ដោយ អ៊ុក សាវបូរី
2014-11-20
RFA
ស្ដាប់ ឬ ទាញយកសំឡេង
រដ្ឋមន្ត្រីក្រសួងទេសចរណ៍ លោក ថោង ខុន (ឆ្វេង) និងអ្នកតំណាងរាស្ត្រមកពីគណបក្សសង្គ្រោះជាតិ លោក ញ៉ែម បុញ្ញឫទ្ធិ (ស្តាំ) ផ្ដល់បទសម្ភាសន៍ដល់អ្នកកាសែត កាលពីថ្ងៃទី១៩ ខែវិច្ឆិកា ឆ្នាំ២០១៤។ RFA/Ouk Savborey
រដ្ឋមន្ត្រីក្រសួងទេសចរណ៍ លោក ថោង ខុន ចូលខ្លួនទៅបំភ្លឺនៅរដ្ឋសភាតាមការកោះអញ្ជើញពីគណៈកម្មការទី៧នៃរដ្ឋសភា នៅរសៀលថ្ងៃទី១៩ ខែវិច្ឆិកា។ ក្នុងជំនួបនោះ លោក ថោង ខុន បញ្ជាក់ថា ក្រសួងទេសចរណ៍ មិនមានជាប់ពាក់ព័ន្ធរឿងប្រាក់ចំណូលពីការលក់សំបុត្រជូនភ្ញៀវទេសចរចូលទស្សនាប្រាសាទអង្គរវត្តទេ។
រដ្ឋមន្ត្រីក្រសួងទេសចរណ៍ លោក ថោង ខុន បញ្ជាក់ប្រាប់គណៈកម្មការទី៧នៃរដ្ឋសភាថា មិនបានដឹងពីប្រាក់ចំណូលដែលបានពីការលក់សំបុត្រជូនភ្ញៀវទេសចរចូលទស្សនាប្រាសាទអង្គរវត្តទេ គឺខាងអាជ្ញាធរអប្សរា និងក្រសួងសេដ្ឋកិច្ច និងហិរញ្ញវត្ថុ ជាអ្នកគ្រប់គ្រង។
លោកថ្លែងបន្តថា ក្រសួងទេសចរណ៍ គ្រាន់តែបានដឹងពីចំនួនភ្ញៀវទេសចរអន្តរជាតិ ចូលមកទស្សនាប្រាសាទអង្គរវត្ត នៅឆ្នាំ២០១៣ មានចំនួន ៤លាន ២សែននាក់។ ប៉ុន្តែប្រាក់ចំណូលប៉ុន្មាន ហើយបង់ចូលទៅក្រសួងសេដ្ឋកិច្ច និងហិរញ្ញវត្ថុ ប៉ុន្មាន គឺក្រសួងទេសចរណ៍ មិនបានដឹងឡើយ។ លោកថា ថវិកាជាតិ គឺបានពីថ្លៃធ្វើទិដ្ឋាការ ឬវីសា ដែលភ្ញៀវខ្លះបង់តាមក្រសួងទេសចរណ៍ ភ្ញៀវខ្លះបង់តាមក្រសួងមហាផ្ទៃ ភ្ញៀវខ្លះបង់តាមក្រសួងការបរទេស ជាដើម ក្រសួងក៏មិនបានដឹងចំនួនប៉ុន្មានដែរ។ ប៉ុន្តែ ក្រសួងទេសចរណ៍ បានដឹងតែពីចំណូលជាតិទៅលើផ្នែកឯកជន ដូចជា សណ្ឋាគារ ភោជនីយដ្ឋាន សេវាដឹកជញ្ជូន ជាដើម ដែលចំណូលនោះបានចូលទៅដល់ដៃអ្នកដែលធ្វើការងារក្នុងវិស័យទាំងអស់នោះមានជាង ៥០ម៉ឺននាក់ ដែលក្រសួងប៉ាន់ស្មានមានចំនួន ២.៥៤៧លានដុល្លារក្នុង១ឆ្នាំ៖ «រឿងកិច្ចការទាំងអស់នេះបើចង់ដឹងច្បាស់ ខ្ញុំបានសំណូមពរឲ្យគណៈកម្មការទី៧ លោកធ្វើការផ្ទាល់ ឬក៏សាកសួរទៅអាជ្ញាធរអប្សរាតែម្តង»។
ដោយមើលឃើញថា ប្រាក់ចំណូលពីភ្ញៀវទេសចរនៅតែមិនច្បាស់លាស់ ប៉ុន្តែពីមួយឆ្នាំទៅមួយឆ្នាំ ដែលក្រសួងនេះបានទាក់ទាញភ្ញៀវទេសចរចេះតែកើនឡើងមកទស្សនាប្រទេសកម្ពុជា និងមកទស្សនាប្រាសាទបេតិកភណ្ឌជាតិនោះ ប្រធានគណៈកម្មការទី៧នៃរដ្ឋសភា លោក យ៉ែម បុញ្ញឫទ្ធិ បានស្នើសុំឲ្យក្រសួងទេសចរណ៍ ជាអ្នកគ្រប់គ្រងលក់សំបុត្រជូនភ្ញៀវចូលទស្សនាប្រាសាទបុរាណខ្មែរវិញ៖ «ក៏ប៉ុន្តែដែលជាសំណូមពរ ក៏ដូចជាឯកឧត្តមមានប្រសាសន៍ដែរ គឺយើងស្នើសុំឲ្យបន្តការគ្រប់គ្រងអង្គរ ការលក់សំបុត្ររបស់អង្គរហ្នឹង យកមកឲ្យក្រសួងទេសចរណ៍ គ្រប់គ្រងវិញ ពីព្រោះយើងចំណាយលុយទាក់ទាញទេសចរមក មិនគួរណាបណ្តោយឲ្យគេលក់សំបុត្រយកចំណេញទទេៗអ៊ីចឹងទេ។ ដូច្នេះ ដើម្បីឲ្យចំណូលចូលដល់ថវិកាជាតិបានកើនឡើង កាត់បន្ថយភាពក្រីក្រ ដើម្បីប្រមូលថវិកាជាតិឲ្យបានច្រើន យើងស្នើសុំយ៉ាងទទូចឲ្យយកការលក់សំបុត្រចូលមើលអង្គរហ្នឹង មកគ្រប់គ្រងតាមរយៈក្រសួងទេសចរណ៍ វិញ»។
ឆ្លើយតបនឹងសំណើនេះ លោក ថោង ខុន ថ្លែងថា ជាសំណើដែលត្រូវពិគ្រោះយោបល់ច្រើនពីគ្រប់ស្ថាប័ន ដែលលោកមិនអាចផ្តល់ចម្លើយបានទេ។
ភ្ញៀវទេសចរអន្តរជាតិដែលមកទស្សនាប្រាសាទអង្គរវត្ត ត្រូវបង់ប្រាក់ម្នាក់ ២០ដុល្លារ ក្នុងការទស្សនាប្រាសាទពេញមួយថ្ងៃ។
ប្រធានគណៈកម្មការទី៧នៃរដ្ឋសភា លោក យ៉ែម បុញ្ញឫទ្ធិ បានប្រាប់អ្នកសារព័ត៌មានថា នៅថ្ងៃទី២៦ ខែវិច្ឆិកា គណៈកម្មការនេះនឹងអញ្ជើញរដ្ឋមន្ត្រីក្រសួងវប្បធម៌ មកបំភ្លឺអំពីរឿងវប្បធម៌ជាតិបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- ក្រុមកីឡាករមកពីអឺរ៉ុបនឹងបើកការប្រកួតប្រជែងកីឡាផ្សងព្រេងនៅខេត្តសៀមរាប
- សហគមន៍នៅកំពតសង់ផ្ទះសំណាក់ក្បែរព្រៃកោងកាងទាក់ទាញភ្ញៀវទេសចរ
- ភ្ញៀវទេសចរជាង៨ម៉ឺននាក់ទៅកម្សាន្តនៅខេត្តព្រះសីហនុអំឡុងបុណ្យអុំទូក
- ភ្ញៀវទេសចរទៅកម្សាន្តនៅខេត្តរតនគិរីអំឡុងពិធីបុណ្យអុំទូកកើនឡើង
- រដ្ឋមន្ត្រីរំពឹងថាភ្ញៀវទេសចរបរទេសមកកម្ពុជាឆ្នាំនេះជាង៤លាននាក់
- អាជ្ញាធរខេត្តរតនគិរីត្រៀមទទួលភ្ញៀវទេសចរមកកម្សាន្តថ្ងៃឈប់សម្រាកនៃពិធីបុណ្យអុំទូក
- ភ្ញៀវទេសចរត្អូញត្អែរពីសកម្មភាពចោរឆក់និងលួចនៅតាមឆ្នេរខ្លះនាខេត្តព្រះសីហនុ
- អ្នកនៅអារ៉ែងរំពឹងថាភ្ញៀវទេសចរអាចជួយប្រឆាំងគម្រោងសាងសង់ទំនប់វារីអគ្គិសនី
- សមាគមមគ្គុទ្ទេសក៍ទេសចរណ៍ស្នើឲ្យអាជ្ញាធរអប្សរាពង្រឹងកម្លាំងការពារប្រាសាទបុរាណ
ម្យ៉ាងដែរ ក្រសួងទេសចរណ៏ដើរតួជាអ្នកវិនិយោគផ្នែកផ្សព្វផ្សាយទីផ្សារប្រើប្រាស់ថវិការរដ្ឋ តែផលប្រយោជន៍ចំបងបានទៅក្រុមហ៊ុនដែលទទួលសិទ្ធគ្រប់គ្រងប្រាសាទតំបន់ទេសចរ ។
ស្ថាប័នរដ្ឋអោយតែពូកែរកសុីបែបនេះ ច្បាស់ជាខាតចុងខាតដើមអស់ហើយ!
the group of this dictator have no knowledge to lead our nation.in the next election if our people vote for this group again it will be no one GOD will help them. peace for all
រដ្ឋាភិបាលដឹកនាំដោយបុរសខ្វាក់ ខ្វាក់ទាំងអស់
-នាយករដ្ឋមន្ត្រីធ្លាប់បានប្រកាសថា គាត់មិនដែលបានដឹកពីបញ្ហាដីធ្លីសោះឡើយ គាត់មិនដែលដឹងថារាស្ត្រមានបញ្ហាដីធ្លីទេ ទោះបីរាស្រ្តតវ៉ាស្ទើរពេញប្រទេសក៏គាត់អត់ដឹងដែរ គាត់មិនត្រឹមតែខ្វាក់ទេ តែត្រចៀកថ្លង់ទៀត គាត់ដឹងតែខាងព្រូសប៉ុណ្ណោះ
-ឥឡូវរដ្ឋមន្ត្រីទេសចរណ៍ បែរជាថាអត់ដឹងអ្វីទាំងអស់ ចឹងដឹកនាំប្រទេសធ្វើអី បើអត់ដឹងអ្វីទាំងអស់ចឹង បើខ្វាក់ថ្លង់គង់អាចនិយាយគ្នាបាន តែបើធ្វើខ្វាក់ ថ្លង់ ពិតជាពិបាកនិយាយណាស់ រលាយហើយខ្មែរ
រដ្ឋមន្ត្រី ថោង ខុន ជាមនុស្ស អត់ វិញ្ញាណ ឬ បានជាមិនដឹង !