ដោយ៖​ ណាត សុភាព​
ថ្ងៃអង្គារ ទី11 វិច្ឆិកា 2014
http://vodhotnews.com

ស្ត្រី​សកម្មជន​ដីធ្លី​នៃ​សហគមន៍​បឹង​កក់​៧​នាក់​ដែល​ត្រូវ​បានអាជ្ញាធរ​​ចាប់ខ្លួន​កាល​ពី​ម្សិល​មិញ​ត្រូវ​បាន​បញ្ជូន​ទៅ​កាន់​សាលា​ដំបូង​រាជធានី​ភ្នំពេញ នៅ​ព្រឹក​ថ្ងៃ​អង្គារ​នេះ ។

ប្រជាពលរដ្ឋ​មក​ពី​សហគមន៍​បឹង​កក់​ម្នាក់ ដែល​កំពុង​ឈរ​តវ៉ា​នៅ​មុខ​សាលា​ដំបូង ​អ្នក​ស្រី អេង សុខណៃ ​ឲ្យ​VODដឹង​ថា លោក​ស្រី​បាន​ឃើញ​អាជ្ញាធរ​បញ្ជូន​ស្ត្រី​សកម្មជន​ទាំង​៧នាក់​​​មក​សាលាដំបូង​កាល​ពី​ម៉ោង៧​ព្រឹក​ថ្ងៃ​អង្គារ​នេះ ។

អ្នក​ស្រី អេង សុខណៃ ឲ្យ​ដឹង​ទៀត​ថា រូបគាត់​ និង​ប្រជាពលរដ្ឋ​មក​ពី​សហគមន៍​បឹង​កក់​ បុរី​កីឡា​ និង​សហគមន៍​ឡពាងមាន​គ្នា​ជាង​៤០​នាក់​ កំពុង​ធ្វើការតវ៉ា​នៅមុខ​សាលាដំបូង​ ​ទាមទារឲ្យតុលាការ​​ដោះ​លែងអ្នក​ទាំង​៧​ដោយ​គ្មាន​លក្ខខណ្ឌ ព្រោះពួក​គេ​ពុំ​បាន​ធ្វើ​អ្វី​ខុសទេ ដោយ​គ្រាន់​តែ​ស្វែង​រក​អន្តរាគមន៍​ពី​អាជ្ញាធរ​ឲ្យ​ជួយ​រំដោះ​ទឹក​ស្អុយ​ដែល​កំពុង​ជន់​លិច​សហគមន៍​របស់​ខ្លួនប៉ុណ្ណោះ ។

​កាលពី​ថ្ងៃ​ចន្ទ​ម្សិលមិញ ស្ត្រី​សកម្មជន​ដីធ្លី​៧​នាក់​នៅ​សហគមន៍​បឹងកក់ ត្រូវបាន​សមត្ថកិច្ច​ចាប់ខ្លួន បន្ទាប់ពី​ពួកគេ​ប្រមាណ​ជាង​៥០​នាក់​ព្យាយាម​បិទ​ផ្លូវ​មុខ​សាលា​រាជធានី​ភ្នំពេញ ទាមទារ​ឲ្យ​អាជ្ញាធ​រអន្តរាគមន៍រំ​ដោះ​ទឹកស្អុយ​ចេញ​ពី​ភូមិ​ ។

​អ្នកនាំពាក្យ​សាលា​រាជធានី​ភ្នំពេញ​លោក ឡុង ឌី​ម៉ង់ មានប្រសាសន៍​កាល​ពី​ម្សិលមិញ​ថា ការ​ដែល​សមត្ថកិច្ច​ចាប់ខ្លួន​ស្ត្រី​ទាំងនោះ ដោយសារ​ពួកគេ​ដឹក​នាំគ្នា​ធ្វើ​សកម្មភាព​ផ្ទុយ​នឹង​ច្បាប់​ដែល​បិទ​ផ្លូវ​សាធារណៈ ហើយ​បិទ​ផ្លូវ​ចេញចូល​សាលា​រា​ធានី​ភ្នំពេញ​។

សកម្មជន​ដីធ្លី​ទាំង​៧​នាក់​ដែល​ត្រូវបាន​ចាប់ខ្លួន​នោះ​រួមមាន លោកយាយ ង៉ែត ឃុន អ្នកស្រី ទេព វ​ន្នី អ្នកស្រី បូ ឆវី កញ្ញា សុង ស្រី​លាភ អ្នកស្រី គង់ ចន្ថា អ្នកស្រី ផាន់ ឈុន​រ៉េត និង​អ្នកស្រី ណង ស្រេង ៕

សូមសរសេរ​មក​លោក ណាត សុភាព តាម​រយៈ sopheap@vodhotnews.com