ដោយ៖ ណាត សុភាព
ថ្ងៃចន្ទ ទី27 តុលា 2014
http://vodhotnews.com
ស្តាប់សំឡេង៖ |
ចម្លងទុក |
តំណាងរាស្ត្រគណបក្សប្រឆំាង សន្យាជួយជំរុញទៅស្ថាប័នពាក់ព័ន្ធ ពន្លឿនដោះស្រាយបញ្ហាដីធ្លីជូនពលរដ្ឋនៅស្រុកបវេល ខេត្តបាត់ដំបង ដែលមានជម្លោះជាមួយអ្នកមានអំណាចជិត១០ឆ្នំាមកហើយ។
តំណាងរាស្ត្រគណបក្សសង្គ្រោះជាតិ នៅមណ្ឌលខេត្តបាត់ដំបងលោកស្រី មូរ សុខហួរ ឲ្យVODដឹងនៅថ្ងៃចន្ទនេះ បន្ទាប់ពីលោកស្រីបានចុះសំណេះសំណាលជាមួយអ្នករងគ្រោះដីធ្លី មកពីស្រុកបវេល ខេត្តបាត់ដំបង ដែលស្នាក់នៅវត្តចាស់ រាជធានីភ្នំពេញថា លោកស្រីនឹងជួយជំរុញឲ្យអភិបាលខេត្តនេះ បង្កើតគណៈកម្មការជំនាញមួយ ចុះវាស់វែងនឹងផ្តល់ប័ណ្ណកម្មសិទ្ធិដីធ្លីជូនពលរដ្ឋនៅ ឃុំបឹងប្រាំ ស្រុកបវេល ខេត្តបាត់ដំបង ដើម្បីឲ្យពលរដ្ឋទំាងនោះទទួលបានដីបង្កបង្កើនផលដូចដើមវិញ។
លោកស្រី មូរ សុខហួរ ព្រមានថា បើអភិបាលខេត្តបាត់ដំបងមិនពន្លឿនដោះស្រាយបញ្ហានេះជូនអ្នករងគ្រោះដ្លីធ្លីទេ លោកស្រីនឹងស្នើទៅប្រធានគណៈកម្មការទី១នៃរដ្ឋសភា លោក អេង ឆៃអ៊ាង កោះហៅមន្ត្រីពាក់ព័ន្ធ និងរដ្ឋាភិបាល ឲ្យចូលភ្លឺជាសាធារណៈនៅសភា ជុំវិញករណីនេះ។ លោកស្រីពន្យល់ថា «តួនាទីនៃតំណាងរាស្ត្រ មានតែសុំកោះអញ្ជើញរដ្ឋមន្ត្រីដែលពាក់ព័ន្ធ ហើយនិងកោះអញ្ជើញនាយករដ្ឋមន្ត្រីមកឆ្លើយនៅមុខគណៈកម្មការ ឬមួយក៏នៅក្នុងអង្គសភាទាំងមូល»។
VOD មិនអាចសុំការអត្ថាធិប្បាយពីអភិបាលខេត្តបាត់ដំបង លោក ចាន់ សុផល បានទេនៅថ្ងៃចន្ទនេះ។
អ្នកឃ្លាំមើលការរំលោភសិទ្ធិមនុស្សនៃអង្គការលីកាដូប្រចាំខេត្តបាត់ដំបង លោក ហេង សាយហុង យល់ថា មិនថាតំណាងរាស្ត្រគណបក្សនយោបាយណាមួយទេ គួរតែរកដំណោះស្រាយបញ្ចប់ជម្លោះ ព្រោះបញ្ហាដីធ្លីនៅតំបន់នោះកើតឡើងជាច្រើនឆ្នាំហើយ។ លោកបញ្ជាក់ថា បើអ្នកនយោបាយមានឆន្ទៈដោះស្រាយមែននោះបញ្ហាដីធ្លីនឹងត្រូវបញ្ចប់។ លោកថា «ប្រសិនជាតំណាងរាស្ត្រ មិនថាដល់តំណាងរាស្រ្តគណបក្សនយោបាយណាទេ ឲ្យតែគាត់មានការឈឺឆ្អាលចូលរួម មានឆន្ទៈ ដើម្បីជំរុញឲ្យមានការដោះស្រាយបញ្ហាដីធ្លីជូនប្រជាពលរដ្ឋ វាចប់ហើយ វាអត់មានអ្វីស្មុគស្មាញទេ»។
អ្នកមានជម្លោះដីធ្លីស្ថិតនៅឃុំបឹងប្រាំ ស្រុកបវេល ខេត្តបាត់ដំបង អះអាងថា ផ្ទៃដីដែលមានជម្លោះជាមួយអាជ្ញាធរមូលដ្ឋាន និងអ្នកមានអំណាចនៅតំបន់នោះ សរុបប្រមាណជាង១ពាន់ហិកតា ក្នុងនោះមានពលរដ្ឋប្រមាណ៣០០គ្រួសារ។ ពួកគេថា ជម្លោះនោះមានរយៈពេលជិត១០ឆ្នាំហើយ ដោយពួកគេជាង១០០នាក់បានមកស្នាក់នៅវត្តចាស់ សង្កាត់ជ្រោយចង្វា រាជធានីភ្នំពេញ ជាង១ខែហើយ ដើម្បីរង់ចំាដំណោះស្រាយពីរដ្ឋសភា រដ្ឋាភិបាល និងស្ថាប័នពាក់ព័ន្ធ តែរហូតមកដល់ពេលនេះមិនទាន់ដំណោះស្រាយនៅឡើយ៕
សូមសរសេរមកកាន់លោក ណាត សុភាព តាមរយៈ sopheap@vodhotnews.com