ដោយ៖ ឡាយ សាមាន
ថ្ងៃចន្ទ ទី12 មករា 2015
http://vodhotnews.com
មើលរូបភាពបន្ថែម
លោក ហោ ណាំហុង ចុះហត្ថលេខាលើបញ្ជីឈ្មោះអ្នកចូលរួមមរណៈទុក្ខ នៅស្ថានទូតបារាំងប្រចាំកម្ពុជា (រូបថត៖ ឡាយ សាមាន)
មន្ត្រីជាន់ខ្ពស់កម្ពុជានៅថ្ងៃចន្ទនេះ ចូលរួមចែករំលែកទុក្ខករណីបាញ់សម្លាប់អ្នកសារព័ត៌មាននៅទីក្រុងប៉ារីស ប្រទេសបារាំង ដោយចាត់ទុកទង្វើនោះថា ជាការគំរាមកំហែងធ្ងន់ធ្ងរ ទៅលើលទ្ធិប្រជាធិបតេយ្យ និងសេរីភាពសារព័ត៌មាន ។
រដ្ឋមន្ត្រីក្រសួងការបរទេសកម្ពុជា លោក ហោ ណាំហុង ចុះហត្ថលេខាលើបញ្ជីឈ្មោះអ្នកចូលរួមមរណៈទុក្ខ ដែលរៀបចំដោយស្ថានទូតបារាំងប្រចាំកម្ពុជា ។ ប្រមុខការទូតកម្ពុជាចាត់ទុក្ខឃាតកម្មនោះថា ជាការគំរាមកំហែងសិទ្ធិសេរីភាពសារព័ត៌មានយ៉ាងធ្ងន់ធ្ងរ ។
បើតាមលោក ហោ ណាំហុង ការចូលរួមមរណៈទុក្ខនេះដើម្បីសម្តែងនូវការសាមគ្គីភាពរបស់កម្ពុជា ក្នុងប្រឆាំងអំពើឧក្រិដ្ឋកម្មដ៏ព្រៃផ្សៃនេះផងដែរ ។
ភ្លាមៗបន្ទាប់ពីមានឃាតកម្មបាញ់សម្លាប់អ្នកកាសែតនៅបារាំងនោះ លោកនាយករដ្ឋមន្ត្រី ហ៊ុន សែន បានចេញលិខិតចែករំលែកទុក្ខផ្ញើជូននាយករដ្ឋមន្ត្រីបារាំងលោក ម៉ានូអែល វែល (Manuel Valls) ដោយបានលើកឡើងថា លោកមានក្ដីរន្ធត់ និងខឹងសម្បារចំពោះការវាយប្រហារសម្លាប់មនុស្ស ដែលបានកើតឡើងកាលពីថ្ងៃពុធ ទី៧ ខែមករា ឆ្នាំ២០១៥ នោះ ។
ស្នាក់ការសារព័ត៌មានបារាំងហ្សាលីអាប់ដូ (Charlie Hebdo) ជាទស្សនាវដ្តីរូបត្លុក ស្ថិតនៅកណ្តាលក្រុងប៉ារីស ត្រូវបានខ្មាន់កាំភ្លើង២នាក់បាញ់ប្រហារបណ្តាលឲ្យស្លាប់អ្នកកាសែត និងប៉ូលិសចំនួន១២នាក់ និងធ្វើឲ្យមនុស្ស២០នាក់របួស ដែលក្នុងនោះ៤នាក់របួសធ្ងន់ ។
កាលពីឆ្នាំ២០១១ ស្នាក់ការរបស់ទស្សនាវដ្តីនៅក្នុងសង្កាត់ទី២០ ក្នុងទីក្រុងប៉ារីសត្រូវបានដុតបំផ្លាញ ប៉ុន្តែមិនបានបង្កឲ្យមានការបាត់បង់ជីវិតមនុស្សដូចលើកនេះទេ ៕
សូមសរសេរមកលោក ឡាយ សាមាន តាមរយៈ samean@vodhotnews.com
ខំប្រឹងធ្វេីការ ណាស់ ឯកឧត្តម មន្ត្រី បីជំនាន់ ថ្ងៃណាទេីបឡេីងសម្តេច ——-???។
ជាពិសេស ជំនាញ ច្រេីនភាសា ផង រួមទាំង វៀតណាម។
សំនៀង
សរសេរយកបុង