ដោយ ឡេង ម៉ាលី
2014-11-17
RFA
ជនជាប់ចោទ ខៀវ សំផន អតីតប្រធានគណៈប្រធានរដ្ឋនៃរបបកម្ពុជាប្រជាធិបតេយ្យ ក្នុងសវនាការសាលាក្ដីខ្មែរក្រហម ក្នុងអំឡុងឆ្នាំ២០១៣។ hoto courtesy of ECCC
ការបន្តសវនាការរបស់អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី ១៧ វិច្ឆិកា ដើម្បីពិភាក្សាលើអង្គសេចក្ដីក្នុងសំណុំរឿង ០០២ វគ្គ ២ មិនបានប្រព្រឹត្តទៅដូចការគ្រោងទុកទេ ដោយសារមេធាវីការពារក្ដីជនជាប់ចោទ ខៀវ សំផន មិនបានចូលរួម។
ចៅក្រមសាលាដំបូង នៃសាលាក្ដីខ្មែរក្រហម បង្ខំចិត្តផ្អាកសវនាការជាថ្មីម្ដងទៀត ដោយសារ គ្មានមេធាវី របស់ជនជាប់ចោទ ខៀវ សំផន ចូលរួម ប៉ុន្តែបានដាក់លក្ខខណ្ឌកំហិត ឲ្យ ជនជាប់ចោទទទួលយកការសម្រេចរបស់សាលាក្តីខ្មែរក្រហម។
ការផ្អាកសវនាការម្ដងទៀត នៅពេលរសៀលថ្ងៃទី ១៧ វិច្ឆិកា។ នៅមុនពេលផ្អាកសវនាការនេះ ប្រធានអង្គជំនុំជម្រះសាលាដំបូង គឺលោកចៅក្រម និល ណុន ប្រាប់ទៅជនជាប់ចោទ ខៀវ សំផន ថា ប្រសិនបើជនជាប់ចោទនៅតែបង្គាប់មិនឱ្យមេធាវីការពារក្ដីគាត់ចូលរួមសវនាការទៀត អង្គជំនុំជម្រះនឹងតែងតាំងមេធាវីដោយមិនចាំបាច់យល់ព្រមពីជនជាប់ចោទ។ ការតែងតាំងនេះ នឹងអនុវត្តតាមវិធានការ ៣ យ៉ាង។ សំឡេង
លោកចៅក្រមបញ្ជាក់ទៅជនជាប់ចោទ ខៀវ សំផន ថា ទោះបីជាគាត់មានសិទ្ធិជ្រើសរើសមេធាវីក្ដី ក៏សិទ្ធិនេះមិនមានលក្ខណៈដាច់ខាតទេ ហើយសិទ្ធិនេះនឹងត្រូវកម្រិតនៅពេលដែលផលប្រយោជន៍រកយុត្តិធម៌តម្រូវឱ្យធ្វើ។
ជនជាប់ចោទ ខៀវ សំផន ឆ្លើយតបអង្គជំនុំជម្រះថា គោលបំណងតែងតាំងមេធាវីថ្មីសម្រាប់រូបលោកនោះ លោកមើលមិនឃើញថា មានអ្វីដែលអាចការពារសិទ្ធិរបស់លោកទេ។ ផ្ទុយទៅវិញ លោកថាជួនកាល ការតែងតាំងបែបនេះ អាចប៉ះពាល់សិទ្ធិរបស់លោកទៅវិញ។ សំឡេង
សវនាការនៅពេលព្រឹក ជនជាប់ចោទ ខៀវ សំផន បញ្ជាក់ជូនអង្គជំនុំជម្រះថា អវត្តមានក្រុមមេធាវីការពារក្ដីលោក មិនមែនជាពហិការទេ។ ក៏ប៉ុន្តែលោកបង្គាប់មិនឱ្យមេធាវីមកចូលរួម ព្រោះលោកឱ្យក្រុមមេធាវីនោះ ខំយកចិត្តទុកខ្លាំងលើកធ្វើសារណាប្ដឹងឧទ្ធរណ៍ ជំទាស់នឹងសាលក្រម ដែលកាត់ទោសលោកឱ្យជាប់ពន្ធនាគារមួយជីវិត។
ប្រធានអង្គជំនុំជម្រះសាលាដំបូង លោកចៅក្រម និល ណុន ចាត់ទុកការអវត្តមានរបស់មេធាវីការពារជនជាប់ចោទ ខៀវ សំផន នៅពេលនេះថា ជាការរំលោភសេចក្ដីបង្គាប់របស់អង្គជំនុំជម្រះ។ ការដាក់ជម្រើសឱ្យជនជាប់ចោទ ខៀវ សំផន នៅពេលនេះ គឺជាវិធានការដំបូង ដែលអង្គជំនុំជម្រះធ្លាប់ចេញការព្រមានមុនពេលចាប់ផ្ដើមសវនាការ។ រីឯអ្នកច្បាប់ខ្លះចាត់ទុកថា ការប៉ុនប៉ងតែងតាំងមេធាវីថ្មីរបស់អង្គជំនុំជម្រះ គឺខុសច្បាប់។
ទោះជាយ៉ាងណាក្ដី អង្គជំនុំជម្រះសាលាដំបូង លើកសវនាការទៅបន្តនៅថ្ងៃទី ២៤ វិច្ឆិកាទៀត ដោយទុកពេលឱ្យជនជាប់ចោទ ខៀវ សំផន ត្រឹមម៉ោង៤ល្ងាច ថ្ងៃទី ១៨ វិច្ឆិកា ដើម្បីឆ្លើយតបទៅអង្គជំនុំជម្រះវិញ អំពីការសម្រេចចិត្តរបស់លោក ថាតើត្រូវបន្តបង្គាប់ឱ្យមេធាវីចូលរួមសវនាការសំណុំរឿង ០០២ វគ្គ ២ ឬមិនចូលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- មេធាវីការពារក្ដីជនជាប់ចោទក្នុងសំណុំរឿង០០២វគ្គ២នៅតែរក្សាជំហរមិនចូលសវនាការ
- សាលាក្ដីខ្មែរក្រហមព្រមានមេធាវីការពារក្ដី នួន ជា ខៀវ សំផនសាជាថ្មី
- សាលាក្ដីខ្មែរក្រហមពិភាក្សាអំពីការរៀបចំនិងគ្រប់គ្រងសវនាការសំណុំរឿង០០២វគ្គ២
- សាលាក្ដីខ្មែរក្រហមព្រមានមេធាវី នួន ជា និង ខៀវ សំផន
- មេធាវីការពារក្តី នួន ជា និងខៀវ សំផន បន្តធ្វើពហិការមិនចូលរួមសវនាការ
- មេធាវីការពារក្ដីឲ្យលោក នួន ជា និងលោក ខៀវ សំផន ធ្វើពហិការមិនចូលសវនាការ
- ចៅក្រមផ្អាកសវនាការបន្ទាប់ជនជាប់ចោទ នួន ជា និងខៀវ សំផន ដើរចេញពីសវនាការ
- សម្ភាសមេធាវីការពារក្តីឲ្យអតីតមេដឹកនាំខ្មែរក្រហមក្នុងសំណុំរឿង០០២វគ្គ២
- សាលាក្តីខ្មែរក្រហមនឹងបើកសវនាការលើសំណុំរឿង០០២វគ្គ២នៅថ្ងៃ១៧តុលា