Fri, 21 November 2014
ឃុត សុភចរិយា
ភ្នំពេញប៉ុស្តិ៍
ភ្នំពេញៈ រដ្ឋសភាបានស្នើឲ្យអាជ្ញាធររាជធានីភ្នំពេញ រៀបចំប្រព័ន្ធលូបង្ហូរទឹកឬដាក់ម៉ាស៊ីនបូមទឹកជាប្រចាំ ដើម្បីបញ្ចៀសភាពលិចលង់ដែលកំពុងធ្វើឲ្យប៉ះពាល់ដល់ការរស់នៅរបស់ប្រជាពលរដ្ឋនៅតំបន់ដែលប្រឈមនឹងការលិចលង់ខ្លាំង ជាពិសេសនៅតំបន់បឹងកក់។
តាមសំណើររបស់លោក យឹម សុវណ្ណ និង លោក ហូរ វ៉ាន់ អ្នកតំណាងរាស្រ្ត មណ្ឌលភ្នំពេញ កាលពីថ្ងៃ ទី១៤ ខែវិច្ឆិកា ឆ្នាំ២០១៤ និងចំណាររបស់ប្រធានរដ្ឋសភាជាតិ លោក ហេង សំរិន ចុះថ្ងៃ ទី១៨ ខែវិច្ឆិកា កន្លងទៅថ្មីៗនេះ បានស្នើឲ្យលោក ប៉ា សុជាតិវង្ស អភិបាលរាជធានីភ្នំពេញ ចុះត្រួតពិនិត្យផ្ទាល់ដើម្បីធ្វើលូបង្ហូរទឹក បញ្ចៀសការលិចទឹកដែលកំពុងធ្វើឲ្យប៉ះពាល់ដល់ការរស់នៅរបស់ពលរដ្ឋនិងដើម្បីដោះស្រាយទុក្ខលំបាកពួកគាត់។
លិខិតនោះ ក៏បានសម្ដែងពីក្ដីព្រួយកង្វល់អំពីសុខុមាលភាពនិងសុវត្ថិភាពនៃការស់នៅរបស់ពលរដ្ឋក្នុងសហគមន៍ក្រីក្រផងដែរថា៖ «នៅពេលមានភ្លៀងធ្លាក់មកម្តងៗ ទឹកបានលិចចូលទៅក្នុងផ្ទះ សំរាមនិងលាមកបានអណ្តែតពាសពេញ ព្រមទាំងមានសត្វពស់ ក្អែប ខ្ទួយ វារចូលក្នុងផ្ទះរបស់ពួកគាត់…ពេលខ្លះក៏បានបង្កឲ្យមានការឆ្លងចរន្តអគ្គិសនី ដែលអាចឲ្យមានគ្រោះថ្នាក់ដល់អាយុជីវិតរបស់ប្រជាពលរដ្ឋដែលរស់នៅក្នុងតំបន់ [ទឹកលិច] នេះផងដែរ»។
នៅក្នុងបទសម្ភាសដាច់ដោយឡែកមួយកាលពីម្សិលមិញ លោក យឹម សុវណ្ណ តំណាងរាស្ត្រមកពីគណបក្សសង្គ្រោះជាតិ បានលើកឡើងថា ជាកាតព្វកិច្ច អាជ្ញាធររាជធានីភ្នំពេញ ចាំបាច់ត្រូវតែចុះពិនិត្យនិងដោះស្រាយបញ្ហាទឹកលិចនេះជូនប្រជាពលរដ្ឋ ដោយការជីកកាយរៀបចំបណ្ដាញប្រព័ន្ធលូបង្ហូរទឹក ឬដាក់ម៉ាស៊ីនបូមទឹកនៅកន្លែងដែលគ្មានប្រព័ន្ធលូបង្ហូរ សម្រាប់បូមរំដោះទឹកចេញការពារទឹកលិចផ្ទះនិងផ្លូវធ្វើដំណើររបស់ពលរដ្ឋ។
លោកបានបន្តថា នៅតំបន់ ភូមិខ្វា និង ភូមិសំបូរ សង្កាត់ដង្កោ ខណ្ឌដង្កោ ប្រជាពលរដ្ឋជាច្រើនរយគ្រួសារកំពុងរស់នៅក្នុងសភាពលិចទឹកនៅឡើយ។ ចំណែកនៅតំបន់បឹងកក់ ដែលស្ថិតចំ កណ្ដាលនៃបេះដូងរាជធានីភ្នំពេញវិញ នៅពេលដែលមានភ្លៀងធំម្ដងៗ ទឹកលិចចូលទៅដល់ក្នុងផ្ទះប្រជាពលរដ្ឋ ធ្វើឲ្យស្ទះបង្គន់អនាម័យ ដែលចាំបាច់ត្រូវរៀបចំប្រព័ន្ធលូបង្ហូរទឹកប្រកបដោយស្តង់ដារបច្ចេកទេសឲ្យបានត្រឹមត្រូវជូនប្រជាពលរដ្ឋនៅតំបន់នេះ។
លោកថ្លែងទៀតថា៖ «ឥឡូវនេះក្រសួងធនធានទឹកក៏បានចេញសេចក្ដីជូនដំណឹងថា នៅចន្លោះថៃ្ង ទី២៤-៣០ ខែវិច្ឆិកា ខាងមុខនេះ នឹងមានភ្លៀងធ្លាក់ពីតិចទៅច្រើននៅក្នុងទូទាំងប្រទេស ដូច្នេះបើមិនត្រៀមរៀបចំកាយប្រឡាយប្រព័ន្ធលូបង្ហូរទឹកឬដាក់ម៉ាស៊ីនបូមទឹក ចាំបូមរំដោះទឹកចេញទេនោះ តំបន់ខាងលើទាំងអម្បាលម៉ាននេះ នឹងប្រឈមការលិចលង់ជាថ្មី និងកាន់តែខ្លាំងថែមទៀត»។
ពាក់ព័ន្ធទៅនឹងបញ្ហានេះ លោក ឡុង ឌីម៉ង់ អ្នកនាំពាក្យសាលារាជធានីថ្លែងថា សាលារាជធានីភ្នំពេញទទួលបានលិខិតរបស់រដ្ឋសភានេះហើយ និងកំពុងជំរុញឲ្យមន្ត្រីជំនាញចុះធ្វើការសិក្សាដើម្បីរៀបចំប្រព័ន្ធមេសម្រាប់តភ្ជាប់បណ្ដាញលូបង្ហូរទឹកនៅក្នុងតំបន់ទាំងនោះ។
គួរបញ្ជាក់ថា ដោយសារការតវ៉ាឲ្យមានការរៀបចំធ្វើប្រព័ន្ធលូបង្ហូរទឹក ស្ត្រីបឹងកក់ ៧ នាក់ត្រូវសមត្ថកិច្ចចាប់ខ្លួន កាលពីថ្ងៃ ទី១០ ខែវិច្ឆិកា ដោយចោទប្រកាន់ពីបទបង្កការរាំងស្ទះចរាចរណ៍សាធារណៈនិងត្រូវតុលាការាជធានីភ្នំពេញផ្តន្ទាទោសដាក់ពន្ធនាគាររយៈពេល ១ឆ្នាំ និងពិន័យប្រាក់ ២ លានរៀលក្នុងម្នាក់ៗ៕
ក្រុងភ្នំពេញលិចទឺក ពេលភ្លៀងធំម្ដងៗ មិនមែនជារឿងថ្មីទេ សម័យសង្គមរាស្រ្ដនិយម ក៏លិចដែរ?
ក្រុងភ្នំពេញមានមនុស្សរស់នៅឡើងពី ១ ជា ១០ រីឯសំណង់ថ្មី ពី១ ជា ៥០ ចំណែកប្រព័ន្ធលូ ចាស់គំរិលដដែល
រូចមកគេថែមទាំងលុប បឹងបួថែមទៀត។ លទ្ធផល ឃើញនឹងភ្នែកគ្រប់គ្នា។
ល្មមបញ្ឈប់នយោបាយ ល្អតែមុខ ក្ដិតសុទ្ទតែអាចម៍ ហើយ។ រីល្បិចរមួលផ្សំគ្រេច បន្លំធ្វើចេះក៏ល្មមចប់ដែរ ជាង៣០ឆ្នាំហើយ គួរភ្ញាក់ខ្លួន ដោយខ្លួនឯង កុំចាំបាច់គេធាក់។