Tue, 9 December 2014
ស៊ូ វុទ្ធី
ភ្នំពេញប៉ុស្តិ៍
ភ្នំពេញៈ ខណៈការងារសិល្បៈ ពិសេសការសម្តែងភាពយន្តភាគចាក់បញ្ចាំងលើកញ្ចក់ទូរទស្សន៍ មិនឃើញមានបង្ហាញកាយវិការសម្តែងសូម្បីមួយរឿង រយៈពេលពីរឆ្នាំចុងក្រោយនេះ ក៏មានការទម្លាយថា អតីត Freshy Girl ចំណាត់ថ្នាក់ លេខ៤ ប្រចាំឆ្នាំ២០០៩ កញ្ញា មាន សូនីតា ត្រូវសង្សារដាក់បម្រាមឲ្យឈប់យករូបសម្ផស្សទៅបណ្តោយឲ្យតួប្រុសប្រឡែងលេង។
ស្រីស្រស់ មាន សូនីតា ទទួលបានការរីកលូតលាស់ខ្លាំងគួរសមលើវិស័យសម្តែងភាពយន្តភាគ ខណៈត្រូវបានអ្នកនិពន្ធ និងដឹកនាំរឿងអ្នកស្រី ពាន់ ភួងបុប្ផា លើកឲ្យឡើងគ្រងតំណែងតួឯករឿងភាគចាក់បញ្ចាំងលើកញ្ចក់ទូរទស្សន៍ CTN ចំនួនពីររឿងជាប់ៗគ្នា ក្នុងរឿង នាយឡប់ជំពប់ស្នេហ៍ និង រឿង អក្សរបេះដូង។
ជាមួយឱកាសដែលកំពុងតែទទួលបានផ្លែផ្កាពីការសម្តែងភាពយន្តភាគនោះ មួយរំពេចក្រោយពីអ្នកនិពន្ធ និងអ្នកដឹកនាំរឿងដែលលើកស្ទួយនាង ដើរចេញពីអាជីពខ្លួន ឱកាសលេចកាយវិការសម្តែងភាពយន្តរបស់ មាន សូនីតា ក៏ស្ងាត់ភ្លាមផងដែរ ដែលនាំឲ្យមានការលើកឡើងថា «សូនីតា អស់អ្នកលើកស្ទួយ»។
បើទោះយ៉ាងណា គេក៏មិនជឿលើភាពស្ងប់ស្ងាត់របស់ស្រីស្រស់រូបនេះទាំងស្រុងថា គ្មានអ្នកហៅថតកុនបន្តនោះទេ ខណៈមជ្ឈដ្ឋានជាច្រើន សុទ្ធតែថា មាន សូនីតា មានសម្រស់ស្រស់ស្អាតណាស់ ហើយការសម្តែងរបស់នាងទៀតសោតក៏មានទេពកោសល្យខ្ពស់ផងដែរ សមអីនាងស្ងាត់បែបនេះ។
ទម្លាយពីភាពស្ងប់ស្ងាត់នេះត្រូវបានផលិតករម្នាក់ដែលអះអាងថា លោកធ្លាប់រងការខកចិត្ត ដោយកញ្ញា មាន សូនីតា បានបង្ហើបថា ក្រុមការងាររបស់លោក ធ្លាប់បានព្យាយាមទំនាក់ទំនង មាន សូនីតា មកសម្តែងភាពយន្ត តែត្រូវនាងបដិសេធមិនទទួល ដោយនាងប្រាប់ថាមិនមានពេលវេលាគ្រប់គ្រាន់សម្រាប់ថត។
ប៉ុន្តែមានប្រភពមួយដែលអះអាងថា ជាអ្នកស្និទ្ធស្នាលនឹងកញ្ញា មាន សូនីតា បានបង្ហើបថា មិនមែនហេតុផលនាងរវល់មិនបានថតនោះទេ នោះគឺនាងមួយរយៈចុងក្រោយនេះ មិនត្រូវបានអនុញ្ញាតឲ្យថតភាពយន្តពីសំណាក់ម្ចាស់ស្នេហ៍នាង។
បន្ថែមលើការបង្ហើបដំណឹងដ៏អាថ៌កំបាំងនេះ ប្រភពដដែលបានប្រាប់ថា មាន សូនីតា ជាប់បម្រាមម្ចាស់ស្នេហ៍នាង គេមិនឲ្យចេញថតត្រូវថ្ងៃត្រូវខ្យល់នោះទេ ពិសេសនោះម្ចាស់ស្នេហ៍ក៏មានការប្រចណ្ឌដែរ មិនចង់ឲ្យនាងយករូបសម្ផស្សដ៏គួរឲ្យខ្នាញ់នោះ ទៅឲ្យតួប្រុសប៉ះពាល់ទេ បើសូម្បីតែ ដឹងថា នោះជាការសម្តែងក៏ដោយ។
យ៉ាងណា ភ្នំពេញ ប៉ុស្តិ៍ មិនអាចសុំការបកស្រាយបំភ្លឺពី កញ្ញា មាន សូនីតា បានទេ ខណៈលេខធ្លាប់ទំនាក់ទំនង មិនអាចទទួលការហៅចូលបាន។ ប៉ុន្តែកាលពីពេលកន្លងមក សូនីតា ធ្លាប់បានប្រាប់ថា នាងមិនមានម្ចាស់ស្នេហ៍ ឬក៏ម្ចាស់ចិត្តទេ បើមាន ក៏នាងមិនលាក់ដែរ»។ ជាមួយគ្នានោះនាងទទួលស្គាល់ថា ធ្លាប់បានប្រកាសផ្អាកការងារសម្តែងភាពយន្តមែន តែមិនមែនឈប់សម្តែងភាពយន្តទូទៅនោះទេ គឺមិនទទួលការសម្តែងភាពយន្តរឿងខ្មោចប៉ុណ្ណោះ ប៉ុន្តែសម្រាប់ភាពយន្តភាគបែបមនោសញ្ចេតនានោះ មិនឈប់ទេ។ មាន សូនីតា ក៏ធ្លាប់លើកឡើងថា មិនមែននាងអស់ខ្នងបង្អែកទេ មកពីនាងដកឃ្លាពីការសម្តែងភាពយន្តមួយរយៈសិន៕