ដោយ៖​ បាន វិទ្យា​
ថ្ងៃអង្គារ ទី5 សីហា 2014
http://vodhotnews.com

​សាលា​ខេត្តក្រចេះ ប្រកាស​ផ្អាក​ការធ្វើ​ចរាចរណ៍​បណ្តោះអាសន្ន ចំពោះ​យានយន្ត​គ្រប់​ប្រភេទ​ធ្វើដំណើរ​តាម​កំណាត់​ផ្លូវជាតិ​លេខ​៧៣ (​ឆ្លូង​-​ក្រចេះ​) ដើម្បី និង​ការពារ​សុវត្ថិភាព​ធ្វើដំណើរ​ជូន​បងប្អូន​ប្រជាពលរដ្ឋ​។

សេចក្តីជូនដំណឹង​របស់​សាលា​ខេត្តក្រចេះ ចេញផ្សាយ​ថ្ងៃ​ទី​៤ ខែ​សីហា ឲ្យដឹងថា គិត​មក​ត្រឹម​ថ្ងៃទី​៤ ខែ​សីហា កម្ពស់​ទឹក​ទន្លេមេគង្គ​ខេត្តក្រចេះ​ឡើងដល់ ២២,៥០​ម៉ែត្រ ដែល​បណ្តាល​ឲ្យ​ជន់​លិច​កំណាត់​ផ្លូវជាតិ​លេខ ៧៣ (​ឆ្លូង​-​ក្រចេះ​) និង​ហូរ​កាត់​ទ្រូងផ្លូវ​ជាច្រើន​កន្លែង​។​

​សេចក្តីជូនដំណឹង​បន្តថា រាល់​ការ​ធ្វើ​ដំណើរ​តាម​ដងផ្លូវ​ជាតិ​នេះ ត្រូវ​ផ្អាក​ជា​បណ្តោះអាសន្ន រហូត​ដល់​ទឹក​ស្រក​ផុតពី​ទ្រូងផ្លូវ ដើម្បី​បញ្ជៀ​ស​គ្រោះថ្នាក់​ដែល​កើតឡើង​ជា​យថាហេតុ និង​ការពារ​សុវត្ថិភាព​ធ្វើដំណើរ​ជូន​បងប្អូន​ប្រជាពលរដ្ឋ ព្រមទាំង​ការពារ​តួ​ផ្លូវ​កុំឲ្យ​រង​ការខូចខាត​ធ្ងន់ធ្ងរ​។​

​សាលាខេត្ត​ក៏​អំពាវនាវ​សាធារណជន បងប្អូន​ប្រជាពលរដ្ឋ និង​ម្ចាស់​យានយន្ត​គ្រប់​ប្រភេទ​ដែល​ធ្វើដំណើរ​តាម​ដង​ផ្លូន​ជាតិ​លេខ​៧៣ អនុវត្ត​ដោយ​ស្មារតី​យោគយល់ខ្ពស់​។​

តាម​របាយការណ៍​របស់​ខុទ្ទកាល័យ​នៃ​គណៈកម្មាធិការ​ជាតិ​គ្រប់គ្រង​គ្រោះមហន្តរាយ គិត​មកដល់​ថ្ងៃ​អាទិត្យ​ទី៣ ខែសីហា យ៉ាងហោច​ណាស់​មនុស្ស​៤​នាក់​ស្លាប់ ដោយសារ​ទឹកជំនន់​បាន​ជន់​លិច​នៅ​ក្នុង​ខេត្ត​ចំនួន​១៣ រួមមាន ខេត្ត​កំពង់ចាម ត្បូងឃ្មុំ ព្រះវិហារ កំពង់ធំ ក្រចេះ ស្ទឹងត្រែង ព្រៃវែង កណ្តាល រតនគិរី កំពត និង​ខេត្ត​ព្រះសីហនុ​ជាដើម​។ អ្នក​ស្លាប់​ទាំង​៤​នាក់ គឺ​នៅ​ខេត្តក្រចេះ​ស្លាប់​២​នាក់ ស្ទឹងត្រែង​១​នាក់ និង​ខេត្ត​កណ្តាល​១​នាក់​៕

​សូម​សរសេរ​មកកាន់​កញ្ញា បាន វិទ្យា តាមរយៈ vitcheaban77@gmail.com