ដោយ៖ ថុល ស្រីលក្ខណ៍
ថ្ងៃព្រហស្បតិ៍ ទី25 កញ្ញា 2014
http://vodhotnews.com
មើលរូបភាពបន្ថែម
រូបភាពបញ្ជាក់ពីគ្រោះថ្នាក់ចរាចរណ៍នាពេលកន្លងមក (រូបថត៖ បូ សាវី)
អ្នកជំនាញចរាចរណ៍ និងមន្ត្រីរដ្ឋាភិបាលលើកឡើងថា គ្រោះថ្នាក់ចរាចណ៍ក្នុងរដូវបុណ្យភ្ជុំបិណ្ឌឆ្នាំ២០១៤នេះ កើនឡើងដោយសារការអនុវត្តន៍ច្បាប់ចរាចរណ៍នៅកម្ពុជានូវ មានកម្រិត។
របាយការណ៍របស់អគ្គស្នងការនគរបាលជាតិបង្ហាញថា ចំនួនគ្រោះថ្នាក់ចរាចរណ៍ផ្លូវគោកទូទាំងប្រទេសក្នុងពិធីបុណ្យភ្ជុំបិណ្ឌ ចាប់ពីថ្ងៃទី២០-២៤ ខែកញ្ញា ឆ្នាំ២០១៤នេះចំនួនអ្នកស្លាប់៤៩នាក់ កើន២១នាក់ ស្មើនឹង៧៥% អ្នករងរបួស៣០៥នាក់ កើន៧៨នាក់ ស្មើនឹង៣៥% ក្នុងនោះរងរបួសធ្ងន់១៨៩នាក់។ របាយការណ៍ឲ្យដឹងថា មូលហេតុបង្កឲ្យមានគ្រោះថ្នាក់រួមមាន ល្មើសល្បឿន៥៩លើក ស្មើនឹង៤៣%, មិនគោរពសិទ្ធិអាទិភាព១៤លើក ស្មើនឹង ១០%, មិនប្រកាន់ស្ដាំ១៣លើក ស្មើនឹង ០៩%, បើកបរប្រជែង ១៥លើក ស្មើនឹង ១១%, ស្រវឹង១៦លើក ស្មើនឹង ១២%, បត់គ្រោះថ្នាក់១០លើក ស្មើនឹង ០៧% សុខភាពងងុយដេកជាដើម។
អ្នកជំនាញគ្រោះថ្នាក់ចរាចរណ៍ លោក អ៊ា ចរិយា មានប្រសាសន៍ថា គ្រោះថ្នាក់នេះបន្តកើនឡើងដោយសារការអនុវត្តច្បាប់របស់មន្ត្រីជំនាញនូវមានកម្រិត។ លោកថា អាជ្ញាធរពាក់ព័ន្ធគួរពង្រឹងការអប់រំ និងរឹតបន្តឹងការអនុវត្តច្បាប់ចរាចរណ៍ឲ្យមានប្រសិទ្ធភាពជាងនេះទៀត។
អ្នកនាំពាក្យអគ្គស្នងការនគរបាលជាតិ លោក គៀត ច័ន្ទថារិទ្ធិ មានប្រសាសន៍ដែរថា ករណីគ្រោះថ្នាក់ចរាចរណ៍ភាគច្រើនដោយសារអ្នកបើកបរម៉ូតូ ចំនួន៦៤% ហើយកំណើននេះ ដោយសារអ្នកបើកបរមិនគោរពច្បាប់ចរាចរណ៍។ លោកថា មកដល់ពេលនេះ សមត្ថកិច្ចកំពុងមានវិធានការរឹតបន្តឹងបន្ថែម តាមរយៈការអប់រំ និងរឹតបន្តឹងការអនុវត្តច្បាប់។
លោក គៀត ច័ន្ទថារិទ្ធិ បន្ថែមថា ក្រសួងមហាផ្ទៃ បានរៀបចំសេចក្តីព្រៀងច្បាប់ស្តីពីចរាចរណ៍ថ្មី និងបានដាក់ទៅរដ្ឋសភារួចហើយ។ លោកថា ក្នុងច្បាប់ថ្មីនេះ គោលបំណងបង្កើនតម្លៃ ផាកវិន័យ និងដាក់ទោសបន្ថែមចំពោះអ្នកប្រព្រឹត្តល្មើស។
របាយការណ៍ របស់អគ្គស្នងការនគរបាលជាតិ ឲ្យដឹងថាខេត្តដែលមានគ្រោះថ្នាក់ច្រើន រួមមាន ខេត្តពោធិ៍សាត់ ស្លាប់ ០៨នាក់, កណ្ដាល ស្លាប់ ០៧នាក់, ព្រៃវែង ស្លាប់ ០៥នាក់, និងកំពង់ធំ ស្លាប់ ០៥នាក់។ ចំណែកគ្រោះថ្នាក់លើដងផ្លូវជាតិ មាន ៦៣% , គ្រោះថ្នាក់លើផ្លូវលំ ២២% , គ្រោះថ្នាក់លើផ្លូវរាជធានី-ខេត្ត ០៧% បណ្ដាលឲ្យខូចខាត ម៉ូតូ ១៧១គ្រឿង, រថយន្តធុនស្រាល ៤១គ្រឿង, រថយន្តធុនធ្ងន់ ០៧គ្រឿង, និងយានយន្តផ្សេងៗ ១៤គ្រឿង៕
សូមសរសេរមកអ្នកនាង ថុល ស្រីលក្ខណ៍ តាមរយៈ sreyleak@vodhotnews.com
ត្រូវហើយគឺគ្រោះថ្នាក់សព្វថ្ងៃនេះអាចកើតមានលើុងដោយច្បាប់ទន់ខ្សោយនិងខ្វះចន្លោះ គេតែងនិយាយថាពាក់ពននិងមួកសុវត្តិភាពតែវាតិចតួចណាស់ បើបងប្អូនតាមសង្កេតអោយបានដិតដល់ គឺសព្វថ្ងៃនេះបុកនិងកិនស្លាប់ទាំងមួកសុវត្តិភាព. ហើយពេលមានច្បាប់ហើយសុំស្ថាបនពាក់ពនកុំអោបទុក គឹធ្វើចិត្តអោយល្អយកមកប្រាប់ប្រជាជនអោយដឹងផង ហើយប្រយត្នពួកអាឆ្លាតពេលអាពួកខូច