ដោយ៖ អុិត សូធឿត
ថ្ងៃពុធ ទី19 វិច្ឆិកា 2014
http://vodhotnews.com
ក្រសួងការបរទេសឲ្យដឹងថា ពលករខ្មែរ២០នាក់ដែលត្រូវបានជួយសង្គ្រោះពីទូកនេសាទថៃ ក្នុងប្រទេសឥណ្ឌូនេស៊ី នាពេលកន្លងមក និងត្រូវបញ្ជូនមកដល់ប្រទេសកម្ពុជានៅម៉ោង៣និង៣០នាទី រសៀលថ្ងៃពុធនេះ ។
សេចក្ដីប្រកាសព័ត៌មានរបស់ក្រសួងការបរទេសចេញថ្ងៃទី១៨ ខែវិច្ឆិកា ឲ្យដឹងថា ស្ថានទូតកម្ពុជាប្រចាំប្រទេសឥណ្ឌូនេស៊ី បានសហការជាមួយអង្គការទេសន្តរប្រវេសន៍អន្តរជាតិ IOM នៅទីក្រុងហ្សាកាតា ដើម្បីធ្វើមាតុភូមិនិវត្តន៍ពលរដ្ឋខ្មែររងគ្រោះទាំង២០នាក់មកកម្ពុជាវិញ។
សេចក្ដីប្រកាសព័ត៌មាន ឲ្យដឹងទៀតថា មុននឹងធ្វើមាតុភូមិនិវត្តន៍ពលរដ្ឋខ្មែរទាំង២០នាក់នេះ ស្ថានទូតកម្ពុជា បានសហការជាមួយអាជ្ញាធរឥណ្ឌូនេស៊ី ធ្វើការចរចាជាមួយតំណាងទូកនេសាទថៃ ដើម្បីឲ្យថៅកែទូកបើកប្រាក់ខែគ្រប់ចំនួនដល់ពួកគាត់។ លោកថា តាមសំណើរបស់ស្ថានទូតកម្ពុជា អង្គការទេសន្តរប្រវេសន៍អន្តរជាតិ សន្យាផ្តល់ថវិកាដល់ពលរដ្ឋខ្មែររងគ្រោះទាំងអស់នេះ ម្នាក់១០០០ដុល្លារ សម្រាប់សម្រួលក្នុងការធ្វើសមាហរណកម្មពួកគាត់ ចូលក្នុងសង្គមគ្រួសារវិញ។
បើតាមសេចក្ដីប្រកាសព័ត៌មាន ឲ្យដឹងដែរថា ពលរដ្ឋខ្មែរទាំង២០នាក់នោះមានអាយុពី១៩ឆ្នាំ ដល់៣៤ឆ្នាំ និងមានស្រុកកំណើតនៅខេត្តសៀមរាប បន្ទាយមានជ័យ ព្រៃវែង កំពង់ចាម កំពង់ធំ និងក្រចេះ៕
សូមសរសេរមកលោក អុិត សូធឿត តាមរយៈ sothoeuth@vodhotnews.com