ដោយ៖ ប្រែង សត្យាភិរក្ស
ថ្ងៃអង្គារ ទី21 តុលា 2014
http://vodhotnews.com
សហភាពសហជីពកម្ពុជា លើកឡើងថាក្រសួងការងាររិតត្បិតសេរីភាពក្នុងការបញេ្ចញយោបល់របស់ភាគី ដែលចូលរួមប្រជុំពិភាក្សាកំណត់ប្រាក់ឈ្នួលអប្បបរមារបស់កម្មករ-និយោជិត។
សេចក្ដីថ្លែងការណ៍របស់សហភាពសហជីពកម្ពុជា ចុះថ្ងៃទី២១ ខែតុលានេះ ឲ្យដឹងថា កាលពីរសៀលថ្ងៃចន្ទ ទី២០ ក្រុមការងារបានចាប់ផ្ដើមកិច្ចប្រជុំពិភាក្សាបញ្ហាប្រាក់ឈ្នួលអប្បបរមារបស់កម្មករនិយោជិត ផ្នែកវាយនភ័ណ្ឌកាត់ដេរសម្លៀកបំពាក់ និងស្បែកជើង ដែលមានការរឹតបន្តឹងដល់ភាគីចូលរួមពិភាក្សាយ៉ាងធ្ងន់ធ្ងរ ដែលមិនធ្លាប់មានចំពោះរាល់កិច្ចប្រជុំពិគ្រោះយោបល់កន្លងមក។
សេចក្ដីថ្លែងការដដែលបន្ថែមថា នៅក្នុងក្រមសីលធម៌នៃការប្រជុំនេះបានដាក់បម្រាមដល់អ្នកចូលរួម ត្រូវរក្សាការសម្ងាត់នៃព័ត៌មាន។
ដោយឡែកសហភាពសហជីពកម្ពុជា ធ្វើការកត់សម្គាល់លើលក្ខណៈវិនិច្ឆ័យផ្នែកសង្គម និងសេដ្ឋកិច្ចរបស់មន្ត្រីក្រសួងការងារ អំពីបន្ទាត់ភាពក្រីក្រសម្រាប់អាហារ ក្នុងកម្រិត២២០០គីឡូកាឡូរី ក្នុង១ខែ ចំណាយ៩៤៩៤៥រៀល និងការចំណាយក្រៅពីអាហារក្នុង១ខែចំនួន ៩៨១០៦រៀល (រាជធានីភ្នំពេញ)ថា មិនឆ្លុះបញ្ជាំងទៅ និងការចំណាយជាក់ស្ដែងនៃតម្លៃទំនិញទីផ្សារ។
VODមិនអាចសុំការអត្ថាធិប្បាយពីអ្នកនាំពាក្យក្រសួងការងារលោក ហេង សួរ បាននៅឡើយទេ ដោយទូរសព្ទចូលតែពុំមានអ្នកទទួល។
សហភាពសហជីពកម្ពុជាស្នើឲ្យក្រសួងការងារផ្ដល់សេរីភាពពេញលេញដល់អ្នកចូលរួមកិច្ចពិភាក្សា និងពិនិត្យមើលនូវលក្ខណៈវិនិច្ឆ័យផ្នែកសង្គម និងសេដ្ឋកិច្ចឡើងវិញ។ ជាមួយគ្នានេះ សហភាពសហជីពកម្ពុជាប្ដេជ្ញារក្សាជំហរ១៧៧ដុល្លារជូនកម្មករ និងព្រមានពីអសន្តិភាពនៅតាមបណ្ដារោងចក្រ បើសិនការទាមទារខាងលើមិនទទួលបានលទ្ធផលទេនោះ។
សូមសរសេរមកកាន់លោក ប្រែង សត្យាភិរក្ស phireak1988.kth@gmail.com