ដោយ៖​ ញឹម សុខន និង កាន់ វិច្ឆិកា​
ថ្ងៃចន្ទ ទី20 តុលា 2014
http://vodhotnews.com

មើលរូបភាពបន្ថែម

សកម្មភាពកម្លាំងសមត្ថកិច្ចធ្វើ​ការ​បង្ក្រាបទៅ​លើ​អ្នក​មាន​ជម្លោះដីធ្លី នៅ​ជិត​ផ្ទះ​លោក​នាយក​រដ្ឋមន្ត្រី (រូបថត៖ ញឹម សុខន)

​ពលរដ្ឋ​មកពី​ខេត្ត​ព្រះវិហារ យ៉ាងតិច​ជិត​២០​នាក់ ត្រូវ​កម្លាំង​អាជ្ញាធរ​ខណ្ឌ​ដូនពេញ វាយ​ឲ្យ​របួស​នៅ​ជិត​ផ្ទះ​នាយករដ្ឋមន្ត្រី នា​ថ្ងៃ​ចន្ទ​នេះ បន្ទាប់ពី​ពួកគេ​ព្យាយាម​រក​អន្តរាគមន៍​ផ្ទាល់​លោក ហ៊ុន សែន រឿង​ជម្លោះ​ដីធ្លី​។​

ការប៉ះទង្គិច​នេះ បាន​កើតឡើង​បន្ទាប់ពី​ក្រុមអ្នកតវ៉ា​ប្រមាណ​ជិត​១០០​នាក់ បាន​ព្យាយាម​ទម្លាយ​របាំង ដែល​កម្លាំង​សន្តិសុខ​ការពារ​យ៉ាង​រឹងមាំ ដើម្បី​រុលទៅមុខ​។ ក្នុងហេតុការណ៍​នោះ កម្លាំង​សមត្ថកិច្ច​ប្រដាប់​ដោយ​ខែល ដំបង រាប់រយ​នាក់ បាន​ដាក់ពង្រាយ​ទប់​ស្កាល់​មិន​អ្នក​ដាក់​ញត្តិ​អាច​ទៅ​ជិត​ផ្ទះ​នាយករដ្ឋមន្ត្រី​នៅ​ជិត​វិមាន​ឯករាជ្យ​បាន​។​

នៅពេល​មាន​ការប៉ះទង្គិច​នោះ កម្លាំង​សន្តិសុខ​ខណ្ឌដូនពេញ បាន​ប្រើ​ដំបង​វាយ​សំពង​ទៅ​លើ​ក្រុមអ្នកតវ៉ា បណ្តាល​ឲ្យ​អ្នក​តវ៉ា​ខ្លះ​រងរបួស​ដៃ ជើង និង​អ្នកខ្លះ​ទៀត​បែកក្បាល​ហូរឈាម នៅ​កន្លែងកើតហេតុ ចំណែក​ឧបករណ៍​សម្រាប់​តវ៉ា មានដូចជា​មេក្រូ អំភ្លី​រឺ​ម៉កក​ង់​បី​មួយគ្រឿង ត្រូវ​កម្លាំង​អាជ្ញាធរ​វាយកម្ទេច និង​ដកហូត «​ខ្ញុំ​ត្រូវ​ត្រង់នេះ រយះ​ក្បាលជង្គង់ ខ្ញុំ​ដួល​ប៉ុន្មាន​ត្រឡប់​។ មកនេះ ខ្ញុំ​គ្មាន​មក​ទាមទារ​អ្វី​ទេ ខ្ញុំ​មក​សុំ​សម្តេច​ហ៊ុន សែន ជួយ​ដោះស្រាយ​ឲ្យ​កូនចៅ​ផង ព្រោះ​កូនចៅ​ត្រូវបាន​អាជ្ញាធរ និង​ខេត្ត​បាន​យក​ដី​ពួក​ខ្ញុំ​លក់​ឲ្យ​ក្រុមហ៊ុន​»​។​

VOD មិនអាច​សុំ​អត្ថាធិប្បាយ​ពី​ប្រធាន​សន្តិសុខ​ខណ្ឌដូនពេញ ពី​លោក គឹម វុត្ថា ដែល​ដឹកនាំ​កម្លាំង​ចុះ​បង្ក្រាប​បាន​ទេ​នៅ​ថ្ងៃ​ចន្ទ​នេះ​។ ប៉ុន្តែ​មុន​ប៉ះទង្គិច សមត្ថកិច្ច​ដែល​ដាក់ពង្រាយ​បាន​ប្រាប់​ក្រុមអ្នកតវ៉ា​ថា ការរារាំង​ក្បួន​ដង្ហែ​ដាក់​ញត្តិ​នេះ គឺ​ដើម្បី​ការពារ​សុវត្ថិភាព​ផ្ទះ​មេដឹកនាំ​កំពូល​។​

​មន្ត្រី​ឃ្លាំមើល​ការរំលោភ​សិទ្ធិមនុស្ស​នៅ​អង្គការ​លីកាដូ លោក អំ សំអាត ដែល​តាមដាន​ករណីនេះ ឲ្យដឹងថា អ្នក​តវ៉ា​១៧​នាក់​រងរបួស ក្នុងនោះ​៤​នាក់​រងរបួស​ធ្ងន់​បែកក្បាល​ហូរឈាម​។ លោក​យល់ថា នេះ​ជា​ការរំលោភ​សិទ្ធិមនុស្ស​ធ្ងន់​ធរ​ថ្មី​ទៀត របស់​រដ្ឋាភិបាល​ក្រោយពី​គណបក្ស​សង្គ្រោះ​ជាតិ សម្រេច​ដើរ​ចូល​សភា​ដើម្បី​ធ្វើ​ឲ្យ​បក្ស​កាន់​អំណាច​៥​អាណត្តិ​មកនេះ​ស្របច្បាប់​។ លោក​ថា «​ខ្ញុំ​គិតថា វា​មិន​គួរ​បន្ត​ឲ្យ​វប្បធម៌​អំពើហិង្សា​នេះ​បន្ត​កើត​ឡើង​ទៀត​ទេ យើង​ទទូច​ឲ្យមាន​ការស៊ើបអង្កេត ដើម្បី​ធ្វើ​ការទប់ស្កាត់ កុំ​ឲ្យ​វប្បធម៌​នៃ​អំពើហិង្សា​នេះ កើតមាន​ជា​បន្តទៅទៀត​»​។​

ក្រុមអ្នកតវ៉ា​អះអាងថា កាលពីដើមឆ្នាំ​២០១២ លោក សួស យ៉ារ៉ា ជា​ក្មួយ​លោក សុខ អាន និង​បច្ចុប្បន្ន​ជា​តំណាងរាស្ត្រ​គណបក្ស​ប្រជាជន​កម្ពុជា​ខេត្ត​ព្រះវិហារ បាន​ប្រើ​កងកម្លាំងប្រដាប់អាវុធ ឈូសឆាយ​ផ្ទះ​របស់​ពលរដ្ឋ​២៥៣​គ្រួសារ វត្ត​អារាម សាលារៀន នៅ​ភូមិ​ឫស្សី ឃុំ​កន្ទួត ស្រុក​ជាំ​ក្សាន្ត ដើម្បី​យក​ដី​ធ្វើជា​កម្មសិទ្ធិ​ផ្ទាល់ខ្លួន​។ ចំណែក​ការសុំ​កិច្ច​អន្តរាគមន៍​ពី​ស្ថាប័ន​ពាក់ព័ន្ធ រួម​ទាំង​ខុទ្ទកាល័យ​លោកនាយក​រដ្ឋមន្ត្រី​ផង ដើម្បី​ស្វែងរក​ដំណោះស្រាយ ប៉ុន្តែ​អ្នក​ភូមិ​អះអាង​គ្មាន​ការឆ្លើយតប​ជា​វិជ្ជមាន ទើប​ពួកគេ​ព្យាយាម​យក​ញត្តិ​ដាក់ជូន​ដល់ដៃ​នាយករដ្ឋមន្ត្រី​លោក ហ៊ុន សែន​៕
​

​ 

សូមសរសេរមកលោក ញឹម សុខន តាមរយៈ sokhorn@vodhotnews.com