ដោយ៖ បាន វិទ្យា
ថ្ងៃអង្គារ ទី21 តុលា 2014
http://vodhotnews.com
មើលរូបភាពបន្ថែម
កិច្ចប្រជុំស្តីពីបណ្តាញព្រះសង្ឃឯករាជ្យ ស្នើរាជរដ្ឋាភិបាលដោះស្រាយបញ្ហានៅក្នុងវត្តដំណាក់បេង និងវត្តភ្នំខ្ពស់ (រូបដោយ៖ វិទ្យា)
បណ្តាញព្រះសង្ឃឯករាជ្យ ស្នើរាជរដ្ឋាភិបាលដោះស្រាយបញ្ហានៅក្នុងវត្តដំណាក់បេង និងអន្តរាគមន៍បញ្ឃប់ការរំលោភបំពានមកលើវត្តភ្នំខ្ពស់ដែលត្រូវគេអះអាងថាចៅអធិការវត្តត្រូវបានបញ្ឈប់ព្រោះរឿងនយោបាយ។
ស្ថាបនិកបណ្តាញព្រះសង្ឃឯករាជ្យព្រះតេជគុណ ប៊ុត ប៊ុនតិញ មានសង្ឃដីកានៅក្នុងសន្និសីទ្ធសារព័ត៌មាននៅភោជនីយដ្ឋានបៃតង នារសៀលថ្ងៃអង្គារនេះថា ទង្វើរបស់មន្ត្រីសង្ឃក្នុងខេត្តបាត់ដំបង ដែលព្រះតេជគុណអះអាងថាបានរួមដៃជាមួយមន្ទីរធម្មការ និងសាសនាជាបញ្ហាខុសឆ្គង។ ព្រះតេជគុណបន្តថា ព្រះអង្គ ភួង មុន្នី ដែលជាលេខារបស់មេគុណខេត្ត និងមានតួនាទីថ្មីក្នុងការចាត់ចែងព្រះសង្ឃក្នុងខេត្តបាត់ដំបង បានទទួលសំណូកពីព្រះចៅអធិការវត្តដំណាក់បេងគឺព្រះតេជគុណ សន ពៅ ជារៀងរាល់ខែ ចំពោះបញ្ហាពាក់ព័ន្ធព្រះចៅអិការវត្តអង្គនេះ ធ្វើជំនួញនៅក្នុងវត្តលើវត្ថុដែលពុទ្ធបរិស័ទប្រគេន និងធ្វើការបណ្តេញចេញភិក្ខុ ពត ជីវ័ន្ត ដោយគ្មានមូលហេតុសមហេតុផលឡើយ។
VOD មិនអាចទាក់ទងព្រះតេជគុណ ព្រះអង្គ ភួង មុន្នី ជុំវិញបញ្ហានេះបាននៅឡើយទេ ដោយទុរសព្ទចូលតែពុំមានអ្នកទទួល ។
ព្រះតេជគុណ ប៊ុត ប៊ុនតិញ មានសង្ឃដីកាឲ្យដឹងទៀតថា ព្រះចៅអធិការវត្តភ្នំខ្ពស់ ព្រះតេជគុណ ឃឹម សំអឿន ត្រូវបានគេដកតំណែងចេញ ដោយព្រះអង្គធ្វើសកម្មភាពជួយសង្គមដូចជាការជីកស្រះ និងជួយប្រជាពលរដ្ឋក្នុងអំឡុងពេលដែលជួបបញ្ហាទឹកជំនន់ ប៉ុន្តែមន្ត្រីគណបក្សប្រជាជន ក្រុមប្រឹក្សាខេត្ត និងមន្ត្រីសង្ឃខេត្ត បែរជាព្រមានព្រះអង្គឲ្យឈប់ធ្វើសកម្មភាពចែកអំណោយ និងជីកស្រះ បើមិនអញ្ចឹងទេនឹងត្រូវដកតំណែងចេញ។
ប្រធានបណ្តាញព្រះសង្ឃឯករាជ្យ ព្រះតេជគុណ ថង ណារិទិ្ធ មានសង្ឃដីកាថា នេះជាសកម្មភាពអសីលធម៌របស់មន្ត្រីសង្ឃ និងមន្ទីរធម្មការខេត្ត ដោយប្រើអាជ្ញាធរគាបសង្កត់ក្នុងការដោះស្រាយបញ្ហានេះ ហេតុនេះព្រះអង្គស្នើនាយករដ្ឋមន្ត្រីពិចារណាពីការដោះស្រាយបញ្ហានេះ ។ ព្រះតេជគុណមានសង្ឃដីកាថា «ឈប់ប្រើអាជ្ញាធរទៅគាបសង្កត់ តាមរយៈមន្ត្រីសង្ឃ អាជ្ញាធរដែនដីសូមឲ្យសម្តេចបញ្ឃប់ការធ្វើបាបដល់ព្រះសង្ឃតទៅទៀត»។
សមាជិកសកម្មបណ្តាញព្រះសង្ឃឯករាជ្យ ណាំ ចាន់ថេន អះអាងថា សកម្មភាពដកតំណែង និងការបណ្តេញចេញ ជាការរំលោភសិទិ្ធព្រះសង្ឃធ្ងន់ធ្ងរ ពីព្រោះថាសកម្មភាពកន្លងមកជាសកម្មភាពមនុស្សធម៌ និងមិនមានពាក់ព័ន្ធនយោបាយ ឬនិន្នាការទៅបក្សណានោះទេ ប៉ុន្តែចំពោះរាជរដ្ឋាភិបាលកាន់អំណាចបច្ចុប្បន្ន ចោទព្រះអង្គជាអ្នកនយោបាយធ្វើការឲ្យបក្សប្រឆាំង ។
អ្នកនាំពាក្យក្រសួងធម្មការ និងសាសនា លោក សេង សុមុន្នី មានប្រសាសន៍ថា ចំពោះបញ្ហានេះក្រសួងបានបញ្ជាឲ្យមន្ទីរធម្មការខេត្តធ្វើរបាយការណ៍ជាបន្ទាន់មកក្រសួង ដើម្បីពិនិត្យមើលតាមផ្លូវច្បាប់ ថាមានការខុសឆ្គងត្រង់ចំណុចណាមួយ ហើយត្រូវចាត់វិធានការផ្សេងៗ ដោយមាននីតិវិធីដាក់បញ្ជា ឬចុះទៅពិនិត្យជាក់ស្តែង ។
ព្រះតេជគុណ ប៊ុត ប៊ុនតិញ លើកឡើងថា ប្រសិនបើមិនមានការដោះស្រាយពីបញ្ហានេះថា បណ្តាញព្រះសង្ឃឯករាជ្យ នឹងធ្វើធម្មយាត្រាពីបាត់ដំបងទៅភ្នំពេញ ដើម្បីផ្សព្វផ្សាយពីបញ្ហាខុសឆ្គងផ្សេងៗរបស់ព្រះសង្ឃ ធ្វើកូដកម្មក្នុងវត្តភ្នំខ្ពស់ និងដាក់ញ្ញតិទៅក្រសួងធម្មកា និងសាសនាដោះស្រាយពីបញ្ហានេះ។
ព្រះចៅអធិការវត្តភ្នំខ្ពស់ ព្រះតេជគុណ ឃឹម សំអឿន ត្រូវបានដកតំណែងចេញនៅថ្ងៃទី១៩ ខែតុលា ដែលជំនួសដោយព្រះចៅអធិការថ្មី ព្រះតេជគុណ ដួង សុខុម។ ចំណែកភិក្ខុ ពត ជីវ័ន្ត ត្រូវបានបណ្តេញពីវត្តដំណាក់បេង នៅអំឡុងខែឧសភា ហើយព្រះអង្គទាំងពីររងការចោទពីការធ្វើសកម្មភាពក្រោមរូបភាពនយោបាយ។
សូមសរសេរមកកាន់កញ្ញា បាន វិទ្យា តាមរយៈ vitcheaban77@gmail.com