Thu, 4 December 2014
ស៊ូ វុទ្ធី
ភ្នំពេញប៉ុស្តិ៍
ភ្នំពេញៈ ចំណងស្នេហ៍ដែលមានតួឯកប្រុសជាអ្នកដឹកនាំសម្តែងនៅផលិតកម្មសាន់ដេ រីឯតួឯកស្រីជាតារាសម្តែងនោះ ទាំងនាង សោភ័ណ្ឌ លីនដា និង លោក ខួល មករា បានសរសេរសារបង្ហោះក្នុងហ្វេសប៊ុកបង្ហាញសាធារណៈ ដោយបរិយាយពីទឹកចិត្តស្នេហ៍ទៅវិញទៅមក ជាមួយការរំឭកថា ចំណងស្នេហ៍ពួកគេបានចាប់ដៃគ្នា មានអាយុកាលមួយឆ្នាំហើយ។
តារាសម្តែងរាងតូចច្រឡឹងមានកំណើតនៅទីរួមខេត្តព្រៃវែង នាង សោភ័ណ្ឌ លីនដា ដែលពេលនេះកំពុងផ្ញើកាយសម្តែងកើបលុយនៅដែនកោះអូស្រ្តាលីនោះ បានសរសេរសារជាពិសេស អមជាមួយវីដេអូ បង្ហាញពីភាពស្និទ្ធស្នាល និងភាពផ្អែមល្ហែមជូនសង្សារនៅលើហ្វេសប៊ុកថា៖«រីករាយខួបមួយឆ្នាំសម្រាប់ស្នេហាយើងពីថ្ងៃទី៣ ខែ១២ ឆ្នាំ២០១៣ ដល់ថ្ងៃទី៣ខែ១២ ឆ្នាំ២០១៤។ វីដេអូ មួយនេះអត់ឡូយទេ តែអូនធ្វើវាអស់ពីចិត្ត អរគុណសម្រាប់ក្តីស្រឡាញ់ណាបង ហើយអរគុណដែលបងថែរក្សាក្តីស្នេហ៍យើង។ សូមឲ្យបងថែរក្សាវាជារៀងរហូតណាបង ស្តាយណាស់ដែលថ្ងៃនេះអូនអត់នៅខ្មែរ បងមករា ខួល ជាទីស្រឡាញ់»។
តបសារដែលម្ចាស់ចិត្តបរិយាយស្នេហ៍ពីដែនកោះអូស្រ្តាលីនោះ លោក មករា បានរ៉ាយរ៉ាប់តបវិញថា៖«រីករាយសម្រាប់ខួបមួយឆ្នាំរបស់ស្នេហាយើង»។ លោក មករា សរសេរតថា៖«បងមិនដឹងថា ហេតុអ្វី បងស្រឡាញ់អូន សោភ័ណ្ឌ លីនដា ប៉ុន្តែបងដឹងថារាល់ថ្ងៃអូនខ្លាចបងដើរចោលអូន ។ បងប្រាប់អូន បងក៏ខ្លាចអូនទៅចោលបងដូចគ្នា ប៉ុន្តែពេលនេះបងចង់ប្រាប់អូនថា បងចង់នៅក្បែរអូន ហើយរស់នៅជាមួយអូន រហូតមកពួកយើងមិនដែលបែកគ្នា។ គិតៗទៅយើងស្គាល់គ្នាបានមួយឆ្នាំហើយ ហើយតាំងពីពេលបងស្គាល់អូនមក បងពិតជាសប្បាយចិត្តណាស់ មានពេលខ្លះបងក៏ធ្វើឲ្យអូនយំ ប៉ុន្តែបងធ្វើនេះមកពីបងស្រឡាញ់អូនពេក»។
លោក មករា បានរៀបរាប់ដូចប្រលោមលោកថា៖«បងដឹងត្រឹមថា គ្រប់ពេលបងនៅក្បែរអូន បងសប្បាយចិត្ត មានពេលខ្លះបងសោកស្តាយ នេះមិនមែនមកពីអូនទេ ក៏មកពីការងារបង និងក្រុមគ្រួសារបងទេ អូនពីពេលនេះទៅ បងសន្យានឹងអូនហើយ សន្យានឹងខ្លួនឯងថា បងនឹងធ្វើវាបាន។ បងស្រឡាញ់អូន ជាទីបញ្ចប់ពួកយើងនឹងនៅជាមួយគ្នាជារៀងរហូត»។
រំឭកថា គូស្នេហ៍អ្នកដឹកនាំសម្តែង និងតារាសម្តែងស្រីមួយគូនេះ ត្រូវបានគេទម្លាយថា ពួកគេថែមទាំងបានរួមរស់ក្រោមដំបូលផ្ទះតែមួយជាមួយគ្នាផង។ ប៉ុន្តែយ៉ាងណាជុំវិញការលើកឡើងនេះ ត្រូវបានស្រីស្រស់តូចច្រឡឹង នាង សោភ័ណ្ឌ លីនដា បានបដិសេធថាមិនមែនជាការពិតដូចគេនិយាយនោះទេ។ ពួកគេបានបញ្ជាក់ថា៖«ពួកយើងស្រឡាញ់គ្នាមែន ប៉ុន្តែមិនធ្វើអ៊ីចឹងទេ»៕