ដោយ៖ ថុល ស្រីលក្ខណ៍
ថ្ងៃសុក្រ ទី14 វិច្ឆិកា 2014
http://vodhotnews.com
ស្តាប់សំឡេង៖ |
ចម្លងទុក |
មើលរូបភាពបន្ថែម
ក្រុមកម្មករធ្វើការតវ៉ានៅព្រឹកថ្ងៃសុក្រនេះ (រូបភាព៖ ថុល ស្រីលក្ខណ៍)
បុគ្គលិកក្រុមហ៊ុនទ្រូថាមភ្នំពេញ ស្ថិតនៅសង្កាត់ទំនប់ទឹក ខណ្ឌចំការមន ប្រមូលផ្តុំគ្នាបាតុកម្មបិទផ្លូវច្រកចេញចូលក្រុមហ៊ុន មិនឲ្យបុគ្គលិកដែលពួកគេថា ជាបុគ្គលិកថ្មីនោះ ចូលធ្វើការ នៅព្រឹកថ្ងៃសុក្រនេះ ដើម្បីដាក់សម្ពាធឲ្យថៅកែចេញមកចរចាពីបញ្ហាសុវត្ថិការងាររបស់ពួកគេ។
ការផ្ទុះបាតុកម្មជាថ្មីទៀតនេះ បន្ទាប់ពីការបរាជ័យ ក្នុងការស្នើសុំចរចាជាមួយភាគីក្រុមហ៊ុន ពីបញ្ហាបញ្ឈប់តំណាងបុគ្គលិក៩នាក់ពីការងារ កាលពីថ្ងៃទី២៤ ខែតុលាឆ្នាំ២០១៤ ។
លោក សួន ចំរើន ដែលអះអាងជាតំណាងបុគ្គលិកមានប្រសាសន៍ថា មូលហេតុដែលពួកគេតវ៉ាជាថ្មីទៀតនេះ ដោយសារក្រុមហ៊ុនឲ្យប្រធានផ្នែកធំៗចំនួន៣នាក់បានធ្វើការវិញ បើទោះជាបុគ្គលិកធ្លាប់តវ៉ាឲ្យដកចេញហើយបែរជាបញ្ឈប់បុគ្គលិកចំនួន៩នាក់ដែលធ្លាប់ដឹកនាំបាតុកម្មកន្លងមក។ លោកថា «គឺជាលក្ខខណ្ឌមិនច្បាស់លាស់ លក្ខខណ្ឌមិនមានទំនុកចិត្ត ក៏ដូចជាមិនមានទំនួលខុសត្រូវ ហេតុនេះហើយបានជាពួកខ្ញុំធ្វើការទាមទារកលក្ខខណ្ឌ ក៏ដូចជារកវត្ដមានអ្នកដឹកនាំណាដែលអាចមានវត្ដមាន ក៏ដូចជាឥទ្ធិពលក្នុងការចរចា ។ យើងធ្វើលិខិតចរចាជាសាធារណៈ យើងធ្វើលិខិតចរចាជាផ្លូវការថា តើគាត់ធ្វើនេះពិតជាអាចធានាជូនពួកយើងវិញទេនៅក្នុងអំឡុងពេលយើងចូលធ្វើការវិញ ឬក៏អំឡុងពេលដែលគាត់ចរចាវិញ ចឹងហេតុនេះហើយបានយើងធ្វើការបែបនេះ» ។
លោក សួន ចំរើន បន្ថែមថា ពួកគេទទូចឲ្យភាគីក្រុមហ៊ុននេះចេញមុខធានាពីសុវត្ថិភាពរបស់ពួកគេ បន្ទាប់ពីក្រុមហ៊ុននេះទទួលយកប្រធានផ្នែកទាំង៣នាក់ដែលលោកអះអាងថាធ្លាប់ប្រើហិង្សាលើបុគ្គលិក ។
ឆ្លើយតបទៅនឹងការលើកឡើងនេះ លោក ញ៉ែម សុភ័ក្រ ដែលអះអាងថាខ្លួនជាប្រធានអគ្គនាយកក្រុមហ៊ុនទ្រូថាមភ្នំពេញ អះអាងថា ក្រុមហ៊ុនបានចរចាឲ្យបុគ្គលិកទាំងនោះចូលធ្វើការវិញ តែពួកគេមិនព្រម ហើយមិនបានរើសបុគ្គលិកថ្មីបន្ថែមនោះទេ ។ លោកថា មូលហេតុដែលដកបុគ្គលិក៩នាក់ ដោយសារបុគ្គលិកនោះបង្កបញ្ហាដល់ក្រុមហ៊ុន។ លោកថា «គាត់នៅតវ៉ាគាត់តវ៉ាទៅបុគ្គលិកថ្មីយើងមិនបាច់ឲ្យធ្វើការក៏បានដែរ ដែរគាត់កំពុងតែតវ៉ា តែបុគ្គលិកចាស់គាត់ខុសអីគេ គាត់ត្រូវការធ្វើការដើម្បីយកប្រាក់ ហើយដល់ពេលគាត់មកបិទចឹង» ។
ប្រធានសហព័ន្ធសហជីពអភិវឌ្ឍន៍កម្មករ លោក តែម តុន មានប្រសាសន៍ថា ការបញ្ឈប់តំណាងបុគ្គលិកជាការរើសអើងលើសហជីព។ លោកថា «កាលណាចូលរួមសកម្មភាពសហជីព ឬក៏មានការទាមទារអញ្ចឹង ហើយក្រុមហ៊ុនបញ្ឃប់គឺខុសតែម្ដង មានន័យថារើសអើងតែម្ដង អត់គោរពសិទ្ធិសេរីភាព ហើយក៏ដូចមិនគោរពច្បាប់ និយាយឲ្យចំទៅគឺអត់គោរពច្បាប់តែម្ដង» ។
បើតាមបុគ្គលិក ភាគីក្រុមហ៊ុនបានបញ្ឈប់ប្រធានផ្នែកចំនួន៣នាក់ពីការងារគឺ លោក ញ៉ែម សុភ័ក្រ លោក ញ៉ែម សុភា និងលោក ទ្រី ណារិន កាលពីខែកក្កដា ឆ្នាំ២០១៤ បន្ទាប់ពីបុគ្គលិកទាមទារឲ្យបញ្ឈប់ថ្នាក់ដឹកនាំទាំងនេះចេញពីការងារដោយចោទថាប្រើហិង្សា និងប្រើប្រាស់អាវុធគំរាមពួកគេ ។ តែនៅថ្ងៃទី២៤ខែតុលា ភាគីក្រុមហ៊ុនបានទទួលយកអ្នកទាំង៣នាក់នេះ ឲ្យចូលធ្វើការវិញជាបន្តបន្ទាប់ និងប្រកាសបញ្ឈប់តំណាងបុគ្គលិក៩នាក់ ដែលធ្លាប់ដឹកនាំបុគ្គលិកបាតុកម្ម ទើបបង្កឲ្យផ្ទុះការតវ៉ាជាថ្មីទៀតនេះ៕
សូមសរសេរមកអ្នកនាង ថុល ស្រីលក្ខណ៍ តាមរយៈ sreyleak@vodhotnews.com