ដោយ៖ ទូច សុខា
ថ្ងៃពុធ ទី22 តុលា 2014
http://vodhotnews.com
មើលរូបភាពបន្ថែម
(រូបដោយ៖ ទូច សុខា)
លទ្ធផលនៃការសិក្សាស្រាវជ្រាវថ្នាក់ជាតិមួយបង្ហាញថាកុមារកម្ពុជាច្រើនជាង៧៥ភាគរយ បានទទួលរងនូវអំពើហិង្សាលើផ្លូវកាយ ផ្លូវចិត្ត និងការរំលោភបំពានផ្លូវភេទយ៉ាងតិច១ដង មុនពេលពួកគេមានអាយុ១៨ឆ្នាំ ហើយពួកគេភាគច្រើនមិនបាននិយាយរឿងទាំងនេះប្រាប់នរណាម្នាក់ឡើយ។
នេះបើយោងតាមការសិក្សាមួយដែលត្រូវបានធ្វើឡើងចាប់ពីខែកុម្ភៈដល់មីនាឆ្នាំ២០១៣ ទៅលើកុមារកុមារី និងយុវវ័យដែលមានអាយុចន្លោះពីអាយុ១៣-១៧ឆ្នាំ ចំនួន២៣៧៦នាក់ក្នុងនោះស្រ្តីចំនួន១១២១នាក់។ ការសិក្សាត្រូវបានធ្វើឡើងដោយក្រសួងកិច្ចការនារី ក្រសួងសង្គមកិច្ច ក្រសួងផែនការ ដោយសហការជាមួយក្រសួងស្ថាប័នពាក់ព័ន្ធ និងដៃគូអភិវឌ្ឍន៍មួយចំនួនទៀត ក្រោមជំនួយផ្នែកបច្ចេកទេស និងហិរញ្ញវត្ថុដោយអង្គការ UNICEFប្រចាំកម្ពុជា និងមជ្ឈមណ្ឌលត្រួតពិនិត្យជំងឺ និងកិច្ចបង្ការរបស់សហរដ្ឋអាមេរិក (CDC)។
លទ្ធផលការសិក្សាបង្ហាញថាកុមារី៥២,៧% និងកុមារា៥៤,២%បានទទួលរងនូវអំពើហិង្សាលើផ្លូវកាយ។
ចំណែកកុមារី២០% និងកុមារា២៥%បានទទួលរងនៅអំពើហិង្សាផ្លូវចិត្ត។ លទ្ធផលបង្ហាញទៀតថាក្មេងប្រុស៥,៦% និងក្មេងស្រី៤,៤%ដែលមានអាយុពី១៨ទៅ២៤ឆ្នាំព្រមទាំងកុមារី៦,៤% និងកុមារា៥,២%ដែលមានអាយុ១៣ទៅ១៧ឆ្នាំ ធ្លាប់ទទួលរងការរំលោភបំពានផ្លូវភេទកាលពីកុមារភាព។ កុមារីចំនួន៤៩,៤% និងកុមារា៧៩,៤% មិនដែលយករឿងនេះទៅប្រាប់នរណាផ្សេងឡើយ។ តាមលទ្ធផលនៃការស្រាវជ្រាវដដែលបានបង្ហាញទៀតថាឪពុក ម្តាយ គ្រូបង្រៀន មិត្តភក្តិ និងអ្នកជិតខាង ឬសមាជិកក្នុងសហគមន៍ជាអ្នកដែលបានប្រព្រឹត្តអំពើហិង្សាទៅលើកុមារ។
រដ្ឋមន្រ្តីក្រសួងកិច្ចការនារី លោកស្រី អ៊ឹង កន្ថាផាវី មានប្រសាសន៍ថារដ្ឋាភិបាលកម្ពុជាបានធ្វើការប្តេជ្ញាចិត្តខ្ពស់ក្នុងការទប់ស្កាត់អំពើហិង្សាលើកុមារដែលនៅតែជាបញ្ហាព្រួយបារម្ភនៅឡើយ។ លោកស្រីបញ្ជាក់ថា «អ្វីដែលយើងខ្ញុំបានរៀបចំថ្ងៃនេះ ជាកម្មវីធីមួយដែលបង្ហាញពីឆន្ទៈពិតប្រាកដរបស់រាជរដ្ឋាភិបាល ក៏ដូចការប្តេជ្ញាចិត្តរបស់រាជរដ្ឋាភិបាលក្នុងការទប់ស្កាត់ បង្ក្រាប ធ្វើយ៉ាងណាឲ្យអំពើហិង្សាលើកុមារហ្នឹងមានការថយចុះ។ យើងឃើញហើយថាលទ្ធផលនៃការស្រាវជ្រាវមិនល្អទាំងអស់នោះទេ យើងឃើញហើយ យើងទទួលស្គាល់ ហ្នឹងជាការប្តេជ្ញាចិត្តរបស់រាជរដ្ឋាភិបាលក្នុងការទទួលស្គាល់ និងមានតម្លាភាពទៅលើប្រជាជន»។
រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក វង សូត មានប្រសាសន៍ថាឪពុកម្តាយខ្លះមិនមានចេតនាណាមួយក្នុងការប្រើអំពើហិង្សាលើកូនរបស់ខ្លួននោះទេ តែលោកថាការអប់រំខ្លះមានលក្ខណៈស្លូតបូត និងខ្លះមានលក្ខណៈកាចបន្តិច ទើបបានក្លាយទៅជាហិង្សាលើក្មេង ហើយនេះក៏ជាផ្នែកមួយនៃប្រពៃណីការអប់រំកូនចៅរបស់ប្រជាជនខ្មែរ ដែលខុសពីប្រជាជនអឺរ៉ុប។ លោកបន្ថែមថា «ក្មេងកើតឡើងវារស់នៅជាមួយឪពុកម្តាយតាំងពីតូចភាគច្រើន អញ្ចឹងឪពុកម្តាយតែងតែរកវិធីអប់រំកូនតាមទំនៀមទម្លាប់របស់គាត់ចឹង ដូចជាស្តីថាឬណែនាំដោយស្លូតបូតក៏មាន ឬកាចបន្តិចក៏មាន។កន្លែងហ្នឹងហើយដែលធ្វើឲ្យមានការយល់ដឹងថ្មីសម្រាប់ប្រជាពលរដ្ឋទូទៅថាខ្លួនធ្វើទៅលើកូននេះ គឺជាការខុសឆ្គងមួយទៅលើច្បាប់ ទោះជាទំនៀមទម្លាប់យើងនេះចឹង តែការប្រព្រឹត្តរបស់យើងវាហួសបន្តិច»។
តំណាងពិសេសរបស់លោកអគ្គលេខាធិការអង្គការសហប្រជាជាតិ ទទួលបន្ទុកអំពើហិង្សាលើកុមារ លោកស្រីMarta Santos Pais មានប្រសាសន៍តាមអ្នកបកប្រែថារាជរដ្ឋាភិបាលកម្ពុជាត្រូវពង្រឹងការអនុវត្តច្បាប់ មិនត្រូវទុកច្បាប់តែនៅលើក្រដាសនោះទេ និងត្រូវមានការប្តេជ្ញាចិត្តក្នុងការចូលរួមពីភាគីដែលពាក់ព័ន្ធទាំងអស់។
គួរបញ្ជាក់ថាការស្រាវជ្រាវបង្ហាញថាអំពើហិង្សាលើកុមារបានធ្វើឲ្យខាតសេដ្ឋកិច្ចកម្ពុជាអប្បបរមាគិតជាទឹកប្រាក់ចំនួន១៦១លានដុល្លារអាមេរិក៕
ផ្ទាំងបដា ផ្សព្វផ្សាយពីសិទ្ធិកុមារក្នុងការអភិវឌ្ឍ
សូមសរសេរមកកាន់ លោក ទូច សុខា តាមរយៈ sokha@vodhotnews.com