Mon, 12 January 2015
Will Jackson
ភ្នំពេញប៉ុស្តិ៍
ភ្នំពេញ: ពេលថ្ងៃជួបជុំមិត្ដ ពេលរាត្រីក្រេបស្រាក្រឡុកមាននៅភោជនីយដ្ឋាន និងបារ៍ Che Culo ដ៏ថ្មីសន្លាងរបស់ជនជាតិអូស្ដ្រាលីស្ថិតនៅលើផ្លូវលេខ៣០២ដែលផ្ដល់ជូន បរិយាកាសប៉ែកតំបន់សមុទ្រមេឌីទែរ៉ាណេ ជាមួយតន្ត្រីញាក់ហ៊ីបហប។
ជាមួយនឹងដំបូលខ្ពស់ កម្រាលឥដ្ឋការ៉ូរលោងព្រឹល ជញ្ជាំងកោងម៉ូដឥដ្ឋ Che Culo ជាបារ៍ដែលមានម្ចាស់ជនជាតិអូស្ដ្រាលីនៅម្ដុំសង្កាត់បឹងកេងកង១ បម្រើអាហារចម្រើនសុខភាព។ អាហារសមុទ្រមានមុខម្ហូបក្រិក អេស្ប៉ាញ និងអ៊ីតាលី គ្រឿងក្លែមតាប៉ាស (Tapas) ចានតូចនៅពេលរាត្រី និងប៉ាស្ដា ញាំ និងសាន់វិច។
លោក និក ហាត់ទីញ (Nick Hattingh) វ័យ ៣១ ឆ្នាំ ជាអ្នកគ្រប់គ្រង និងជាសហស្ថាបនិកដែលមានបទពិសោធបម្រើការងារផ្នែកឧស្សាហកម្មបដិសណ្ឋារកិច្ចរយៈពេល ១៥ ឆ្នាំនៅប្រទេសអូស្ដ្រាលី ដែលបានសាក់និមិត្តសញ្ញាហាងលើដៃខាងឆ្វេង បានថ្លែងថា៖ «រូបមន្ដមុខម្ហូបទាំងអស់បានមកពីកោះសាន់តូរីនី [ប្រទេសក្រិក] អ៊ីតាលី និងភាគខាងត្បូងអេស្ប៉ាញ តែប្រើគ្រឿងផ្សំនៅក្នុងស្រុកខ្មែរផ្ទាល់តែម្ដង»។
លោកបានបន្ដថា៖ «យើងមិនបាននាំចូលអ្វីទាំងអស់ ហើយអ្វីគ្រប់យ៉ាងគឺជាផលិតផលក្នុងស្រុក។ សូម្បីតែចាន ស្លាបព្រាសេរ៉ាមិក ត្រូវបានយកមកពីខេត្ដសៀមរាប»។
លោក ហាត់ទីញ បានបើកបារ៍នេះតាំងពីដើមខែជាមួយមិត្ដភក្ដិជាតិអូស្ដ្រាលីឈ្មោះ ឡូគី ភៀច អាយុ ៣៤ឆ្នាំ និងលោក ឌេនីញ៉ា ជូរី វ័យ៣៤ឆ្នាំ ជាស្ថាបត្យករសំណង់។ អ្នកទាំង៣បានជ្រើសរើសឈ្មោះ ដែលមានសូរស័ព្ទជាភាសាអ៊ីតាលី។
លោក ហាត់ទីញ បានពន្យល់ថា៖ «ខ្ញុំចង់មានន័យថា យើងអីក៏សំណាងម្ល៉េះដែលយើងអាចមានឱកាសមកបើកបារ៍នៅប្រទេសកម្ពុជាបាន»។
លោកបានបន្ថែមថា ពេល Che Culo បើកទ្វារ មានខ្យល់រំភើយអមដោយតន្ដ្រីញ័រញាក់ និងហ៊ីបហប។ នៅពេលរាត្រីជាវេលាបន្ធូរពន្លឺភ្លើងឲ្យស្រទន់ តែនៅតែត្រជាក់ល្ហឹម។ តារាងមុខម្ហូបទាំងថ្ងៃ និងយប់ ដែលមានទាំងម្ហូបគ្រឿងសមុទ្រ និងស្រាក្រឡុក នឹងមានការផ្លាស់ប្ដូរយ៉ាងតិច១សប្ដាហ៍ម្ដង ប៉ុន្ដែនៅតែតិចត្រឹម៦មុខប៉ុណ្ណោះ។
ខណៈតម្លៃហាក់ដូចជាខ្ពស់ជាងនៅបារ៍ដទៃបន្ដិច ត្រឹម៥ដុល្លារសម្រាប់ស្រាក្រឡុកមួយកែវ និងប្រមាណ ៥ ដុល្លារទៀតសម្រាប់គ្រឿងក្លែមតាប៉ាសមួយចាន ដែលលោកបានអះអាងថា វាមិនចោទជាបញ្ហាសម្រាប់អតិថិជនឡើយ។
លោក ហាត់ទីញ បានបន្ដថា៖ «វាថ្លៃបន្ដិចមែន ប៉ុន្ដែនៅពេលអតិថិជនបានឃើញម្ហូប និងភេសជ្ជៈ ពួកគេហាក់មិនមានការភ្ញាក់ផ្អើលឡើយ។ វាជាផលិតផលមានគុណភាព»។
លោកបានបញ្ជាក់ថា ពីចន្លោះម៉ោង៥ទៅ៧យប់រៀងរាល់ថ្ងៃ សម្រាប់ការកុម្ម៉ង់ «Aphrodite aperitivo» មានការបញ្ចុះតម្លៃលើភេសជ្ជៈស្រាក្រឡុក ស្រាចំហុយ និងស្រាបៀរកម្ពុជា៕