ដោយ៖​ ណាត សុភាព​​
ថ្ងៃព្រហស្បតិ៍ ទី7 សីហា 2014
http://vodhotnews.com

គិត​ត្រឹម​ថ្ងៃ​ព្រហស្បតិ៍​នេះ សមាជិក គជប ថ្មី ដែល​ត្រូវ​ចាត់តាំង​ដោយ​គណបក្ស​ជាប់​ឆ្នោត​ទាំង​ពី រ​នៅ​មិនទាន់​ទម្លាយ​ឲ្យដឹង​ជា​សាធារណៈ​នៅឡើយ ខណៈ​បក្សប្រឆាំង​គ្រោង​ចូលប្រជុំ​សភា​នៅ​ថ្ងៃស្អែក​នេះ​។​

អ្នកនាំពាក្យ​គណបក្ស​សង្គ្រោះ​ជាតិ លោក យឹម សុវណ្ណ ប្រាប់​ VOD​ នៅ​ព្រហ្ប​តិ៍​នេះថា គណបក្ស​នេះ មិនទាន់​ជ្រើសរើស​សមាជិក គជប ៣​រូប​ថ្មី​នៅឡើយ ខណៈ​លោក គួ​យ ប៊ុន រឿន លាឈប់​ពី​តួនាទី​ជា​តំណាងរាស្ត្រ​ខេត្ត​កំពង់ចាម ទៅ​ធ្វើ​ជា​សមាជិក គជប ថ្មី​។​

លោក យឹម សុវណ្ណ បញ្ជាក់ថា គណបក្ស​សង្គ្រោះ​ជាតិ​នៅតែ​លើកទឹកចិត្ត​ ឲ្យ​អ្នក​ដែល​មាន​សមត្ថភាព​ធ្វើ​ការងារ​លើ​វិស័យ​បោះឆ្នោត ដាក់ពាក្យ​ធ្វើជា​សមាជិក គជប ថ្មី​នេះ​។

លោក យឹម សុ​វណ្ណ ឲ្យដឹងទៀតថា មូលហេតុ​ដែល​គណបក្ស​សង្គ្រោះ​ជាតិ​មិនទាន់​ជ្រើសរើស​សមាជិក គជប ថ្មីបាន ដោយសារ​គណបក្ស​ធ្វើតាម​នីតិវិធី និង​រង់ចាំ​ធ្វើ​វិសោធនកម្ម​ច្បាប់​បោះឆ្នោត ច្បាប់រដ្ឋធម្មនុញ្ញ និង​បទបញ្ជា​មួយចំនួនទៀត​។​

VOD មិនអាច​សុំ​ការ​អត្ថាធិប្បាយ​ពី​មន្ត្រីជាន់ខ្ពស់​គណបក្ស​ប្រជាជន​កម្ពុជា លោក ព្រុំ សុខា និង​លោក ជាម យៀប បានទេ​។ តែ​លោក ឈាង វុន មានប្រសាសន៍ថា លោក​សុំ​មិន​បំភ្លឺ​ជុំវិញ​ករណី​នេះ ទេ​ដោយ​ថា លោក​មិន​មាន​តួនាទី​ឆ្លើយតប​នឹង​បញ្ហា​នេះ​។​

ចំណែក​លោក អ៊ឹម សួស្តី ប្រធាន​គជប និង​លោក ទេព នីថា អគ្គលេខាធិការ គជប បច្ចុប្បន្ន អះអាង​ដូចគ្នា​ថា ពួក​លោក​មិន​ដឹង​ពី​សមាសភាព គជប ថ្មី​នោះ​ទេ គឺ​អាស្រ័យ​បក្ស​ទាំងពីរ​ជា​អ្នករៀបចំ​។​

កាលពី​ថ្ងៃ​ទី២២ ខែកក្កដា គណបក្ស​នយោបាយ​ជាប់ឆ្នោត​ទាំងពី​រ ​បាន​ឯកភាព​គ្នា​ជ្រើសរើស​សមាជិក គជប ថ្មី ចេញ​ពី​បក្ស​ម្ខាង ៤រូប និង​សង្គម​ស៊ីវិល​១រូប​។ គណបក្សនយោបាយ​ទាំងពីរ ​ក៏​ឯកភាព​គ្នា​ជ្រើសរើសប្រធាន​អង្គការ​លីកាដូ លោកស្រី ពុង ឈី​វ​កេក ជា​សមាជិក គជប ទី​៩៕

សូមសរសេរមកលោក ណាត​ សុភាព តាមរយៈ sopheap@vodhotnews.com