Sat, 5 July 2014
សេត គឹមសឿន
ភ្នំពេញប៉ុស្តិ៍
ការព្យាយាមលាក់បាំងរបស់តារាសម្តែង មូល សុវណ្ណគិរី ជុំវិញព័ត៌មានថា ក្មេងស្ទាវមួយក្រុមបើករថយន្តទំនើបដេញបុកធ្វើឲ្យព្រលឹងចុងសក់នោះ ត្រូវបានមហាជនលើកឡើងថា ទំនងជាតារារូបនោះក៏មានកំហុសដែរ។
ពាក្យចាស់ពោលថា មានភ្លើងទើបមានផ្សែង ដូច្នេះក្នុងរឿងនេះមានន័យថា មិនមែនសុខៗក្មេងស្ទាវចិត្តធំមួយក្រុមមានគ្នា ៤-៥ នាក់នោះ បើករថយន្តមកបុក និងកៀររថយន្ត សុវណ្ណគិរី ដោយគ្មានហេតុផលនោះទេ។ តែយ៉ាងណាពាក់ព័ន្ធនឹងព័ត៌មានស៊ីជម្រៅនៃការប្រើអំពើហិង្សារបស់ក្មេងទំនើងបាតសង្គមមួយក្រុមនេះ សុវណ្គគិរី ហាក់មានចេតនាលាក់បាំងការពិត។
មួយលើកជាពីរលើក មូល សុវណ្ណគិរី តែងឲ្យបងប្អូនប្រុសរបស់ខ្លួនលើកទូរស័ព្ទ ហើយតែងនិយាយគេចវេះថា ខ្លួនមិនបានដឹងរឿងស៊ីជម្រៅនោះទេ។ កាលពីព្រឹកម្សិលមិញនេះ ប្អូនប្រុស មូល សុវណ្ណគិរី បានឲ្យដឹងថា សុវណ្ណគិរី និងប្អូនប្រុសរបស់គេម្នាក់ទៀត កំពុងជាប់រវល់ពិនិត្យរបួសនៅមន្ទីរពេទ្យ។
ប្អូនប្រុស សុវណ្ណគិរី បាននិយាយថា៖ «និយាយទៅបងខ្ញុំមិនសូវដឹងច្បាស់ដែរ បើនិយាយទៅខ្លាចខុស ចាំមើលគាត់ចេញពីពេទ្យវិញចុះ»។
ចំពោះហេតុការណ៍គួរភិតភ័យនេះ លោក ឡាយ សុខចំរើន ជាមេកើយ សុវណ្ណគិរី ឲ្យដឹងថា លោកក៏មិនបានដឹងស៊ីជម្រៅដែរ មិនដឹងថា ពួកគេមានការខឹងសម្បាគ្នាយ៉ាងណាមុនពេលកើតហេតុទេ បានជារថយន្តក្មេងស្ទាវនោះមកឈប់កាក់រថយន្ត សុវណ្ណគិរី ពេលគេត្រឡប់មកពីថតភាពយន្ត ហើយក៏ផ្ទុះរឿងបែបនេះ។
ថ្នាក់ដឹកនាំ សាន់ដេ រូបនេះនិយាយថា៖ «គិរី គេត្រឡប់មកពីថតរឿងមុន ព្រោះគេអត់ស្រួលខ្លួន នៅពេលថត គេក្អួតប្រហែល ១០ ដងឯណោះ។ គេអត់មានផឹកស្រាអីទេ ហើយនៅតាមផ្លូវនោះបើតាមខ្ញុំដឹងដូចជាអត់មានរឿងអីទេ ស្រាប់តែរថយន្តនោះបើកមកកាក់មុខរថយន្តរបស់ គិរី តែម្តងប្រុងឲ្យឈប់ អ៊ីចឹងហើយ គិរី បួងចង្កូតទៅក៏ឡើងទៅលើសួនទ្រូងផ្លូវទៅ»។
នៅពេលសង្កត់ធ្ងន់ពីមូលហេតុ លោក សុខចំរើន បានបញ្ជាក់ថា៖ «រឿងក្មេងស្ទាវនោះខឹង គិរី បើកជែងអី ក៏ខ្ញុំមិនដឹងដែរ ឬក៏អាចមកពីពួកក្មេងនោះស្រវឹងក៏អាចថាបាន»។
ប្អូនប្រុសរបស់ សុវណ្ណគិរី បានបញ្ជាក់ថា៖ «ចំពោះរឿងនេះ បង គិរី នឹងបញ្ជាក់ឲ្យបានច្បាស់នៅពេលក្រោយ»៕
កុំនិយាយថា មកពីរឿងនយោបាយ៕