ដោយ៖ ស៊ុន ណារិន
ថ្ងៃអង្គារ ទី21 តុលា 2014
http://vodhotnews.com
បណ្ណាល័យកាហ្វេដែលនឹងក្លាយជាកន្លែងបង្កើតគំនិតថ្មី និងផ្លាស់ប្តូរទម្លាប់នៃការអានសៀវភៅ នឹងត្រូវដាក់សម្ពោធឲ្យប្រើប្រាស់ជាផ្លូវការនៅខែវិច្ឆិកាឆ្នាំ២០១៤ខាងមុខនេះ ដើម្បីអាចឲ្យប្រជាពលរដ្ឋខ្មែរជាពិសេសយុវជនចាប់ផ្តើមបណ្តុះទម្លាប់នៃការអាន។
បណ្ណាល័យដែលត្រូវបានបង្កើតឡើងដោយក្រុមយុវជនខ្មែរចំនួន៧នាក់តាមរយៈការចូលរួមថវិកាផ្ទាល់ខ្លួន ស្ថិតនៅតាមបណ្តោយផ្លូវលេខ៤៤០(ខាងលិចផ្សារទូលទំពូង)ក្នុងភូមិ២ សង្កាត់ទូលទំពូង២ ខណ្ឌចំការមន។បណ្ណាល័យមួយនេះខុសពីបណ្ណាល័យនៅតាមសាលារៀនផ្សេងៗ ដោយសារតែមានការបម្រើសេវាលក់អាហារ និងភេសជ្ជៈនៅទីនោះ ដើម្បីយកថវិកាខ្លះទៅជួយផ្គត់ផ្គង់សេវាបណ្ណាល័យ។
អ្នកស្រី ធីម សុខា ស្ថាបនិកម្នាក់នៃបណ្ណាល័យកាហ្វេ មានប្រសាសន៍ថាយុវជន៧នាក់បានចំណាយថវិកាផ្ទាល់ខ្លួនទៅលើការជួលទីតាំង ការទិញសម្ភារៈប្រើប្រាស់ក្នុងបណ្ណាល័យផ្សេងៗជាដើម។ អ្នកស្រីបញ្ជាក់ថាការអានរបស់កូនខ្មែរនៅមានចំណុចខ្វះខាតនៅឡើយ ស្របពេលដែលបច្ចេកវិទ្យាជឿនលឿនកំពុងតែធ្វើឲ្យមានការថយចុះនៃការអានសៀវភៅ។អ្នកស្រីមានប្រសាសន៍ថា«យើងចង់ឲ្យប្រទេសយើង អ្នកគ្រប់គ្នាចាប់ផ្តើមដោយការអាន។ក្រុមគ្រួសារឪពុកម្តាយចាប់ផ្តើមបណ្តុះកូនស្រលាញ់ការអាន»។
អ្នកស្រី ធីម សុខា ឲ្យដឹងទៀតថាបណ្ណាល័យនេះនឹងលើកកម្ពស់ផ្នែកនិពន្ធ តាមរយៈការប្រមូលផ្តុំអ្នកនិពន្ធក្នុងប្រទេសកម្ពុជា និងការចែករំលែកបទពិសោធន៍ និងស្នាដៃល្អៗរបស់អ្នកនិពន្ធទាំងនោះដល់អ្នកអាន។
នៅក្នុងបណ្ណាល័យ មានការដាក់តាំងសៀវភៅផ្សេងៗសម្រាប់ការអានដូចជាសៀវភៅប្រលោមលោក សៀវភៅរឿងព្រេង ចំណេះដឹងទូទៅ សៀវភៅបរទេសមួយចំនួន។ មិនតែប៉ុណ្ណោះ ក៏មានការដាក់តាំងរូបភាពអ្នកនិពន្ធសៀវភៅ និងអ្នកនិពន្ធបទចម្រៀងផ្សេងៗ។
អ្នកស្រី ធីម សុខា អំពាវនាវឲ្យមជ្ឈដ្ឋានខាងក្រៅ អង្គការសង្គមស៊ីវិល ជួយគាំទ្រសេវារបស់បណ្ណាល័យឲ្យដំណើរការទៅថ្ងៃខាងមុខ ដើម្បីជួយកូនខ្មែរមានទម្លាប់ក្នុងការអានសៀវភៅ។អ្នកស្រីបន្តថា នៅពេលអនាគត ក្រុមស្ថាបនិកមានគម្រោងយកថវិកាដែលជាចំណូលពីការលក់អាហារ និងភេសជ្ជៈចំនួន១៥ភាគរយ ទៅជួយសហគមន៍ក្រីក្រនៅតាមបណ្តាខេត្តនានា តាមរយៈការបង្កើតជាបណ្ណាល័យខា្នតតូច។
បណ្ណាល័យកាហ្វេនេះ ចាប់បើកពីម៉ោង៨ព្រឹកដល់ម៉ោង៩យប់ជារៀងរាល់ថ្ងៃ និងបើកឲ្យមានការចូលរួមអានដោយមិនគិតថ្លៃ៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com
very good idea ‘we all cambodian people support this library,all young generation must spent time in the library reading more and more.GOD bless all cambodian people’
I support this Bannalaicafe … I am waiting the launch come in soon.