Thu, 23 October 2014
សូ វុទ្ធី
ភ្នំពេញប៉ុស្តិ៍
ភ្នំពេញៈ ការកាត់ផ្តាច់សម្ព័ន្ធស្នេហ៍ទាំងភាពចម្រូងចម្រាសរបស់តារាចម្រៀងនាង សន ផល្លិកា ពី វីជេ រតនា ត្រូវបានមជ្ឈដ្ឋានដែលដឹងពីភាពស៊ីជម្រៅរបស់គូស្នេហ៍មួយគូនេះ លើកឡើងថា ព្រោះតែស្រីស្រស់ ផល្លិកា មានអ្នកថ្មី។ ប៉ុន្តែនៅពេលនេះ មិនដឹងថា ស្នេហាថ្មីនាងយ៉ាងណានោះទេ ស្រាប់តែមានការបង្ហើបមកថា ផល្លិកា តែងទូរស័ព្ទរក រតនា ស្ទើររាល់ថ្ងៃ។ ចំពោះបញ្ហានេះ វីជេ រតនា ក៏ទទួលស្គាល់ថា ផល្លិកា ពិតជាឧស្សាហ៍ទូរស័ព្ទរកលោកមែន។
សង្គ្រាមស្នេហ៍ដ៏គគុករវាងតារាចម្រៀងចំណូលថ្មីរបស់ផលិតកម្មហង្សមាស នាង សន ផល្លិកា និង វីជេ រតនា ជ្រកក្រោមដំបូលទូរទស្សន៍ CTN បានបញ្ចប់ទៅដោយការទម្លាយរឿងអាស្រូវពីក្រោយខ្នងជាហូរហែ ដែលពេលនោះ នាង សន ផល្លិកា និងក្រុមគ្រួសារ បានគំរាមប្ដឹងទៀតផង បើ វីជេ រតនា មិនព្រមសុំទោស ហើយបន្តអុកឡុកផ្លូវចិត្ត និងបរិហាររឿងរ៉ាវឯកជនរបស់នាងបន្ថែមទៀតនោះ។
ទន្ទឹមនឹងភាពស្ងប់រលត់ភ្លើងស្នេហ៍នោះ ស្រាប់តែថ្មីៗនេះមានប្រភពពីអ្នកសិល្បៈបានបង្ហើបប្រាប់ថា ពេលនេះ សន ផល្លិកា ទំនងជាស្តាយក្រោយក៏មិនដឹងឬក៏ជាចេតនា បញ្ឈឺចិត្ត រតនា ក៏មិនប្រាកដដែរ ដែលជារឿយៗ នាងតែងតែទូរស័ព្ទមក រតនា សួរពីនេះ សួរពីនោះ។ ប៉ុន្តែពេលសួរជជីកនឹងដំណឹងដែលថា នាង ផល្លិកា មានស្នេហាជាមួយអ្នកថ្មី និងល្បីថាជាកូនអ្នកមានទ្រព្យស្តុក និងថាជ្រោមជ្រែងឲ្យនាងឡើងយីហោជាជំទាវវ័យក្មេងនោះ ប្រភពនោះមិនបានបកស្រាយយ៉ាងណានោះទេ ដោយនិយាយថា រឿងនោះគេមិនបានដឹងទេ គឺឮតែគេល្បីដូចគ្នានេះដែរ។
ទោះបីយ៉ាងណា ជុំវិញការបង្ហើបរបស់ប្រភពនេះ នាង សន ផល្លិកា មិនអាចសុំការបកស្រាយបានទេ ខណៈទូរស័ព្ទចូល ទទួលហើយពេលឮថាជាអ្នកកាសែត ក៏ផ្តាច់ការទាក់ទង និងព្យាយាមខលទៅទៀតមិនមានអ្នកទទួល។
ចំពោះការលើកឡើងខាងលើ វីជេ រតនា បានទទួលស្គាល់ថា មួយរយៈចុងក្រោយនេះ ផល្លិកា ពិតជាឧស្សាហ៍ទូរស័ព្ទរកលោកមែន។ លោកបានប្រាប់ថា៖«ខ្ញុំមិនដឹងថាយ៉ាងណាដែរទេ មួយរយៈនេះ ពិសេសពេលនាងញ៉ាំបៀរស្រវឹង ពេលយប់ៗនាងតែងខលមករកខ្ញុំ សួរសុខទុក្ខ សួរថា បងនៅណា? កំពុងធ្វើអ្វី ជាដើម»។
វីជេ រតនា បន្តថា៖«ខ្ញុំមិនដឹងថា នាងខលមកក្នុងចេតនាយ៉ាងណាចំពោះខ្ញុំ ព្រោះថា ពេលខ្លះ គាត់ខលមកប្រាប់ថា នាងមានប្តីហើយ ប៉ុន្តែពេលខ្លះក្នុងអារម្មណ៍គាត់ ដូចជា ចង់ប្រាប់ខ្ញុំថា ពេលនេះនាងឯកាក៏មិនដឹង?»។
យ៉ាងណា រតនា បញ្ជាក់ថា៖ «នាងមិនបានប្រាប់ថា នឹកខ្ញុំ និងនៅស្រឡាញ់នោះទេ ក្រៅពីសួរសុខទុក្ខ និងសួរថា នៅណានោះ»។
ប៉ុន្តែ វីជេ រតនា បានប្រកាសដាច់ខាតថា ពេលនេះក្នុងចិត្តលោកបានស្ងប់រលត់ហើយ ហើយក៏គ្មានឡើយពាក្យស្នេហាក្នុងចិត្ត ពាក្យស្នេហា ពាក្យស្រឡាញ់មានតែចំពោះមនុស្សស្រីម្នាក់គត់គឺម្តាយ»៕