ដោយ អ៊ុង សេរីវុទ្ធ
2014-10-27
RFA
ចៅក្រមសាលាដំបូងខេត្តកោះកុង សម្រេចឃុំខ្លួនតំណាងពលរដ្ឋម្នាក់ ក្នុងចំណោមពលរដ្ឋ ៤នាក់ទៀត ដែលតុលាការចោទប្រកាន់ពីបទលួចទ្រព្យសម្បត្តិក្រុមហ៊ុន អេស.អ៊ី.ហ្សិត (SEZ) របស់លោកឧកញ៉ា លី យ៉ុងផាត់ នៅថ្ងៃទី២៧ តុលា ទោះបីជាតំណាងអយ្យការស្នើសុំដាក់ករណីនេះក្រោមការត្រួតពិនិត្យរបស់តុលាការ។
តំណាងពលរដ្ឋរូបនោះមានឈ្មោះ ផន ណុល អាយុ ៤៨ឆ្នាំ ភេទប្រុស ជាជនពិការដៃម្ខាង រស់នៅក្នុងភូមិយាយសែន ឃុំព្រែកខ្សាច់ ស្រុកគិរីសាគរ ខេត្តកោះកុង ត្រូវបានចៅក្រមលោក ខាំ សុផារី សម្រេចឃុំខ្លួន តែត្រូវបានសង្គមស៊ីវិលចាត់ទុកថា នេះជាការគំរាមកំហែងបំបាក់ស្មារតីពលរដ្ឋដែលតវ៉ាជម្លោះដីជាមួយក្រុមហ៊ុនមានអំណាច។
អ្នកសម្របសម្រួលសមាគមអាដហុក (Adhoc) ខេត្តកោះកុង លោក នាង បូរ៉ាទីណូ បានឲ្យដឹងថា ក្រុមពលរដ្ឋដែលតុលាការចោទប្រកាន់នោះ គ្រាន់តែរក្សាទុកសម្ភារៈសំណង់របស់ក្រុមហ៊ុន ដែលសង់របងលើដីរបស់ពលរដ្ឋដែលបានលក់ឲ្យក្រុមហ៊ុន ដោយបានបិទផ្លូវទៅស្រែចម្ការរបស់ពលរដ្ឋកាលពីដើមឆ្នាំ២០១៣ ហើយពលរដ្ឋបានចេញលិខិតបញ្ជាក់ថា នឹងមិនមានការបំផ្លាញ ឬធ្វើឲ្យខូចខាតសម្ភារៈនោះទេ ល្គឹកណាមានការព្រមព្រៀងគ្នាជាមុនសិន។
លោក នាង បូរ៉ាទីណូ បន្តថា លោកបានតស៊ូមតិនឹងចៅក្រម ប៉ុន្តែត្រូវចៅក្រមឆ្លើយតបថាការឃុំខ្លួននេះ ដោយសារកន្លងទៅពេលតុលាការកោះហៅតំណាងពលរដ្ឋមកសាកសួរ ក្រុមប្រជាពលរដ្ឋនោះតែងតែស្រែកច្រៀងឡូឡាក្រៅរបងតុលាការ និងចាំរកយុត្តិធម៌ជូនលោក ផន ណុល នៅពេលក្រោយ «វាមែនជារឿងមួយដែលត្រូវដាក់គាត់ក្នុងពន្ធនាគារ អ៊ីចឹងរូបភាពបែបនេះ ការឃុំគាត់នេះ ដូចជាដាក់គំនាប បំបាក់ស្មារតីតំណាងប្រជាពលរដ្ឋដែលតវ៉ាក្នុងរឿងដីធ្លី កុំឲ្យគាត់មានការតវ៉ាតទៅទៀត»។
វិទ្យុអាស៊ីសេរី មិនអាចសុំការឆ្លើយបំភ្លឺពីលោកចៅក្រម ខាំ សុផារី នៅថ្ងៃទី២៧ តុលានេះ។
ក្រៅពីតំណាងពលរដ្ឋដែលត្រូវចៅក្រមសម្រេចឃុំខ្លួនរូបនេះ ចៅក្រមសាលាដំបូងខេត្តកោះកុង នឹងបន្តកោះហៅតំណាងពលរដ្ឋម្នាក់ម្ដងៗ ៣រូបទៀតមកឆ្លើយបំភ្លឺនៅថ្ងៃខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- សង្គមស៊ីវិលចាត់ទុកជម្លោះដីធ្លីជាបញ្ហាចម្បងនៅកម្ពុជា
- ពលរដ្ឋសហគមន៍SOSតវ៉ានៅមុខផ្ទះនាយករដ្ឋមន្ត្រីពីរឿងកម្មសិទ្ធិដីនិងសំណង
- ស្ត្រីមេម៉ាយទិញអេតចាយដឹកកូនពិការមកពីខេត្តបាត់ដំបងឡើងតវ៉ាដីធ្លីនៅភ្នំពេញ
- ពលរដ្ឋខេត្តកំពតអំពាវនាវឲ្យអាជ្ញាធរពិនិត្យឡើងវិញការអនុវត្តសាលដីកាតុលាការកំពូល
- ពលរដ្ឋជាង២០០គ្រួសារនៅកោះកុងរកអន្តរាគមន៍ពីអាជ្ញាធរទាមទារដីស្រែចម្ការពីក្រុមហ៊ុន
- លិខិតអន្តរាគមន៍ទំនាស់ដីក្រុងរណបជ្រោយចង្វារត្រូវបានបញ្ជូនទៅលោក ហ៊ុន សែន
- ជនជាតិព្នងនៅក្រចេះអះអាងថាក្រុមហ៊ុនវៀតណាមបន្តឈូសឆាយតំបន់ព្រៃឈើសហគមន៍
- ពលរដ្ឋជិត២០០គ្រួសារនៅកំពង់ឆ្នាំងរង់ចាំដំណោះស្រាយបញ្ចប់ជម្លោះដីធ្លី
- ជនជាតិដើមភាគតិចពរនៅបាត់ដំបងបារម្ភបាត់បង់ដីទៅក្រុមហ៊ុន