ដោយ៖ ឡាយ សាមាន | ថ្ងៃចន្ទ ទី25 ឧសភា 2015
http://vodhotnews.com
ស្តាប់សំឡេង៖ |
ចម្លងទុក |
ក្រសួងពាក់ព័ន្ធចំនួនពីរ នៅថ្ងៃចន្ទនេះបញ្ជាក់ថា មិនទាន់បានទទួលលិខិតរបស់លោក ផៃ ស៊ីផាន ដែលស្នើឲ្យចាត់វិធានការតាមផ្លូវច្បាប់ និងផ្លូវបច្ចេកទេសលើអ្នកលេងហ្វេសប៊ុកមួយចំនួនដែលលោកចាត់ទុកថា បរិហារកេរ្តិ៍ថ្នាក់ដឹកនាំរដ្ឋាភិបាល ។
លិខិតរបស់លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី កាលថ្ងៃទី ២១ ខែឧសភា ឆ្នាំ២០១៥ បានផ្ញើទៅកាន់ក្រសួងក្រសួងមហាផ្ទៃ និងក្រសួងប្រៃសណីយ៍ និងទូរគមនាគមន៍ ដើម្បីឲ្យចាត់វិធានការតាមផ្លូវច្បាប់ និងផ្លូវបច្ចេកទេសលើអ្នកលេងហ្វេសប៊ុកមួយចំនួន ដែលលោកហៅថាជា «ជនអគតិ និងអសីលធម៌» ករណីប្រមាថ និងវាយប្រហារបរិហារកេរ្តិ៍ទៅលើមន្ត្រីរាជការ និងថ្នាក់ដឹកនាំរដ្ឋាភិបាល ។
អ្នកនាំពាក្យក្រសួងមហាផ្ទៃលោក ខៀវ សុភ័គ្រ ប្រាប់ VOD ថា មកដល់ព្រឹកថ្ងៃទី២៥ ខែឧសភានេះ លោកមិនទាន់ទទួលលិខិតនោះទេ ។ តែនៅពេលអ្នកសារព័ត៌មាន VOD សួរថា បើទទួលបានលិខិត តើក្រសួងនឹងចាត់ធានការបែបណា អ្នកនាំពាក្យរូបនេះបញ្ជាក់ថា លោកមិនមែនជាអ្នកសម្រេចនោះទេ ។ លោកថា «ពូមិនមែនសម្រេចឯណាក្មួយ អ្នកនាំពាក្យ មិនមែនអ្នកសម្រេច អរគុណ!» ។
ចំណែកអ្នកនាំពាក្យក្រសួងប្រៃសណីយ៍ និងទូរគមនាគមន៍លោក មាស ប៉ូ ប្រាប់ VOD យ៉ាងខ្លីថា លោកមិនទាន់ទទួលបានលិខិតនោះទេ ខណៈលោកអះអាងថាកុំពុងជាប់ប្រជុំ ។
ករណីនេះ អ្នកវិភាគព្រឹត្តការណ៍សង្គមលោក អ៊ូ វីរៈ យល់ថា លោកទទួលស្គាល់ថាអ្នកលេងហ្វេសប៊ុកមួយចំនួន ពិតជាបានបញ្ចេញមតិហួសព្រំដែនកំណត់ពិតមែន ។ តែលោកថា ប្រសិនបើរដ្ឋាភិបាលចាត់វិធានការលើបញ្ហានេះ គួរអនុវត្តលើគ្រប់បុគ្គលទាំងអស់ មិនមែនធ្វើឡើងចំពោះតែអ្នករិះគន់មន្ត្រីរដ្ឋាភិបាលប៉ុណ្ណោះទេ ពោលការពារគ្រប់បុគ្គលស្មើៗគ្នាដែលរងការជេប្រមាថ ។ លោកថា «ប៉ុន្តែទោះបីយ៉ាងម៉េចក៏ដោយ ខ្ញុំទទួលស្គាល់ថា មានកម្រិតក្នុងសេរីភាពបញ្ចេញមតិហ្នឹង គួរតែមានកម្រិតផងដែរ ហើយបើមានបុគ្គលមួយចំនួនគាត់ប្រើសិទ្ធិសេរីភាពបញ្ចេញមតិគាត់លើសកម្រិតហ្នឹង គួរទទួលទោសដូចគ្នា ។ កន្លែងហ្នឹងមួយតាមពិតគួរទទួលទោសខ្លះដែរ ហើយខ្ញុំសូមស្វាគមន៍បើសិនមានការស៊ើបអង្កេតពិតប្រាកដ ដើម្បីឆន្ទៈក្នុងការការពារកិត្តិយសបុគ្គល មិនមែនត្រឹមតែរដ្ឋាភិបាល ឬប្រមុខរដ្ឋ ត្រូវការពារបុគ្គលគ្រប់ៗរូបស្មើសិទ្ធិគ្នា ខ្ញុំស្វាគមន៍» ។
បែបនេះក្តីលោក អ៊ូ វីរៈ បន្ថែមថា ជាទូទៅក្នុងពិភពលោក គេឲ្យសិទ្ធិសេរីភាពបញ្ចេញមតិធំជាងកិត្តិយសឯកជន ។ តែបើតាមអ្នកវិភាគរូបនេះ រាល់ការបញ្ចេញមតិលក្ខណៈបែបរិះគន់ទូទៅ និងរិះគន់បែបស្ថាបនាពួកគេមិនត្រូវបានដាក់ទោសនោះទេ ទាល់តែបុគ្គលនោះរិះគន់បែបជេប្រមាថ និងពាក្យអសុរោះ ។
VOD មិនអាចសុំការអត្ថាធីប្បាយបន្ថែមពីលោក ផៃ ស៊ីផាន ជាម្ចាស់លិខិតនោះបាននៅឡើយទេ ដោយទូរសព្ទចូលគ្មានអ្នកទទួល ។ ប៉ុន្តែលិខិតរបស់លោកបានលើកឡើងថាក្នុងរយៈពេលថ្មីៗនេះ លោកបានសង្កេតឃើញជនមួយចំនួនប្រើប្រាស់ប្រព័ន្ធសង្គម ដោយប្រើពាក្យអសុរោះ ប្រមាថមាក់ងាយ បំផ្លើស(អក្សរ និងរូបភាព) និងវាយបរិហារកេរ្តិ៍ដល់មន្ត្រីរាជការដែលជាថ្នាក់ដឹកនាំមួយចំនួន ។ លោកបន្តថាពាក្យទាំងនោះមានចែងនៅក្នុងក្រមព្រហ្មទណ្ឌកម្ពុជា និងមានទម្ងន់ទោសជាធរមានស្រាប់ ៕
សូមសរសេរមកលោក ឡាយ សាមាន តាមរយៈ samean@vodhotnews.com