ដោយ រដ្ឋា វិសាល
2014-07-29
RFA
គ្រួសារពិរុទ្ធជនកំពុងជាប់ឃុំខ្លួននៅពន្ធនាគារខេត្តរតនគិរី អះអាងថា ឆ្មាំពន្ធនាគារបានគាបសង្កត់ទារយកប្រាក់ច្រើនហួសហេតុ ជាថ្នូរអនុញ្ញាតឲ្យសាច់ញាតិចូលជួបសួរសុខទុក្ខអ្នកជាប់ពន្ធនាគារ។ ចំណែកមន្ត្រីពន្ធនាគារវិញ បដិសេធថាមិនមានគោលការណ៍ឲ្យឆ្មាំពន្ធនាគារធ្វើបែបនេះទេ។
គ្រួសារពិរុទ្ធជនមួយរូបនៅពន្ធនាគារខេត្តរតនគិរី បានប្ដឹងមកការិយាល័យសមាគមអាដហុក (adhoc) ខេត្ត ឲ្យជួយអន្តរាគមន៍ទៅអាជ្ញាធរខេត្ត បញ្ឈប់កុំឲ្យឆ្មាំពន្ធនាគារគាបសង្កាត់ទារប្រាក់ហួសហេតុពីអ្នកសុំជួបសួរសុខទុក្ខអ្នកជាប់ឃុំ។
ប្រជាពលរដ្ឋរស់នៅភូមិ៤ សង្កាត់កាចាញ ក្រុងបានលុង ខេត្តរតនគិរី លោក ហេង ចន្ធូ នៅថ្ងៃអង្គារ ទី២៩ ខែកក្កដា រៀបរាប់ថា មុននេះពីរថ្ងៃ លោកបានទៅពន្ធនាគារសុំជួបសួរសុខទុក្ខឪពុកក្មេកកំពុងជាប់ឃុំខ្លួន ក្នុងបទចោទប្រើអំពើហិង្សាទៅលើកូន ក៏ប៉ុន្តែឆ្មាំពន្ធនាគារពីរនាក់នៅយាមច្រកចូលផ្នែកខាងក្រៅ បានទាមទារឲ្យបង់ប្រាក់ ៨ម៉ឺនរៀល ទើបអនុញ្ញាតឲ្យចូលបាន ក៏ប៉ុន្តែលោកបានអង្វរករថាគ្មានប្រាក់ ទើបអ្នកយាមតម្រូវឲ្យបង់ប្រាក់ ៦ម៉ឺនរៀល ហើយនៅទីបំផុត លោកបានទៅខ្ចីប្រាក់អ្នកជិតខាងបាន ៤ម៉ឺនរៀល ទើបអ្នកយាមយល់ព្រម។ លោកហៅទង្វើនេះថា ជាការគាបសង្កត់ជំរិតប្រាក់ និងជាបន្ទុកធ្ងន់ធ្ងរទៅលើប្រជាពលរដ្ឋក្រីក្រ ក្នុងការទទួលបានសិទ្ធិសួរសុខទុក្ខសាច់ញាតិ៖ «ប្រាំពីរប្រាំបីម៉ឺនអត់មានលុយទេ ព្រោះជីវភាពក្រីក្រដែរ។ កុំទារតម្លៃគាបសង្កត់ហួសហេតុពេក ព្រោះប្រជាពលរដ្ឋផ្សេងៗទៅគេមាន យើងមិននិយាយ យើងនិយាយអ្នកដែលអត់វិញ។ សុំតែបីពាន់ទៅប្រាំពាន់បានហើយ»។
ឆ្លើយតបការចោទប្រកាន់នេះ ប្រធានពន្ធនាគារខេត្តរតនគិរី លោក ទីន សុវណ្ណនី ថ្លែងថា មិនមានគោលការណ៍ឲ្យឆ្មាំពន្ធនាគារគាបយកប្រាក់ពីគ្រួសារចូលសួរសុខទុក្ខអ្នកជាប់ឃុំនោះទេ ផ្ទុយទៅវិញ មន្ត្រីពន្ធនាគារបានជួយសម្រួលឲ្យគ្រួសារមកសួរសុខទុក្ខអ្នកជាប់ឃុំបានរៀងរាល់ថ្ងៃធ្វើការ ដោយសារតែតំបន់នេះប្រជាពលរដ្ឋនៅជនបទឆ្ងាយ ពិបាកក្នុងការធ្វើដំណើរ ក៏ប៉ុន្តែលើកលែងជនជាប់ចោទក្នុងបទឧក្រិដ្ឋកំពុងជាប់ឃុំខ្លួន មន្ត្រីពន្ធនាគារមិនអនុញ្ញាតឲ្យចូលសួរសុខទុក្ខបានឡើយ។ យ៉ាងនេះក្តី លោកថានឹងស្រាវជ្រាវការចោទប្រកាន់នេះ៖ «អត់ដែលមានអ្នកណាបង់ត្រឹម ២ម៉ឺនផង បញ្ហាម្យ៉ាង គឺអ្នកគ្រឿងញៀនអ៊ីចឹងខ្ញុំអត់ឲ្យចូលទេ ហើយគាត់សុំបង់លុយប្រាំប្រាំមួយម៉ឺន ក៏គេមិនឲ្យចូលដែរ។ តែខ្ញុំមិនអាចកាន់ជើងទេ ចាំខ្ញុំសួរមើលសិនណា! សួរមន្ត្រីមើលសិន»។
ទាក់ទិនករណីនេះដែរ មន្ត្រីឃ្លាំមើលសិទ្ធិមនុស្សសមាគមអាដហុក ខេត្តរតនគិរី លោក ឆាយ ធី ទទួលស្គាល់ថា ប្រជាពលរដ្ឋពិតជាបានប្ដឹងពីករណីឆ្មាំពន្ធនាគារគាបសង្កត់ទារប្រាក់មែន។ លោកថា នឹងអន្តរាគមន៍ពាក្យបណ្ដឹងពលរដ្ឋជូនអាជ្ញាធរខេត្ត ដើម្បីស៊ើបអង្កេត និងជួយដោះស្រាយបញ្ហាលំបាករបស់ពលរដ្ឋ៖ «គាត់ជាពលរដ្ឋក្រីក្រអត់មានលទ្ធភាពទេ គាត់មិនសប្បាយចិត្ត គាត់មកអាដហុក ដើម្បីសុំឲ្យមានការអន្តរាគមន៍ កុំឲ្យយកលុយពីគាត់ក៏ដូចពលរដ្ឋដទៃដែរ។ ទុក្ខកង្វល់បញ្ហាលំបាករបស់ប្រជាពលរដ្ឋ យើងនឹងអន្តរាគមន៍ទៅអភិបាលខេត្ត»។
ពន្ធនាគារខេត្តរតនគិរី ច្រើនឆ្នាំកន្លងទៅនេះ ក៏កើតមានករណីសាច់ញាតិ ឬក្រុមគ្រួសារអ្នកជាប់ឃុំ ត្អូញត្អែរថា ការចូលសួរសុខទុក្ខអ្នកជាប់ឃុំ ត្រូវតែបង់ប្រាក់យ៉ាងតិច ២ម៉ឺន ទៅ ៥ម៉ឺនរៀល ទើបមន្ត្រីពន្ធនាគារអនុញ្ញាតឲ្យចូល។ សង្កេតឃើញជាក់ស្តែងរហូតមកទល់នឹងឆ្នាំ២០១៣ ពន្ធនាគារនេះនៅតែមានសភាពចាស់ទ្រុឌទ្រោម មិនមានការជួសជុល ឬកែលំអ ហើយជាបន្តបន្ទាប់ ពិរុទ្ធជន និងទណ្ឌិតក្នុងពន្ធនាគារជិត ១០នាក់ បានគាស់ជញ្ជាំង ឬចំរឹងរត់ចេញពីពន្ធនាគារដោយសុវត្ថិភាព។
យ៉ាងនេះក្តី ពីដើមឆ្នាំ២០១៤ រហូតបច្ចុប្បន្ន បន្ទាប់ពីប្រធានថ្មីចូលបំពេញភារកិច្ចជំនួសប្រធានចាស់ សង្កេតអគាររដ្ឋបាលរបង និងទីធ្លាផ្នែកខាងមុខពន្ធនាគារ បានជួសជុលមានលក្ខណៈល្អជាងមុនមួយកម្រិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- អង្គភាពប្រឆាំងអំពើពុករលួយព្រមានដាក់វិន័យដល់អ្នកសង្កេតការណ៍ប្រឡងបាក់ឌុប
- ពលរដ្ឋខ្លះនៅសៀមរាបចោទគណៈមេប្រយោគប្រឡងបង្ខំសិស្សឲ្យសូកប៉ាន់
- បក្សប្រឆាំងអះអាងពីអំពើពុករលួយក្នុងការដោះដូរអាគាររដ្ឋនៅបាត់ដំបង
- ពលរដ្ឋនៅស្វាយរៀងចោទមន្ត្រីសុរិយោដីថាធ្វើប្លង់ដីប្រកាន់បក្ខពួក
- ពលរដ្ឋនៅកំពង់ឆ្នាំងរិះគន់អាជ្ញាធរចំពោះការយកផែទៅជួលឲ្យដេប៉ូលក់ឈើ
- មន្ត្រីក្រុងបានលុងរងការចោទថាប្រមូលលុយពីអាជីវករល្បែងកន្ទុយលេខរៀងរាល់ខែ
- ពលរដ្ឋនៅស្វាយរៀងរិះគន់អាជ្ញាធរឃុំថាយកប្រាក់ធ្វើប្លង់ដីមួយប្លង់២ម៉ឺនរៀល
- ពលរដ្ឋចោទអាជ្ញាធរភូមិនៅកំពង់ចាមថាធ្វើប័ណ្ណក្រីក្រមានការរើសអើង
- ប្រធានកម្រងនិងនាយកសាលាមួយនៅពោធិ៍សាត់រងការចោទថាប្រព្រឹត្តអំពើពុករលួយ