជា​រៀងរាល់ឆ្នាំ ហើយ​ក្នុង​រយៈពេល៥​ឆ្នាំ​ចុងក្រោយ​នេះ គ្រោះមហន្តរាយក៏​បាន​ធ្វើឲ្យ​មនុស្ស​ស្លាប់ របួស​រាប់រយ​នាក់ និង​ខូចខាត​ហេដ្ឋារចនាសម្ព័ន្ធ​សាធារណៈ​យ៉ាងច្រើន ដែល​ជា​ហេតុ​ធ្វើ​ឲ្យ​ខាតបង់​ផ្នែក​សេដ្ឋកិច្ច​រាប់លាន​ដុល្លារ​។

​សេចក្តីប្រកាស​ព័ត៌មាន​ដដែល បន្តថា ជំនួយ​ឥត​សំណង​នូវ​ទឹកប្រាក់ ២​លាន​ដុល្លារ ដែល​ទទួលបាន​ហិរញ្ញប្បទាន​ពី ADB នេះ នឹង​ផ្តល់ឲ្យ​គណៈកម្មាធិការ​ជាតិ​គ្រប់គ្រង​គ្រោះមហន្តរាយ ជា​អ្នកទទួលខុសត្រូវ​លើ​ការសម្របសម្រួល និង​ការឆ្លើយតប​ចំពោះ​ហានិភ័យ​គ្រោះមហន្តរាយ​ដែល​កើតមាន​នៅ​កម្ពុជា ឲ្យមាន​ប្រសិទ្ធភាព​។

​លោក Eric Sidgwick នាយក ADB ប្រចាំ​កម្ពុជា មានប្រសាសន៍​នៅក្នុង​សេចក្តីប្រកាស​ព័ត៌មាន​ថា ជំនួយ​ឥត​សំណង​នេះ នឹង​ជួយ​ដល់​រដ្ឋាភិបាល​កម្ពុជា ក្នុង​ការរៀបចំ​ឲ្យបាន​ល្អ​នូវ​យុទ្ធសាស្ត្រ គោលការណ៍​ណែនាំ និតិ​វិធី​ប្រតិ​ប​តិ្ត​ការ ស្តង់ដា និង​ការបណ្តុះបណ្តាល​ស្តីពី​ការគ្រប់គ្រង​ហានិភ័យ​គ្រោះមហន្តរាយ នៅ​ថ្នាក់​ជាតិ និង​ថ្នាក់​ក្រោម​ជាតិ​។​
​គម្រោង​នេះ នឹង​ត្រូវ​អនុវត្ត​រយៈ​ពេល២​ឆ្នាំ ចាប់ពី​ខែ​កក្កដា ឆ្នាំ​២០១៤ ដល់​ខែ​មិថុនា ឆ្នាំ​២០១៦៕

សូម​សរសេរ​មកកាន់​កញ្ញា​ បាន វិទ្យា តាមរយៈ vitcheaban77@gmail.com