ដោយ៖ វង្ស សុម៉ាលីន
ថ្ងៃព្រហស្បតិ៍ ទី23 តុលា 2014
http://vodhotnews.com
មើលរូបភាពបន្ថែម
ខាត់ សុឃីម និងស្វាមីនាពេលកន្លងមក (រូបភាព៖ វង្ស សុម៉ាលីន)
ផ្ទុយពីការយល់ឃើញថា មកពីរវល់ទើបមិនទទួលយកការសម្ដែងកុន ខាត់ សុឃីម បែរជាអះអាងថា ការបោះបង់អាជីពមួយនេះ គឺព្រោះតែស្វាមីរារាំងទៅវិញ។ អ្នកនាងប្រាប់ថា ជំហរស្វាមីប្រហែលមិនអាចផ្លាស់ប្ដូរនោះទេ ក្នុងពេលដែលអ្នកនាងក៏ត្រូវបង្ខំចិត្តធ្វើតាម។
ខាត់ សុឃីម និយាយថា មិនដែលមានបំណងចង់បោះបង់ការសម្ដែងនោះទេ បើទោះជាខ្សែជីវិតសិល្បៈរបស់អ្នកនាងឈានដល់ចំណុចកប់ពពក ដែលអាចនិយាយយ៉ាងខ្លីថា មិនត្រូវការ ប្រជាប្រិយភាពពីការសម្ដែងក៏បាន ។ ភាពយន្ត ជាការងារដែលជួយឲ្យអ្នកនាង ទទួលបាននូវបទពិសោធន៍ និងបានជួបជុំតារាចាស់ក្មេងជាច្រើនកែកុនភាពអផ្សុក។ បើទោះមិនមានជំនាញ ប៉ុន្តែអ្នកនាងប្រាប់ថា អាចសម្ដែងបានល្អមិនថាជាតួអង្គអ្នកបម្រើ តួអង្គចេកចូច តួម្ដាយស្លូត ឬតួម្ដាយពូកែកលល្បិចនោះទេ។ ជាក់ស្ដែងអ្នកនាងទទួលបានជោគជ័យរួចមកហើយ តាមរយៈខ្សែរឿងសម្រាប់បញ្ចាំងរោងកុន និងរឿងភាគរបស់ទូរទស្សន៍នាពេលកន្លងមក។
តារាចម្រៀងដែលមានសណ្ដានសិល្បៈរូបនេះ និយាយថា «រឿងកុន ខ្ញុំចង់សម្ដែងណាស់ ប៉ុន្តែមកពីផាណូ(ប្ដី)គាត់ហាមឈប់ឲ្យខ្ញុះថត ទើបខ្ញុំមិនដែលទទួលទាល់តែសោះ ក្នុងរយៈពេលនេះ!»។ ហេតុផលដែលលោកផាណូជាស្វាមី បិទផ្លូវមិនឲ្យទទួលសម្ដែងមិនមែនមកពីប្រច័ណ្ឌ ឬបារម្ភខ្លាចអ្នកនាងនឿយហត់នោះទេ។ ប៉ុន្តែអ្វីដែលសំខាន់គឺ ស្វាមីអ្នកនាងមិនចង់ឲ្យអ្នកនាងបន្សំខ្លួនក្នុងនាមជានារីចាស់ទុំ ដែលតម្រូវដោយខ្សែរឿង។ ខាត់ សុឃីម បញ្ជាក់ថា ខ្សែរឿងដែលបានទាក់ទង តម្រូវឲ្យអ្នកនាងសម្ដែងតែជាតួម្ដាយ និងជាតួចាស់ទុំប៉ុណ្ណោះ ទើបជាហេតុបណ្ដាលឲ្យអ្នកនាងទទួលការជំទាស់ពីស្វាមី។
អ្នកនាងពោលដោយអស់សំណើចថា «ប្ដីខ្ញុំមិនចូលចិត្តឲ្យខ្ញុំធ្វើខ្លួនបែបមនុស្សចាស់នោះទេ គឺឲ្យតែលែងខ្លួន និងស្លៀកពាក់បែបសម័យៗ អញ្ចឹងគាត់អត់ឲ្យខ្ញុំសម្ដែងទេ នៅពេលឮថាដើរតួម្ដាយ ឬតួអង្គបែបចំណាស់ៗអីហ្នឹង!»។ ការហាមប្រាមនេះ មិនមែនជាការរើសអើងរបស់ស្វាមីនោះទេ ប៉ុន្តែមកពីលោកផាណូ ចង់ឃើញអ្នកនាងតែងកាយជានារីស្រស់ស្អាត និងមើលទៅក្មេងជាងវ័យជាប្រចាំ ទើបឈប់ឲ្យថតកុនតែម្ដង។ យ៉ាងហោចមានខ្សែរឿងចំនួន៥ ដែលអ្នកនាងធ្វើឲ្យរបូតពីដៃ ក្នុងអំឡុងប្រមាណជា៣ឆ្នាំដែលអ្នកនាងមិនទទួលយកការសម្ដែងនេះ ខណៈដែលខ្សែរឿងនីមួយៗ សុទ្ធតែបានទទួលតំណែងជាតួអង្គម្ដាយ ដែលជាតួសំខាន់ក្នុងរឿង និងទទួលបានតម្លៃខ្លួនខ្ពស់។ នេះជាការអះអាងដោយផ្ទាល់មាត់ របស់តារាចម្រៀងដែលសស្រាក់សស្រាំជាថ្មីក្នុងអាជីពពិធីការិនីដែលធ្លាប់បោះបង់ ។
អត្ថបទកំសាន្តផ្សេងទៀត
អ្នកនាងនិយាយថា «រឿងពេលអត់ចោទទេ ព្រោះទោះជាខ្ញុំរវល់ចេញច្រៀង ឬរវល់រឿងសម្អាង ក៏អាចឲ្យថ្ងៃផលិតករបានដែរ ប៉ុន្តែបញ្ហាដែលថតមិនបាន គឺប្ដីតែម្ដង ព្រោះគាត់ហ្នឹងសូម្បីតែខ្ញុំស្លៀកពាក់ខោអាវអីមើលទៅរាងចាស់បន្ដិចក៏បន្ទោសដែរ អញ្ចឹងកុំឲ្យឈ្លោះគ្នាគឺកុំថត! ម្យ៉ាងខ្ញុំឥឡូវកំពុងចាស់ផង បើឲ្យទៅធ្វើតួម្ដាយអីទៀត គឺប្រាកដជាកញ្ចាស់ង៉ោងស្លាប់ហើយ ទើបសុខចិត្តតាមប្ដី!»។ អ្នកនាងប្រាប់ថាលោកផាណូចូលចិត្តឲ្យអ្នកនាងឈោងចាប់អាជីពចម្រៀង និងពិធីការិនីប៉ុណ្ណោះ ដោយសារតែអាជីពទាំងពីរ អាចជួយឲ្យអ្នកនាងតែងខ្លួនស្អាតៗ ហើយស៊ីវិល័យជួយលើកសម្រស់មួយផ្នែក។ អ្នកនាងនឹងអាចបោះបង់ការសម្ដែងមិនមានកំណត់ ដរាបណាលោកផាណូនៅមិនកែប្រែជំហរ។
មិនខុសពីការលើកឡើងរបស់ ខាត់ សុឃីម លោកផាណូ បញ្ជាក់ថា ហេតុផលដែលលោកស្នើមិនឲ្យភរិយាថតកុនក្រោយរៀបការ គឺបណ្ដាលមកពីខ្សែរឿងដែលទាក់ទងគឺឲ្យតែអ្នកនាងថតជាតួម្ដាយ ក្នុងពេលដែលខាត់ សុឃីម នៅសមជាមួយនឹងភាពស៊ីវិល័យនៅឡើយ។ លោកនិយាយបែបកំប្លែងថា «គាត់(ភរិយា)នៅស្លៀកពាក់ក្មេងនៅស្អាតនៅឡើយ ឲ្យទៅសម្ដែងតួចាស់ តួសក់ស្កូវអញ្ចឹងទៀតមិនកើតទេ ស្ដាយសម្រស់ណាស់ ចាំចាស់បន្តិចទៀតចាំឲ្យគាត់ថតក៏មិនអីដែរ!»។ យ៉ាងណាក៏ដោយការសម្ដែងជាតួម្ដាយនៅក្នុងស្ពតដែលទទួលបានតម្លៃខ្ពស់ លោកថាមិនបានហាមឃាត់នោះទេ ដោយសារតែការងារនោះចំណាយពេលតិច ទទួលកម្រៃច្រើន ហើយអាចពង្រីកកេរ្តិ៍ឈ្មោះបានរហ័ស៕
សូមសរសេរមកកាន់លោក វង្ស សុម៉ាលីន តាមរយៈ vongsomalin@yahoo.com
Nothing surprise.
មានបានចេះតែវ៉ៃឬក បើរហាមវិញស្អីក៍ថត,ចង់ថតស្រាតក៍អូខេដែរ។ជិនណាស់។