ដោយ៖ បាន វិទ្យា
ថ្ងៃពុធ ទី9 កក្កដា 2014
http://vodhotnews.com
បុគ្គលិកក្រុមហ៊ុនស៊ីនទ្រី យល់ព្រមត្រឡប់ចូលទៅធ្វើការវិញទាំងអស់គ្នានៅថ្ងៃព្រហស្បតិ៍ស្អែកនេះ បន្ទាប់ពីទទួលបានដំណោះស្រាយសមរម្យមួយពីក្រុមហ៊ុនកាលពីរសៀលថ្ងៃពុធនេះ។
លោក អ៊ីន អុន ដែលអះអាងថាជាតំណាងបុគ្គលិក ប្រាប់VODថា បុគ្គលិកទាំងអស់បានយល់ព្រមត្រឡប់ចូលធ្វើការវិញ ព្រោះថាភាគីក្រុមហ៊ុនបានផ្តល់ដំណោះស្រាយ ដោយបន្ថែមប្រាក់ឧបត្ថម្ភទៅតាមផ្នែកនីមួយៗ។
ប្រធានសហព័ន្ធសហជីពលើកតម្កើងជីវភាពកម្មករនិយោជិកខ្មែរ លោក មុំ សារ៉ន មានប្រសាសន៍ថា ភាគីក្រុមហ៊ុនបានផ្តល់ដំណោះស្រាយដល់បុគ្គលិកដោយផ្តល់ប្រាក់ឧបត្ថម្ភទៅតាមប្រភេទនៃការងាររបស់បុគ្គលិក ដូចជា បុគ្គលិកបោសសម្អាតទទួលបាន៥ដុល្លារ បុគ្គលិកកើបសំរាមទាំងថ្ងៃ និងយប់ ទទួលបាន១០ដុល្លារ ហើយអ្នកបើករថយន្ត និងផ្នែកជាង ទទួលបានប្រាក់៥ដុល្លារ។
ប្រធានការិយាល័យសម្អាតក្រុង និងយានដ្ឋាន និងតំណាងឲ្យក្រុមហ៊ុនស៊ីនទ្រី លោក ងួន ស៊ីផេង ឲ្យដឹងថា ភាគីក្រុមហ៊ុនពុំអាចដោះស្រាយទៅតាមលក្ខខណ្ឌការងារ៤ចំណុចដែលកម្មករទាមទារនោះទេ ប៉ុន្តែក្រុមហ៊ុនបានផ្តល់ជាប្រាក់ឧបត្ថម្ភជំនួសវិញ។
គួរបញ្ជាក់ថាបុគ្គលិកក្រុមហ៊ុនស៊ីនទ្រី បានធ្វើកូដកម្មអស់រយៈពេល៤ថ្ងៃមកហើយ គឺតាំងពីថ្ងៃអាទិត្យសប្តាហ៍មុន ដោយទាមទារលក្ខខណ្ខការងារចំនួន១០ចំណុច។ រាល់ការទាមទារម្តងៗ បុគ្គលិកមិនបានចេញទៅប្រមូលសំរាមធ្វើឲ្យសំរាមគរពេញរាជធានីភ្នំពេញ៕
សូមសរសេរមកកាន់កញ្ញា បាន វិទ្យា តាមរយៈ vitcheaban77@gmail.com