ដោយ៖ ជន ស្រីណុច
ថ្ងៃចន្ទ ទី23 មិនា 2015
http://vodhotnews.com
អគ្គស្នងការនគរបាលជាតិអះអាងថា ខ្លួនចាប់ផ្តើមរិតបន្តឹងសន្តិសុខនៅទីប្រជុំជននានា ជាពិសេស កន្លែងលក់គ្រឿងអលង្ការ និងកន្លែងប្តូរប្រាក់ បន្ទាប់ពីមានករណីប្លន់ និងការកាប់សម្លាប់គ្នានៅតាមទីសាធារណៈ ។
គេហទំព័ររបស់អគ្គស្នងការដ្ឋាននគរបាលជាតិ ផ្សាយកាលពីថ្ងៃទី២២ ខែមីនានេះឲ្យដឹងថា អគ្គស្នងការនគរបាលជាតិ លោក នេត សាវឿន បានបញ្ជារជាបន្ទាន់ដល់កម្លាំងនគរបាលនៅទូទាំងប្រទេស ឲ្យត្រៀមកម្លាំងប្រត្តិបត្តិការប្រចាំ២៤ម៉ោង លើ២៤ម៉ោង នៅគ្រប់ទីផ្សារ ទីប្រជុំជន ជាពិសេសគឺ កន្លែងលក់គ្រឿងអលង្ការ និងប្តូរប្រាក់ដែលអាចនឹងកើតមានអំពើប្លន់ប្រដាប់អាវុធជាយថាហេតុ ។
ប្រធានមជ្ឈមណ្ឌលវប្បធម៌ជាតិ និងសីលធម៌សង្គម លោក ប៉ូ សំណាង មានប្រសាសន៍ថា បើតាមមើលឃើញ ចាប់ពីចូលឆ្នាំ២០១៥មក ភាពអសន្តិសុខនៅក្នុងសង្គមកម្ពុជា កាន់តែកើតឡើងច្រើន ។ លោកបន្តថា បញ្ហានេះមកពីកត្តាមួយចំនួន ដូចជាប្រព័ន្ធតុលាការកាត់ក្តីមិនសូវយុត្តិធម៌ នាំឲ្យជនល្មើសដែលជាអ្នកមានលុយ ឬមានអំណាចនៅតែប្រព្រឹត្តបទល្មើស និងការអនុវត្តច្បាប់របស់សមត្ថកិច្ចនៅមានកម្រិត ។ លោកមានប្រសាសន៍ថា «ភាពសាហាវ យោងឃ្នោង បាត់បង់សីលធម៌ សម្លាប់គ្នាទៅវិញទៅមកសបញ្ជាក់អំពើភាពធ្វើឲ្យប្រជាជនខ្មែររុញសង្គមខ្មែរទៅជាមនុស្សមួយសាហាវ ដោយសារតែប្រព័ន្ធតុលាការ យើងឃើញហើយថា ការកាត់ទោសដោយសារតែ សទៅជាខ្មៅ ខ្មៅទៅជាស ធ្វើឲ្យបញ្ហាអ្នកដែលរងគ្រោះមួយចំនួនដោយសារអ្នកដែលបង្កនោះ អត់ទ្រាំមិនបានរហូតស្ទើរតែមិនពឹងពាក់លើប្រព័ន្ធតុលាការ ហើយក៏ឈានដល់ការបង្កើតបញ្ហាសាហាវ ដែលខ្លួនចង់ធ្វើអ្វីតាមតែអំពើចិត្តលើកំហឹងរបស់ខ្លួន» ។
ប្រធានមជ្ឈមណ្ឌលពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង សម្តែងការសោកស្តាយដែលសង្គមខ្មែរមានតែភាពចម្រូងចម្រាស និងអសន្តិសុខបែបនេះ ។ លោកបន្តថា ជម្លោះកាប់សម្លាប់គ្នាដែលកើតឡើងមិនមែនមានតែប្រជាពលរដ្ឋដែលមិនសូវយល់ដឹងនោះទេ ផ្ទុយទៅវិញសមត្ថកិច្ចមួយចំនួនដែលអ្នកអនុវត្តច្បាប់ក៏បានបង្កភាព អសន្តិសុខ និងប្រើប្រាស់អាវុធបាញ់ប្រហារទៅលើពលរដ្ឋស្លូតត្រង់ក៏មាន ។ លោកថា «សូម្បីតែសមត្ថកិច្ចក៏ហិង្សា ក៏ប្រើអំពើឃោរឃៅ ទៅលើប្រជាពលរដ្ឋដែលជាអ្នកទន់ខ្សោយដូចគ្នា អ៊ីចឹងខ្ញុំថាវា ចំពោះបញ្ហានេះរដ្ឋាភិបាលលែងជាអ្នកមានអំណាចអាជ្ញាធរក្នុងដៃខ្លួន ត្រូវរៀបរយឲ្យបានល្អប្រសើរ ។ រឿងមួយទៀត យើងឃើញថា រូបភាពដែលផ្សាយហិង្សា គឺរូបភាពដែលមានការរួចទោស ហើយរកអ្នកទទួលខុសត្រូវមិនសូវឃើញ ជាពិសេសបើសិនអំពើហ្នឹង ធ្វើដោយសមត្ថកិច្ចវិញ រឹតតែរកមិនឃើញ ឬក៏កូនអ្នកធំអីហ្នឹង» ។
គួរបញ្ជាក់ថា នៅប៉ុន្មានសប្តាហ៍ចុងក្រោយនេះ មានករណីសិស្សសាលាម្នាក់ត្រូវបានល្មើសកាប់ពីក្រោយធ្លាក់ពីលើម៉ូតូស្លាប់ភ្លាមៗ នៅទល់មុខសភាពាណិជ្ជកម្មតាមបណ្ដោយផ្លូវសហព័ន្ធរុស្សី ។ ករណីជនបរទេសបាញ់គ្នាប្រហារគ្នានៅខេត្តព្រះសីហនុ ករណីប្លន់ប្រដាប់អាវុធបានកើតមានផ្ទួនៗ រួមមាននៅផ្សារមួយកន្លែងក្នុងស្រុកស្ទោង ខេត្តកំពង់ធំ នៅខេត្តព្រះសីហនុ និងខេត្តពោធិ៍សាត់ ជាដើម ៕
សូមសរសេរមកកញ្ញា ជន ស្រីណុច តាមរយៈ chorsreynoch@vodhotnews.com
ឮតែពាក្យរិតបន្តឹងៗ តែសកម្មភាពគ្មានឃើញអ្វីគួរឪ្យចាប់អារម្មណ៏សោះ បើចំពោះអ្នកធំ មានអំណាច មានលុយ ឬកូននិងគ្រួសារអ្នកទាំងនោះ ចាប់បានហើយលែងៗ ដូច្នេះមនុស្សគ្មានការរៀងចាល ឯតុលាការគ្មានយុតិធម៍ អំពើរពុករលួយមានគ្រប់ស្ថាប័ន អំពើរពាលាអាវ៉ាសែរ ល្បែងគ្រប់ប្រភេទតាមផ្លូវសាធារណះ ពេស្យាចារកើតដូចផ្សឹតគ្រប់ទីកន្លែង ខេត្តក្រុង ទាំងនេះគែដោយសាររដ្ឋាភិបាលធូររលង់ពេក ឬក៏គ្មានសម្មតភាពក៏អាចថាបាន សូមអស់លោកខាងសម្មត្ថកិច្ចប្រឹងតទៅទៀត ដើម្បីឆ្លុះបញ្ចាំងនូវអ្វីដែលថារឹតបន្តឹតឪ្យមានប្រសិទ្ទភាព ។