ដោយ៖ វង្ស សុម៉ាលីន
ថ្ងៃអង្គារ ទី8 កក្កដា 2014
http://vodhotnews.com
មើលរូបភាពបន្ថែម
នាង មាស សុខសោភា ចូលរួមសកម្មភាពការពារព្រៃឈើនៅភ្នំឱរ៉ាល់(រូបថតពីហ្វេសប៊ុក)
វាគឺជារឿងដ៏រសើបមួយដែលតារាចម្រៀងនាង មាស សុខសោភា ត្រូវគេទាញទម្លាក់ចូលក្នុងក្រុមប្រឆាំងនឹងរដ្ឋាភិបាល ព្រោះតែបានចេញមុខការពារព្រៃឈើនៅស្រុកឱរ៉ាល់ ដែលជាទីតាំងរងការបំផ្លាញព្រៃឈើពីសំណាក់ក្រុមហ៊ុនទទួលសិទ្ធិអភិវឌ្ឍន៍ធំមួយ។ ប៉ុន្តែប្រឆាំងនឹងការបំភ័យទាំងឡាយ នាងបានឆ្លើយតបថានេះជាឆន្ទៈរបស់នាង។
មុនការចូលខ្លួនរបស់នាងក្នុងសកម្មភាពដាំដើមឈើ តំបន់ព្រៃដែលរងការបំផ្លាញនៅស្រុកឱរ៉ាល់ ខេត្តកំពង់ស្ពឺ មិនមានការចាប់អារម្មណ៍នោះទេពីមជ្ឈដ្ឋាននានា បើទោះជាក្នុងតំបន់ទាំងមូលមានការប្រឆាំងពីក្រុមប្រជាសហគមន៍ និងព្រះសង្ឃរស់នៅទីនោះក៏ដោយ។ មាស សុខសោភា បានចេញមុខបំបួសដើមឈើ និងដាំឈើឡើងវិញ ក្នុងតំបន់ចម្រូងចម្រាស ជាសារឲ្យក្រុមហ៊ុនអភិវឌ្ឍន៍បញ្ឈប់ការកាប់បំផ្លាញ និងពញាក់អារម្មណ៍ឲ្យមជ្ឈដ្ឋានជាតិ អន្តរជាតិ ពិសេសមន្ត្រីគ្រប់ជាន់ថ្នាក់ ងាកមកចាត់វិធានការការពារព្រៃនៅស្រុកឱរ៉ាល់ទាំងមូល។ សកម្មភាពរបស់នាងត្រូវគេចោទថា ជាការលើកទឹកចិត្តឲ្យប្រជាសហគមន៍ និងព្រះសង្ឃនៅវត្តមេត្តាធម្មជាតិ ហៅវត្តផ្កាឈូក នៅភ្នំបូមៀរ ក្នុងស្រុកឱរ៉ាល់ ដែលជាក្រុមតវ៉ាដ៏ធំ កាន់តែមានគំនិតប្រឆាំងនឹងគម្រោងអភិវឌ្ឍន៍។ អ៊ីចឹងហើយ ទើបសកម្មភាពរបស់នាង ត្រូវគេប្រដូចថាជាការចេញមុខរិះគន់ចំពោះរដ្ឋាភិបាល ដែលបានផ្ដល់សិទ្ធិឲ្យក្រុមហ៊ុនមួយ ធ្វើការអភិវឌ្ឍនៅតំបន់នោះ។
រូបថតពីហ្វេសប៊ុក
នៅលើបណ្ដាញសង្គមហ្វេសប៊ុក (Facebook) មានការកាត់តរូបភាពជាច្រើន ចោទថានាង និងក្រុមប្រឆាំងរដ្ឋាភិបាល គឺតែមួយ។ ក្នុងនោះ ក៏មានការសរសេរឲ្យនាងដកខ្លួន ដើម្បីគេចពីការប៉ុនប៉ងពីសំណាក់អ្នកកំពុងទទួលផលពីការបំផ្លាញព្រៃឈើនៅទីនោះផងដែរ។
លោក សោភ័ណ្ឌ ឡារី តារាដែលហ៊ានប្រឆាំងរដ្ឋាភិបាលបើកចំហរ បានទទូចកុំឲ្យភ្ជាប់សកម្មភាពរបស់ មាស សុខសោភា ទៅជាមួយក្រុមបក្ខប្រឆាំង ឬក្រុមវាយប្រហារចំណាត់ការរបស់រដ្ឋាភិបាល។ លោកបញ្ជាក់ថា នោះគ្រាន់តែជាសកម្មភាពមនុស្សធម៌ ដើម្បីពញាក់អារម្មណ៍ឲ្យមនុស្សចេះស្រឡាញ់ព្រៃឈើ និងចូលរួមការពារព្រៃឈើប៉ុណ្ណោះ គឺមិនមែនជាទង្វើប្រឆាំងចំពោះក្រុមអ្នកដឹកនាំនោះទេ។ អមដោយសារគាំទ្រនៅលើបណ្ដាញដដែលនោះ មានការសរសេរបំភ័យជាច្រើន ស្នើឲ្យនាងបញ្ឈប់សកម្មភាពនេះចោល ដោយពួកគេលើកឡើងឧទាហរណ៍អាក្រក់ជាច្រើន ថាជារឿងមិនគួរយកខ្លួនបៀត។
មិនខុសពីការបំភ័យ លោក សោភ័ណ្ឌ ឡារី ដែលហ៊ាននិយាយពីបញ្ហាសង្គម ត្រូវគេឃើញបាត់បង់ទីផ្សារសម្តែងរួចហើយជាគំរូ ខណៈដែលតារាចម្រៀងនាង ទូច ស៊ុននិច ក៏ក្លាយជាជនពិការ ស្របពេលដែលមានការលើកឡើងថាព្រោះតែហ៊ានឈឺឆ្អាលរឿងសង្គម ដោយចេញមុខច្រៀងពាក់ព័ន្ធនឹងការបាត់បង់ទឹកដីកម្ពុជាក្រោម។
ឆ្លើយតបនឹងការបំភ័យនេះ មាស សុខសោភា បានប្រាប់ក្នុងកិច្ចសម្ភាសន៍កាលពីល្ងាចថ្ងៃទី៧ ខែកក្កដា តាមទូរស័ព្ទថា នាងមិនខ្លាចនោះទេ ទោះជាមានការកាត់ត ឬបង្ហោះសារមួយចំនួន ភ្ជាប់នាងទៅនឹងក្រុមប្រឆាំង។ នាងថានេះជាសកម្មភាពដោយឡែកពីគ្នា។ នាងបញ្ជាក់ថា«ខ្ញុំអត់ខ្លាចទេ ហើយខ្ញុំនឹងបន្តដាំដើមឈើឲ្យគ្រប់១ម៉ឺនដើម និងបន្តចុះទៅបំបួសដើមឈើនៅតំបន់នោះតាមគម្រោង ព្រោះខ្ញុំគ្រាន់តែធ្វើដើម្បីសង្គម គឺអត់មានប្រឆាំងនឹងអ្នកណានោះទេ»។
រូបថតពីហ្វេសប៊ុក
អត្ថបទកំសាន្ត
- សារ៉ាយ សក្ខិណា ត្រូវមន្ត្រីអាមេរិកខ្ទាស់ដំណើរ
- ចន ច័ន្ទលក្ខិណា នាំម្ដាយឈឺទៅពេទ្យនៅប្រទេសថៃ
- ទស្សនៈតារាខ្មែរពីរោងកុនតម្លៃ៥លានដុល្លារនៅផ្សារទំនើបAEON
- ពេជ្រ សូលីកា ផ្ដល់សម្ភាសន៍ទម្លាយអាថ៌កំបាំងស្នេហា
- កត្តា២ រុញឲ្យគិត ម៉េង ដាក់ថ្ងៃការជាមួយ ស្រីតូច ចំណាន
- ខៀវ សានសាណា បង្ហាញអនាគតស្វាមីថ្មី
ជាមួយជំហរបន្តទៅមុខ នាងក៏អះអាងថា នាងមមាញឹកនឹងគម្រោងស្វែងរកមូលនិធិក៏ដូចជាអំពាវនាវឲ្យមានយុវជនស្ម័គ្រចិត្ត ចូលរួមបំបួសដើមឈើ និងដាំដើមឈើជាមួយនាងនៅក្នុងសហគមន៍នោះនាពេលបន្តបន្ទាប់ផងដែរ ដើម្បីការពារតំបន់ឱរ៉ាល់ពីការកាប់រានព្រៃឈើខុសច្បាប់។
ការលះបង់នេះ មានមនុស្សភាគច្រើនកោតសរសើរ និងទទូចឲ្យក្រុមសង្គមស៊ីវិល ពិសេសមន្ត្រីរដ្ឋាភិបាល ការពារសុវត្ថិភាពរបស់នាង ដើម្បីលើកទឹកចិត្តឲ្យតារាល្បីផ្សេងទៀត ងាកមកគិតពីសង្គម និងធម្មជាតិ ក្នុងពេលកម្ពុជាកាន់តែហិចហោចព្រៃឈើដោយអន្លើ។ សកម្មភាពរបស់នាង កំពុងរុញឲ្យមាស សុខសោភា ក្លាយជាតារាគំរូ និងទទួលការចាប់អារម្មណ៍ទ្វេគុណនៅក្នុងចង្កោមមហាជន ទន្ទឹមនឹងបទចម្រៀង «ខ្ញុំស្មោះគេ! គេស្មោះអ្នកផ្សេង»របស់នាង កំពុងផ្ទុះខ្លាំងនាពេលនេះ៕
សរសេរមកកាន់លោក វង្ស សុម៉ាលីន តាមរយៈ vongsomalin@yahoo.com
ទោះជាស្ថិតក្នុងចេតនាអ្វីក៏ដោយ ក៏នាងបង្ហាញពីការស្រឡាញ់ព្រៃឈើខ្មែរជាងខ្មែរមួយចំនួនតូច
ដ៏ទៃទៀតដែរ។
you are a great girld that having good heart and help society.you born to be khmer help khmer help the poor and i bet alot of people love you .GOD be with you and bless you all the time.
អត្ថបទបានសរសេរថា សកម្មភាពរបស់នាង មាស សុខសោភា ជាសកម្មភាពប្រឆាំងរារដ្ឋាភិបាល គឺជាការញុះញង់ដ៏អាក្រក់។
គួរតែគិតថា រាជរដ្ឋាភិបាលពិតជាមានកំហុសក្នុងការគ្រប់គ្រងព្រៃឈើ ពិតមែន។ តែការចូលរួមរបស់នរណាម្នាក់ដើម្បីការពារព្រៃឈើ ក្នុងរូបភាពដូចនាងនេះ គឺមិនមានន័យថាប្រឆាំង ទេ។ ផ្ទុយទៅវិញ មានន័យថាបានជួយរាជរដ្ឋាភិបាល ទៅវិញ។
ចុះប្រសិនបើពលរដ្ឋគ្រប់ៗគ្នា ធ្វើដូចនាង តើយើងចាំបាច់មាន បង្កើតថ្ងៃរុក្ខទិវា ធ្វើអ្វី? ហើយព្រៃឈើក៏មិនវិនាស ដែរ!
Who would criticise her for doing an excellent work for the whole Cambodia? She’s a good khmer citizen. She has an excellent job!
បើគេគ្រាន់តែធ្វើឥចឹងទៅជាការប្រឆាំងនឹងរដ្ឋាភិបាល នោះ វាមានន័យថាអោយតែអ្នកណាមានគំនិត កសាង ថែរក្សា ការពារគឺប្រឆាំងនឹងរដ្ឋាភិបាល….ឥចឹងទេរដ្ឋាភិបាលសព្វថ្ងៃនេះគឺជារដ្ឋាភិបាលបំផ្លាញ បើអ្នកណាពូកែបំផ្លាញគឺមិនប្រឆាំងនឹងរដ្ឋាភិបាលទេមែនទេ…….ទើបនឹងឭទើបនឹងជួបក្នុងសម័យនេះ… (ភ្លើងមិនជាឆេះប៉ុន្មានទេតែវាយ៉ាបនឹងពួកអាហួចហៅខ្យល់….)
It’s would be appreciated to the Khmer song star Meas Soksorphea that she has a good activities to prevent jungle.
អ្នកមានគំនឹតថានាងដាំដើមឈើប្រឆាំងរដ្ឋាភិបាលគឹអ្នកនោះជាអ្នកបំផ្លាញព្រៃឈើដោយគ្មានការខ្មាស់អៀន នាងគួរទទួល បានការលើកទឹកចិត្តជាជាងការបំភិតបំភៃ រដ្ឋាភិបាលគួរតែខ្មាស់នាង ដែលមិនបានការពារព្រៃឈើអោយបានគង់វង្សដូចសព្វថ្ងៃ៕