ដោយ យាង សុជាមេត្តា
2015-01-11
RFA
ក្បួនដង្ហែរបស់គណបក្សសង្គ្រោះជាតិ ដែលភាគច្រើនជាយុវជន ហែឡើងលើស្ពានក្បាលថ្នល់ រាជធានីភ្នំពេញ កាលពីថ្ងៃទី១២ ខែកក្កដា ឆ្នាំ២០១៣។ RFA/Mom Sophon
មន្ត្រីគណបក្សសង្គ្រោះជាតិ អះអាងថា គណបក្សប្រឆាំងមួយនេះចង់ឲ្យគណបក្សនយោបាយទាំងអស់មានឱកាសដង្ហែក្បួនឃោសនាបោះឆ្នោត ៣០ថ្ងៃ ដូចដែលមានកំណត់ក្នុងច្បាប់បោះឆ្នោតចាស់។ ការបញ្ជាក់បែបនេះ ដោយសារគណបក្សប្រជាជនកម្ពុជា ចង់ឲ្យមានការហែក្បួនតែ ២ថ្ងៃប៉ុណ្ណោះក្នុងពេលឃោសនាបោះឆ្នោត គឺនៅថ្ងៃដំបូងនិងថ្ងៃបញ្ចប់នៃការឃោសនាបោះឆ្នោត។
ស្របពេលដែលក្រុមការងារចរចាគណបក្សប្រជាជនកម្ពុជា និងគណបក្សសង្គ្រោះជាតិ កំពុងបន្តការចរចាលើសេចក្ដីស្នើសេចក្ដីព្រាងច្បាប់បោះឆ្នោតត្រង់ជំពូកទី៧ ស្ដីពីការឃោសនាបោះឆ្នោតប្រធានក្រុមការងារចរចាគណបក្សសង្គ្រោះជាតិ លោក គួយ ប៊ុនរឿន បញ្ជាក់នៅថ្ងៃទី១១ មករា ថា គណបក្សនយោបាយទាំងអស់គួរតែត្រូវបានផ្ដល់ឱកាស និងជម្រើសក្នុងការប្រើប្រាស់មធ្យោបាយផ្សេងៗដើម្បីឃោសនាបោះឆ្នោត ជាពិសេសគឺមានជម្រើសក្នុងការដង្ហែក្បួនឲ្យគ្រប់ចំនួនថ្ងៃដែលកំណត់ក្នុងច្បាប់សម្រាប់រយៈពេលនៃការឃោសនាបោះឆ្នោត។
ការលើកឡើងរបស់លោក គួយ ប៊ុនរឿន បែបនេះ គឺសំដៅឆ្លើយតបទៅនឹងសំណើរបស់គណបក្សប្រជាជនកម្ពុជា ដែលចង់ឲ្យគណបក្សនយោបាយទាំងអស់ធ្វើការហែក្បួនព្យុហយាត្រា ក្បួនដំណើរដោយក្រុមថ្មើរជើង ឬដោយយានជំនិះ តែនៅក្នុងពេលបើក និងបិទនៃយុទ្ធនាការឃោសបោះឆ្នោតប៉ុណ្ណោះ។
យ៉ាងណាក៏ដោយ លោក គួយ ប៊ុនរឿន បញ្ជាក់ថា ច្បាប់បោះឆ្នោតចាស់របស់កម្ពុជា បានអនុញ្ញាតឲ្យគណបក្សនយោបាយទាំងអស់អាចឃោសនា និងធ្វើការហែក្បួនឃោសនារកសំឡេងឆ្នោតរបស់ខ្លួនរយៈពេលពេញ១ខែឯណោះ។ លោកថា ប្រសិនបើច្បាប់ថ្មីឲ្យគណបក្សនយោបាយហែក្បួនបានតែ ២ថ្ងៃមែននោះ វាប្រៀបដូចជាការបំបិទសិទ្ធិសេរីភាព និងមិនផ្ដល់ឱកាស ឬជម្រើសឲ្យគណបក្សនយោបាយដែលចូលរួមប្រកួតប្រជែងក្នុងការឃោសនារកសំឡេងឆ្នោត។
លោក គួយ ប៊ុនរឿន ថ្លែងថា បើច្បាប់ថ្មីមិនអនុញ្ញាតឲ្យហែក្បួនលើស ៣០ថ្ងៃដូចក្នុងប្រទេសមួយចំនួនផ្សេងនោះទេ វាយ៉ាងហោចណាស់ក៏ឲ្យបាន ៣០ថ្ងៃដូចមានចែងក្នុងច្បាប់ចាស់ដដែល។
លោក គួយ ប៊ុនរឿន ឲ្យដឹងបន្ថែមថា ក្រៅតែពីបញ្ហាកំណត់ចំនួនថ្ងៃហែក្បួនឃោសនាបោះឆ្នោត ក៏នៅមានចំណុចសំខាន់មួយចំនួនផ្សេងទៀតដែលគណបក្សសង្គ្រោះជាតិ ត្រូវពិនិត្យនៅក្នុងសេចក្ដីព្រាងជំពូកទី៧ នៃច្បាប់បោះឆ្នោត។ ក្នុងនោះមានដូចជា ការរឹតត្បិតសិទ្ធិសេរីភាពក្នុងការចូលរួមឃោសនាបោះឆ្នោត ការប្រើប្រាស់អគារ និងទីធ្លាសាធារណៈក្នុងពេលឃោសនា ការប្រើប្រាស់ប្រព័ន្ធផ្សព្វផ្សាយដើម្បីអប់រំពលរដ្ឋអំពីការបោះឆ្នោត ការថែរក្សាសណ្ដាប់ធ្នាប់ក្នុងថ្ងៃបោះឆ្នោត ការប្រើប្រាស់ថវិកាក្នុងពេលបោះឆ្នោត ព្រមទាំងបញ្ហាមួយចំនួនផ្សេងទៀត។
ទាក់ទងនឹងការកំណត់ចំនួនថ្ងៃហែក្បួនក្នុងពេលឃោសនាបោះឆ្នោតតែ២ថ្ងៃនេះ ត្រូវបានប្រធានក្រុមការងារចរចាគណបក្សប្រជាជនកម្ពុជា លោក ប៊ិន ឈិន បញ្ជាក់ប្រាប់អ្នកកាសែតកាលពីថ្ងៃទី៩ មករា នៅរដ្ឋសភាថា គឺក្នុងគោលបំណងទប់ស្កាត់ការកកស្ទះចរាចរណ៍ និងរក្សារបៀបរៀបរយនៅក្នុងសង្គម។
យ៉ាងណាក៏ដោយ លោក គួយ ប៊ុនរឿន អះអាងថា ការអនុញ្ញាតឲ្យគណបក្សនយោបាយហែក្បួនឃោសនារយៈពេល ១ខែ ត្រូវបានអនុវត្តអស់រយៈពេល ៥អាណត្តិកន្លងមកហើយ ហើយក៏ពុំសូវមានការប៉ះពាល់អ្វីធំដុំនោះដែរនៅពេលកន្លងមក។ លោក គួយ ប៊ុនរឿន កត់សម្គាល់ថា ផ្ទុយទៅវិញ ប្រសិនបើគេអនុញ្ញាតឲ្យគណបក្សនយោបាយធ្វើការហែក្បួនឃោសនាតែ ២ថ្ងៃ នៅថ្ងៃបើកនិងបិទនោះ វានឹងរឹតតែធ្វើឲ្យមានការកកស្ទះ និងប៉ះទង្គិចគ្នាកាន់តែខ្លាំងថែមទៀត ព្រោះថា គណបក្សទាំងអស់នឹងចេញហែក្បួនក្នុងថ្ងៃតែមួយជាមួយគ្នា ដោយសារតែពួកគេពុំមានជម្រើស។ ដូច្នេះលោកថា អ្វីដែលអនុវត្តបានល្អកន្លងមកហើយ គេគួរអនុវត្តវាបន្តទៅទៀត។
តាមគម្រោងគណបក្សទាំង២ នឹងជួបគ្នាពិភាក្សាអំពីសេចក្ដីស្នើសេចក្ដីព្រាងច្បាប់បោះឆ្នោតនៅថ្ងៃច័ន្ទ ទី១២ មករា បន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- លោក សម រង្ស៊ី៖ វត្តមានសម្ដេចក្រុមព្រះមិនប៉ះពាល់ប្រជាប្រិយភាពបក្សសង្គ្រោះជាតិ
- អភិបាលក្រុងឡូវែលមកធ្វើទស្សនកិច្ចភ្នំពេញនៅថ្ងៃ១៣ មករា
- គម្រោងសាកល្បងសមត្ថភាពមន្ត្រីចុះឈ្មោះបោះឆ្នោតតាមបែបទំនើបត្រូវបានផ្អាក
- ពលរដ្ឋមួយចំនួននៅព្រៃវែងប្រជុំគ្នារកលទ្ធភាពបង្កើតបក្សនៅតាមមូលដ្ឋាន
- សង្គមស៊ីវិល៖ ការបង្កើតកម្មវិធីជាតិកំណែទម្រង់រដ្ឋបាលសាធារណៈគឺធ្វើបង្គ្រប់កិច្ច
- ប្រធានក្រុមប្រឹក្សាខេត្តរតនគិរីមកពីបក្សប្រជាជនរងការចោទថាជេរប្រមាថមេបក្សប្រឆាំង
- សាលាឧទ្ធរណ៍បដិសេធសំណើសុំនៅក្រៅឃុំរបស់អតីតសង្ឃ៣រូបនៅវត្តស្ទឹងមានជ័យ
- អនុរដ្ឋមន្ត្រីការបរទេសជប៉ុននិងរដ្ឋមន្ត្រីការបរទេសថៃនឹងមកទស្សនកិច្ចកម្ពុជាចំនួន២ថ្ងៃ
- គណបក្សប្រជាជនចង់រឹតបន្តឹងរបៀបឃោសនាបោះឆ្នោតនៅអាណត្តិក្រោយ
ល្បិចរបស់អាខ្វាក់ ហ៊ុន សែន
os jum near ler nek hey
អស់ជំនឿហើយខ្ញំុ
CPP wants to close up mouth of CNRP! CPP is being afraid of political attack by CNRP! Why cpp is so afraid of 30 days political campaigning while it has big money and big media? CPP is afraid of the truth!