ដោយ៖ ទូច សុខា
ថ្ងៃចន្ទ ទី20 តុលា 2014
http://vodhotnews.com
មើលរូបភាពបន្ថែម
កម្មកររោងចក្រ Grand Twins ផ្ទុះការតវ៉ានៅមុខរោងចក្រ (រូបពី៖ ប្រជាពលរដ្ឋអ្នកសារព័ត៌មាន)
កម្មកររោងចក្រ Grand Twins ជាង៤ពាន់នាក់ នៅថ្ងៃចន្ទនេះ ផ្ទុះការតវ៉ានៅមុខរោងចក្រដើម្បីទាមទារឲ្យរោងចក្រផ្ដល់ប្រាក់អតីតភាពការងារ និងលក្ខខណ្ឌការងារសមរម្យមួយចំនួន ។
កម្មករចូលរួមការតវ៉ា កញ្ញា ស៊ីណា ប្រាប់VODឲ្យដឹងថា ក្រុមកម្មករធ្វើការប្រមូលផ្ដុំដើម្បីទាមទារប្រាក់អតីភាពការងារ ដោយសាររោងចក្រនេះបានប្ដូរឈ្មោះ «សុំសងសំណងដល់កម្មករពេលដែលរោងចក្រដូរឈ្មោះពី QMI មក Grand Twins។ កម្មករដែលចូលធ្វើការពីមុនៗមក គាត់ចង់ឲ្យបានទឹកប្រាក់ដែលក្រុមហ៊ុនមិនបានសងមកជូនពួកគាត់ ដូចដែលគាត់សន្យាពីមុនមក។ គាត់ (ក្រុមហ៊ុន) កេងប្រវ័ញ្ចនូវប្រាក់កម្មករនៅពេលដែលគាត់បានប្តូរឈ្មោះពី QMI មក Grand Twins កម្មករចង់បានប្រាក់អតីតភាពការងារ»។
កម្មករដែលចូលរួមក្នុងការតវ៉ាម្នាក់ទៀត កញ្ញា វណ្ណេត ឲ្យដឹងថា លក្ខខណ្ឌការងារមួយចំនួនដែលកម្មករទាមទារមានដូចជា សុំឲ្យដំឡើងប្រាក់ថ្លៃបាយពេលថែមម៉ោងនៅថ្ងៃអាទិត្យ ប្រាក់ថ្លៃធ្វើដំណើរ១៥ដុល្លារ ប្រាក់ថ្លៃជួលផ្ទះឲ្យគ្រប់១០ដុល្លារ សុំឲ្យស្ត្រីមានផ្ទៃពោះចេញមុនម៉ោង១៥នាទី និងអនុញ្ញាតឲ្យកម្មករធ្វើការថែមម៉ោងដោយស្ម័គ្រចិត្តជាដើម។
កញ្ញា វណ្ណេត ឲ្យដឹងទៀតថា ខាងរោងចក្រមិនទាន់បានបញ្ជូនតំណាងមកជួបចរចាជាមូយខាងសហជីពនៅឡើយទេ ។ កញ្ញថា ថ្វីបើការតវ៉ាទើបតែមាននៅថ្ងៃនេះ តែខាងកម្មករបានបញ្ជូនសំណើរបស់ខ្លួនមករោងចក្រចំនួន២ដងរួចមកហើយ «យើងដាក់រឿងដែលយើងចង់តវ៉ាហ្នឹងមករោងចក្រពីរដងហើយ តែលើកមុនហ្នឹងវាមានការបង្ខិតបង្ខំតំណាងរបស់ពួកខ្ញុំហ្នឹងឈប់បាត់ទៀតទៅ…ខាងសហជីពក្នុងអត់មាននិយាយអីផង គ្រាន់តែចេញមកស្រែកឲ្យយើងចូលធ្វើការវិញ»។
ទោះជាយ៉ាងណាក៏ដោយ ប្រធានផ្នែករដ្ឋបាលរោងចក្រ លោក ភួង វុទ្ធី មានប្រសាសន៍ថា ខាងរោងចក្រមិនបានទទួលឯកសារណាមួយពីភាគីកម្មរទេ ហើយកម្មករបានរំសាយមុនពេលដែលក្រុមការងាររបស់ក្រសួងការងារចុះមកដល់នៅម៉ោង២រសៀល ។
លោកបញ្ជាក់ថា រោងចក្រមិនបានបង្ខំឲ្យកម្មករធ្វើការថែមម៉ោងទេ គឺរោងចក្របានគោរពទៅតាមច្បាប់ស្តីពីការងារ និងមានអ្នកកុម្ម៉ង់(បញ្ជា)ទិញមកត្រួតពិនិត្យយ៉ាងល្អិតល្អន់ពីស្ថានភាពការងារនៅក្នុងរោងចក្រទៀតផង ។
លោក ភួង វុទ្ធី យល់ថា ការតវ៉ានេះកើតឡើងពីការញុះញង់ពីខាងក្រៅប៉ុណ្ណោះ។ លោកបញ្ជាក់ថា « រោងចក្រនេះប្រើកិច្ចសន្យាមានកំណត់តាំងពី២០០៦មក លុយអ្វីៗសម្រាប់អតីតភាពការងារឆ្នាំហ្នឹងត្រូវបានគេទូទាត់ដាច់ស្រេចអស់ហើយ លុយ៥%នៃកិច្ចសន្យា…ចង់និយាយាថា ឲ្យតែដូរឈ្មោះរោងចក្របានលុយ តើកន្លែងណាមួយដូរឈ្មោះបានលុយ ព្រោះរោងចក្រប្រើកិច្ចសន្យាមានកំណត់ លុយគេសងយើងរហូតអត់មានជំពាក់យើងមួយរៀលទេ»។ លោកថា រោងចក្របានផ្តល់លក្ខខណ្ឌការងារ និងអត្ថប្រយោជន៍ដល់កម្មករបានប្រសើរជាងច្បាប់កំណត់ទៅទៀត ៕
សូមសរសេរមកកាន់លោក ទូច សុខា តាមរយៈ sokha@vodhotnews.com