Wed, 25 June 2014
ផាក់ ស៊ាងលី
ភ្នំពេញប៉ុស្តិ៍
រតនគិរីៈ ជនជាតិដើមភាគតិចជាង ១០០ គ្រួសារក្នុង ស្រុកលំផាត់ បានដាក់ពាក្យបណ្តឹងទៅរដ្ឋបាលជលផល ខេត្តរតនគិរី ដើម្បីសុំអន្តរាគមន៍រឿងក្រុមហ៊ុនដីសម្បទានសេដ្ឋកិច្ចវៀតណាមឈូសឆាយលុបបឹងធម្មជាតិចំនួនពីរ ដែលពួកគាត់ធ្លាប់អាស្រ័យផលតាំងពីដូនតាមក។
លោក ងួន សុគន្ធ នាយខណ្ឌរដ្ឋបាលជលផល ខេត្តរតនគិរី បានដឹងកាលពីម្សិលមិញថា លោកកំពុងរៀបចំមន្រ្តីជលផលចុះស្រាវជ្រាវករណីនេះ បន្ទាប់ពីគាត់បានទទួលពាក្យបណ្តឹងពីពលរដ្ឋក្នុង ឃុំស្រែឈូក ស្រុកលំផាត់ កាលពីចុងសប្តាហ៍មុន។
លោក ងួន សុគន្ធ បញ្ជាក់ថា៖ «ក្រុមហ៊ុន វៀតណាម ហ៊ងអាញ លំផាត់ ជាសាខារបស់ក្រុមហ៊ុន ហ៊ងអាញ យ៉ាឡាយ បានឈូសឆាយលុបបឹងធម្មជាតិដោយខុសច្បាប់។ ខ្ញុំមិនដែលអនុញ្ញាតឲ្យពួកហ្នឹង [ឈូសលុប] អ៊ីចឹងទេ។ ពួកហ្នឹងធ្វើបំពាន វាមិនដែលឆ្លងកាត់រដ្ឋបាលយើងទេ។ វាធ្វើតាមអំពើចិត្ត»។
លោកបន្តថា តាមផ្លូវច្បាប់បឹង អូរ និងស្ទឹងដែលទាក់ទងទៅនឹងវិស័យជលផល មិនត្រូវបានអនុញ្ញាតឲ្យមានការឈូសឆាយលុបនោះទេ។បន្ទាប់ពីមន្ដ្រីជលផលចុះទៅពិនិត្យមើលពីទំហំខូចខាតហើយនោះ ខណ្ឌរដ្ឋបាលជលផលខេត្តនឹងកោះហៅក្រុមហ៊ុន ហ៊ងអាញ យ៉ាឡាយ ដើម្បីសាកសួរលើករណីនេះ។
លោក ម៉ៃ ចៃ មេភូមិ ស្រែឈូក ក្នុង ឃុំជ័យឧត្តម ស្រុកលំផាត់ បានឲ្យដឹងថា ជនជាតិភាគតិចឡាវ និងទំពួនរាប់រយគ្រួសារនិងគោក្របីរាប់ពាន់ក្បាលក្នុង ភូមិស្រែឈូក ភូមិសាមខា ភូមិដីឡូ (ឃុំជ័យឧត្តម្ភ) ភូមិស្រែពកតូចនិងភូមិនាងដី (ឃុំសេរីមង្គល) ធ្លាប់អាស្រ័យផលពីបឹងធម្មជាតិឈ្មោះ ផ្អក និង តាអុក។ ប៉ុន្តែកាលពី ឆ្នាំ២០១២ ក្រុមហ៊ុន វៀតណាម ហ៊ងអាញ លំផាត់ បានឈូសឆាយលុបបឹងនោះបាត់អស់ ដើម្បីយកដីដាំកៅស៊ូ និងដូងប្រេង។
លោក ម៉ៃ ចៃ បញ្ជាក់ថា៖ «យើងប្រើទឹកបឹងនោះ ទាំងប្រាំងនឹងវស្សាមិនដែលរីងទេ។ តែក្រុមហ៊ុនបានលួចឈូសលុបបឹងនោះអស់។ ឥឡូវយើងចង់ឲ្យក្រុមហ៊ុនជីកបឹងសងយើងវិញ»។
លោកបន្តថា ពលរដ្ឋចំនួន ១២៦ គ្រួសារក្នុងភូមិលោកបានដាក់ពាក្យបណ្តឹងទៅរដ្ឋបាលជលផលរីឯអ្នកភូមិផ្សេងទៀតកំពុងប្រមូលស្នាមមេដៃដើម្បីដាក់ដែរ។
លោកបន្ថែមថា ពួកគាត់បានជួបនឹងមន្រ្តីជលផលខេត្ត កាលពីដើមខែនេះ ហើយបានលើកឡើងពីបញ្ហាឈូសឆាយលុបបឹងនោះ។ បន្ទាប់មកមន្រ្តីជលបានស្នើឲ្យពលរដ្ឋដាក់ពាក្យបណ្តឹង ទើបពលរដ្ឋនាំគ្នាផ្តិតមេដៃដាក់ទៅជលផលខេត្ត។
លោក ម៉ៃ ចៃ ក៏អះអាងផងដែរថា ក្រៅពីបឹងនោះ ពលរដ្ឋចំនួន ៣៧ គ្រួសារក៏ត្រូវបានបាត់បង់ដីស្រែចម្ការដោយសារសកម្មភាពឈូសឆាយរបស់ក្រុមហ៊ុននេះផងដែរ ដែលមួយគ្រួសារៗមានដីចាប់ពីមួយហិកតាទៅ ៤ ហិកតា។
លោក ងួន សុគន្ធ ក៏បានឲ្យដឹងផងដែរថា មានករណីឈូសឆាយលុបបឹងនិងអូរផ្សេងទៀតដែរនៅក្នុងតំបន់ដាច់ស្រយាលដែលនៅឆ្ងាយពីភ្នែករបស់អាជ្ញាធរ និងអ្នកសារព័ត៌មាន។
លោក ឆាយ ធី អ្នកសម្របសម្រួលអង្គការសិទ្ធិមនុស្ស អាដហុក ខេត្តរតនគិរី ឲ្យដឹងថា៖ «តាមច្បាប់ដីចំងាយ ១០០ ម៉ែត្រពីបឹង អូរ ទន្លេនិងស្ទឹងមិនត្រូវក្រុមហ៊ុនឈូសឆាយទេ។ តែផ្ទុយទៅវិញមិនត្រឹមតែមិនទុកឲ្យចំងាយ ១០០ ម៉ែត្រទេថែមទាំងឈូសលុបទាំងអស់ទៀត»។
ទោះជាយ៉ាងណាលោក ចាង វាំងវឹង អ្នកបកប្រែភាសាឲ្យក្រុមហ៊ុន វៀតណាម មួយនេះបានបដិសេធថា ក្រុមហ៊ុនមិនដែលឈូសឆាយលុបបឹងនោះទេ មានតែកាត់ដីដែលប៉ះពាល់ចេញសម្រាប់ឲ្យប្រជាពលរដ្ឋ។
លោកបានបន្តថា ក្រុមហ៊ុនធ្វើសកម្មភាពតែទៅតាមផែនទីនិងផ្ទៃដីដែលទទួលបានពីរដ្ឋាភិបាលតែប៉ុណ្ណោះ៕