Thu, 20 November 2014
ឆាយ ច័ន្ទនីដា
ភ្នំពេញប៉ុស្តិ៍
ភ្នំពេញៈ ស្ត្រីជាម្តាយនិងកូនប្រុស នៃគ្រួសារដែលមានជម្លោះដីធ្លីក្តៅគគុក ជាមួយក្រុមហ៊ុន ឃុន សៀ ដែលធ្លាប់ត្រូវបានគេបោះពស់វែកចូលផ្ទះ ហើយដែលបានរត់គេចខ្លួនចេញពីផ្ទះនៅ សង្កាត់បឹងកក់ ១ ខណ្ឌទួលគោក បានសម្រេចចិត្តវិលចូលផ្ទះវិញហើយកាលពីម្សិលមិញ ខណៈដែលប្តី និងកូនស្រីម្នាក់ ត្រូវបានតុលាការធ្វើការចោទប្រកាន់ និងបញ្ជូនទៅឃុំខ្លួននៅពន្ធនាគារព្រៃស។
អ្នកស្រី ម៉ក់ ស៊ាវហ៊ូង អាយុ ៥០ឆ្នាំ និងកូនប្រុស លី ប៊ុនហៀង អាយុ ១៨ឆ្នាំ បានសម្រេចចិត្តវិលចូលផ្ទះវិញដោយសារតែខ្លាចផ្ទះដែលមានជម្លោះរងការរុះរើឬចូលរំលោភបំពានយកដោយមិនដឹងខ្លួន ពីសំណាក់ក្រុមហ៊ុន ឃុន សៀ ដែលជាគូជម្លោះ។
លោក ណន អូនី មន្ត្រីផ្នែកច្បាប់ នៃក្រុមការងារសិទ្ធិលំនៅឋានបានឲ្យដឹងថា ឪពុកនិងកូនស្រី ដែលកំពុងជាប់ឃុំនៅពន្ធនាគារ ត្រូវបានលោកចៅក្រម លីម លីបម៉េង ចោទប្រកាន់កាលពីថ្ងៃអង្គារ ពីបទប្រើប្រាស់ហិង្សាលើអ្នកកាន់កាប់អចលនវត្ថុស្របច្បាប់។
យុវជន លី ប៊ុនហៀង ដែលបានរត់គេចពីការចាប់ខ្លួននៅសាលាដំបូងរាជធានី ខណៈទៅមើលឪពុក ដែលត្រូវគេឃាត់ខ្លួនកាលពីថ្ងៃអង្គារ បានឲ្យដឹងថា រូបគេនិងម្តាយបានបង្ខំចិត្តវិលចូលផ្ទះវិញដើម្បីការពារផ្ទះខ្លួន។ យុវជនរូបនេះនិយាយថា៖ «ខ្ញុំទៅផ្ទះវិញដោយសារយើងគេចខ្លួនក៏អត់ប្រយោជន៍ដែរ យើងសុខចិត្តប្រឈមនឹងការចាប់ខ្លួន តែយើងមិនចង់ឲ្យបាត់បង់ផ្ទះពួកយើងទេ»។
មន្ត្រីអង្គការសង្គមស៊ីវិល បានថ្លែងថា ការចាប់ខ្លួនសមាជិកគ្រួសារនេះ អាចជាការដាក់សម្ពាធ តាមរយៈការប្រើអំណាចរបស់តុលាការ ដើម្បីបង្ខំឲ្យគ្រួសារដែលមានជម្លោះដីធ្លីនេះ ព្រមទទួលយកសំណងមិនសមរម្យ ដែលពួកគេតែងតែបដិសេធតាំងពីយូរមកហើយ។ គ្រួសាររងគ្រោះ ក៏យល់ស្របទៅនឹងការលើកឡើង របស់មន្ត្រីអង្គការសង្គមស៊ីវិលនេះដែរ។
អ្នកស្រី ស៊ាវហ៊ូង បាននិយាយថា ក្រោយការចាប់ខ្លួនប្តីនិងកូនស្រីរបស់អ្នកស្រី មានតំណាងក្រុមហ៊ុនម្នាក់ បានទាក់ទងរកអ្នកស្រីហៅឲ្យទៅចរចា ដើម្បីបញ្ចប់រឿងជម្លោះនេះ ប៉ុន្តែអ្នកស្រីមិនព្រម ដោយទាមទារឲ្យមានការដោះលែងប្តី និងកូនរបស់អ្នកស្រីជាមុនសិន។ អ្នកស្រីនិយាយថា៖ «ប្តីនិងកូនស្រីខ្ញុំ បានផ្តាំថា ពួកគាត់សុខចិត្តនៅក្នុងគុក មិនត្រូវការឲ្យខ្ញុំចរចាអ្វីទាំងអស់។ យើងរស់នៅលើដីយើងផ្ទះយើងជាង ៣០ឆ្នាំ មកហើយ មិនមែនជាដីអ្នកដទៃទេ»។
លោកចៅក្រម លីម លីបម៉េង មិនអាចទាក់ទងសុំធ្វើការអធិប្បាយបានទេកាលពីម្សិលមិញ។
ក្រុមហ៊ុន ឃុន សៀ ទទួលបានសិទ្ធិពីរដ្ឋាភិបាល លើដី សាលាសង្កាត់បឹងកក់មួយ ក្នុង ខណ្ឌទួលគោក កាលពី ឆ្នាំ២០១០ ក្នុងពេលដែលលោក កែប ជុតិមា ជាអភិបាលរាជធានី។ ការសម្រេចរបស់រដ្ឋាភិបាលផ្តល់ដីសាលាសង្កាត់ទៅឲ្យក្រុមហ៊ុន ឃុន សៀ នេះ មួយផ្នែកបានជាន់លើដីផ្ទះរបស់ប្រជាពលរដ្ឋជាច្រើនគ្រួសារ នៅក្បែរនោះ ដែលពួកគេបានអះអាងថា បានរស់នៅទីនេះ ចាប់តាំងពីក្រោយ ឆ្នាំ១៩៧៩ មក។
លោកឧត្តមសេនីយ៍ យឹម លាង ប្រធានអង្គរក្សលោក ជា ស៊ីម ដែលជាតំណាងក្រុមហ៊ុន ឃុន សៀ បានបិទទូរស័ព្ទ នៅពេល ភ្នំពេញ ប៉ុស្តិ៍ ទាក់ទងសុំការបំភ្លឺពីករណីនេះ កាលពីម្សិលមិញ។
លោក ណន អូនី មន្ត្រីផ្នែកច្បាប់នៃក្រុមការងារសិទ្ធិលំនៅឋាន (HRTF) បានថ្លែងថា ក្រោយពីមានការពិភាក្សាជាមួយអង្គការលោក ពួកគេសម្រេចចិត្តទៅផ្ទះវិញហើយ HRTF ក៏បានរកមេធាវីបន្ថែមពីរនាក់ មកពីមជ្ឈមណ្ឌលសិទ្ធិមនុស្សកម្ពុជា ជូនពួកគាត់។ លោកថ្លែងថា៖ «បើគាត់គេច ក៏គង់តែគេចាប់ពេលណាមួយមិនខាន។ អ៊ីចឹងពួកគេមិនអាចចុះចោលផ្ទះឡើយ ខ្លាចមានការរុះរើផ្ទះគាត់ ទើបគាត់ទៅវិញ»។ លោកបានបន្តថា តាមការចរចាកន្លងមកក្រុមគ្រួសារលោក ស្រ៊ាខេង មិនដែលលើកពីថ្លៃសំណងក្នុងការចាកចេញទេ ព្រោះពួកគេមានបំណងចង់រស់នៅទីនេះទៀត។ ប៉ុន្តែយ៉ាងណាក៏ដោយបើក្រុមហ៊ុនចាំបាច់ត្រូវតែឲ្យពួកគេចេញ ក្រុមហ៊ុនត្រូវតែផ្តល់សំណងសមរម្យទៅតាមតម្លៃទីផ្សារ។ លោកឲ្យដឹងទៀតថា៖ «ក្រុមហ៊ុននោះ គ្មានបំណងផ្តល់សំណងជូនពួកគាត់បានច្រើន លើសពី ៨ ម៉ឺនដុល្លារនោះទេ ក៏ប៉ុន្ដែពួកគាត់ក៏មិនដែលបានដាក់តម្លៃចរចាផងដែរ»៕
Why can Khun Sear company pay the suitable or acceptable fee for the land if this company will make more money from that land?
Why deos this company wants the land for free?