ដោយ៖ ស៊ុន ណារិន
ថ្ងៃចន្ទ ទី27 តុលា 2014
http://vodhotnews.com
ធនាគារអភិវឌ្ឍន៍អាស៊ី (ADB) ផ្តល់ជំនួយឥតសំណង និងកម្ចីជាទឹកប្រាក់ចំនួន៩៩លានដុល្លារអាមេរិក សម្រាប់គម្រោងកែលម្អផ្លូវជនបទដំណាក់កាលទី២ កម្មវិធីអភិវឌ្ឍន៍វិស័យអប់រំបណ្ដុះបណ្ដាលបច្ចេកទេស និងវិជ្ជាជីវៈ និងគម្រោងកាត់បន្ថយគ្រោះភ័យនៃគ្រោះមហន្ដរាយតាមសហគមន៍។
ការចុះហត្ថលេខាលើកិច្ចព្រមព្រៀងនៅថ្ងៃចន្ទនេះត្រូវបានធ្វើឡើងដោយរដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន និង ធនាគារអភិវឌ្ឍន៍អាស៊ី។ កិច្ចព្រមព្រៀងនោះ គឺផ្តោតលើកញ្ចប់ ហិរញ្ញប្បទាន ចំនួន៦៦លានដុល្លារ អាមេរិក នៃហរិញ្ញប្បទាន សរុបចំនួន១១៨លានដុល្លារ អាមេរិក របស់គម្រោងកែលម្អ ផ្លូវជនបទ ដំណាក់កាលទី២។ ហិរញ្ញប្បទានរបស់ គម្រោងនេះ រួមបញ្ចូលទំាងកម្ចី ក្នុងទឹកប្រាក់ចំនួន៥៤លានដុល្លារ ពីធនាគារអភិវឌ្ឍន៍អាស៊ី កម្ចីស្របគ្នា ក្នុងទឹកប្រាក់ ៤១លានដុល្លារ ពីរដ្ឋាភិបាល សាធារណរដ្ឋកូរ៉េ (ដែលនឹងចុះហត្ថលេខា នៅពេលក្រោយ) ជំនួយឥតសំណង ក្នុងទឹកប្រាក់៦,៦៧ លានដុល្លារ ពីរដ្ឋាភិបាលអូស្ដ្រាលី និងការផ្ដល់ សហហិរញ្ញប្បទាន លើជំនួយឥតសំណង ក្នុងទឹកប្រាក់៥,៤លានដុល្លារ ពីមូលនិធិអភិវឌ្ឍន៍ អឺរ៉ុបខាងកើត។
ADB បញ្ជាក់ថារដ្ឋាភិបាលនឹងផ្តល់ ហរិញ្ញប្បទានបដិភាគចំនួន ១១,១៦លានដុល្លារអាមេរិក សម្រាប់គម្រោងនេះ។
សេចក្តីប្រកាសព័ត៌មានបន្តថាធនាគារអភិវឌ្ឍន៍អាស៊ីនឹងផ្ដល់នូវកម្ចីចំនួន៣០លានដុល្លារសម្រាប់កម្មវិធីអភិវឌ្ឍន៍វិស័យអប់រំបណ្ដុះបណ្ដាលបច្ចេកទេស និងវិជ្ជាជីវៈ ក្នុងគោលបំណង បង្កើនលទ្ធភាព អាចរកការងារធ្វើបានរបស់ ពលករ ដែលមាន វិញ្ញាបនបត្រ បញ្ផាក់ការអប់រំ បណ្ដុះបណ្ដាល បច្ចេកទេស និងវិជ្ជាជីវៈ(TVET) តាមរយៈប្រព័ន្ធTVET មួយដែលឆ្លើយតបនឹងតម្រូវការទីផ្សារការងារ។
ចំណែកគម្រោងកាត់បន្ថយ គ្រោះភ័យនៃ គ្រោះមហន្ដរាយ តាមសហគមន៍ ទឹកប្រាក់២,៥លានដុល្លារ ជាហិរញ្ញប្បទានពីមូលនិធិជប៉ុន សម្រាប់កាត់ បន្ថយភាពក្រីក្រ ដែលនឹងផ្ដល់ការគាំទ្រដល់ ខេត្ដគោលដៅចំនួន៦ រួមមាន ខេត្ដបាត់ដំបង បន្ទាយមានជ័យ សៀមរាប កំពង់ធំ កំពង់ចាម និងព្រៃវែង ដើម្បីអនុវត្ដនូវផែនការគ្រប់គ្រងគ្រោះភ័យគ្រោះមហន្ដរាយ និងផែនការបន្ស៊ាំទៅនឹងការប្រែប្រួលអាកាសធាតុ។
លោក Eric Sidgwick នាយកប្រចាំប្រទេសកម្ពុជារបស់ធនាគារអភិវឌ្ឍន៍អាស៊ី មានប្រសាសន៍ថា«គំនិតផ្ដួចផ្ដើមទាំងនេះនឹងលើកកម្ពស់គុណភាពជីវិតរបស់ប្រជាពលរដ្ឋក្រីក្រ និងងាយរងគ្រោះ តាមរយៈការកសាង នូវបណ្ដាញផ្លូវ ដែលធន់ទៅនឹង អាកាសធាតុ និងមានប្រសិទ្ធភាព ចំណាយ ការអភិវឌ្ឍកម្លាំង ពលកម្មជំនាញ ដែលឆ្លើយតបទៅនឹង តម្រូវការទីផ្សារការងារ និង ផែនការគ្រប់គ្រង គ្រោះមហន្ដរាយ ធម្មជាតិ ដែលនឹងកាត់បន្ថយ ផលប៉ះពាល់ នៃគ្រោះមហន្ដរាយ នៅក្នុងប្រទេស កម្ពុជា»។
មានមូលដ្ឋាននៅទីក្រុងម៉ានីល ធនាគារអភិវឌ្ឍន៍អាស៊ីប្ដេជ្ញាកាត់បន្ថយភាពក្រីក្រនៅអាស៊ី និងប៉ាស៊ីហ្វិក តាមរយៈកំណើនសេដ្ឋកិច្ចដើម្បីទាំងអស់គ្នា កំណើនដែលធានានិរន្ដរភាពបរិស្ថាន និងសមាហរណកម្មតំបន់។ បង្កើតឡើង នៅក្នុងឆ្នាំ១៩៦៦ ធនាគារនេះគឺជាកម្មសិទ្ធិរបស់សមាជិកចំនួន៦៧ប្រទេស ដែលក្នុងនោះមាន៤៨ប្រទេស មកពីតំបន់នេះ។នៅក្នុងឆ្នាំ២០១៣ ជំនួយដែលផ្តល់ដោយធនាគារអភិវឌ្ឍន៍អាស៊ីសរុបមានចំនួន២១ពាន់លានដុល្លារបូករួម ទាំងសហប្រទាន ចំនួន៦,៦ ពាន់លានដុល្លារផង៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com