ដោយ៖ ឡាយ សាមាន | ថ្ងៃចន្ទ ទី25 ឧសភា 2015
http://vodhotnews.com
ពលរដ្ឋចង្អុលបង្ហាញពីកន្លែងដែលអាជ្ញាធរវៀតមាន បាញ់ថ្នាំបំផ្លាញដំណាំរបស់ពួកគេ កាលពីខែមេសាកន្លងមក (រូបថត៖ ឡាយ សាមាន)
ពលរដ្ឋដែលរស់នៅភូមិជើង ឃុំជាំ ស្រុកមេមត់ ខេត្តត្បូងឃ្មុំ អាះអាងថា អាជ្ញាធរវៀតណាមបានចុះមកហាមឃាត់ និងជាន់ដំណាំស្រូវជាថ្មី នៅពេលពួកគេចុះដកស្មៅនៅក្បែរគុម្ពស្រូវដែលនៅសេសសល់ពីការបាញ់ថ្មាំពុលបំផ្លាញដំណាំកសិករខ្មែរ ពីសំណាក់អាជ្ញាធរវៀតណាមកាលពីខែមេសា ។
ពលរដ្ឋមា្នក់ដែលឋិតនៅក្នុងហេតុការណ៍នោះ អ្នកស្រី ញៀន សុខន មានផ្ទៃដីដាំដំណាំទំហំ៣ហិកតា នៅលើដីមានជម្លោះប្រាប់ VOD ថាកាលពីថ្ងៃទី២៣ ខែឧសភា វេលាម៉ោងប្រមាណ៨ព្រឹក នៅពេលបងស្រីរបស់ខ្លួនចុះបោចស្មៅនៅក្បែរគុម្ពស្រូវ ស្រាប់តែអាជ្ញាធរវៀតណាមមានគ្នា៣នាក់ បានមកហាមឃាត់ឈានដល់មានការប្រតាយប្រតប់គ្នា ។ អ្នកស្រីបន្តថា គ្រានោះគាត់ក៏បានទៅជួយបងស្រីរបស់ខ្លួន និងទាមទារសម្ភារមកវិញដូចជាកាំបិតដែលអាជ្ញាវៀតណាមដកហូតនាពេលនោះ ។
បើតាមការអះអាងរបស់អ្នកស្រី ញៀន សុខន វៀតណាមមិនត្រឹមតែហាមឃាត់មិនឲ្យគាត់ចុះទៅតំបន់ដាំដំណាំនោះទេ ថែមទាំងជាន់ដំណាំស្រូវរបស់គាត់ដែលនៅសេសសល់ពីការបាញ់ថ្មាំពុលរបស់អាជ្ញាធរវៀតណាមកន្លងមកផងដែរ ។ យ៉ាងណាក៏ដោយ ពលរដ្ឋរូបនេះអះអាងថា គាត់នឹងទៅធ្វើដំណាំនៅលើដីនោះដដែល ព្រោះគាត់ពុំមានដីបង្កបង្កើនផលក្រៅពីដីមានជម្លោះនោះទេ ។
VOD មិនអាចសុំការអត្ថាធិប្បាយពីអភិបាលស្រុកមេមត់ លោក ចេង ប៊ុនណារ៉ា បាននៅឡើយទេដោយទូរសព្ទចូលគ្មានអ្នកទទួល ។
ទាក់ទងនឹងបញ្ហានេះ ប្រធានសហព័ន្ធនិស្សិតបញ្ញវ័ន្តកម្ពុជាលោក ម៉ៅ ពិសេស បង្ហាញការសោកស្តាយ និងថ្កោលទោសទង្វើរបស់អាជ្ញាធរវៀតណាមដែលបានមកហាមឃាត់កសិករខ្មែរទៅតំបន់នោះជាថ្មី ។ យ៉ាងណាក៏ដោយលោកអំពាវនាវដល់រដ្ឋាភិបាល យកចិត្តទុកដាក់លើបញ្ហានេះ និងដោះស្រាយឲ្យបានឆាប់រហ័ស និងមានប្រសិទ្ធភាព ។
លោក ម៉ៅ ពិសេស សង្កត់ធ្ងន់ថា ទង្វើរបស់វៀតណាមនាពេលនេះ បង្ហាញឲ្យឃើញកាន់តែច្បាស់ថា វៀតណាមកំពុងឈ្លានពានទឹកដីកម្ពុជា ។ ជាងនេះទៅទៀតលោក អះអាងថា តាមលក្ខណៈភូមិសាស្ត្រ និងការចុះពិនិត្យផ្ទាល់ ដីនៅតំបន់នោះពិតជារបស់ខ្មែរពិតមែន ។
គួរបញ្ជាក់ថា កាលពីថ្ងៃទី១៩ ខែមេសា ឆ្នាំ២០១៥កន្លងទៅ អាជ្ញាធរវៀតណាមបានដឹកនាំពលរដ្ឋរបស់ខ្លួនចុះបាញ់ថ្នាំពុល បំផ្លាញដំណាំកសិករខ្មែរម្តងរួចមកហើយ នៅភូមិជើង ឃុំជា ស្រុកមេមត់ ខេត្តត្បូងឃ្មុំ ។ ការបាញ់ថ្នាំពុលនេះ ធ្វើឲ្យពលរដ្ឋដែលរងផលប៉ះពាល់ធ្ងន់ធ្ងរមាន៩គ្រួសារ និង៣២គ្រួសារប៉ះពាល់តិចតួចក្នុងចំណោមប្រជាពលសរុបប្រមាណ១១០គ្រួសារ ៕
សូមសរសេរមកលោក ឡាយ សាមាន តាមរយៈ samean@vodhotnews.com
ប្រជាជនកម្ពុជាទាំងមូលត្រូវដឹងនៅពេលទៅបោៈឆ្នោត,បើយើងចង់ក្ររហាម,លំបាកវេទនាបន្តទៀត,ត្រូវជ្រើសរើសអ្នកថ្មីអាចអោយជីវភាពយើងរីកចំរើន,ធូរធារ,មានបាន,កុំរើសអ្នកដដែលៗ,ច្រំដែលៗ,ក្រមួយជីវិត,,,,,,,,,,,។
នៅក្នុងប្រទេសកម្ពុជាយើងសព្វថ្ងៃ្,គេមិនសូវអោយយើងហ៊ានបញ្ចេញមតិយោបល់ច្រើនទេ,គេបំបិទសិទ្ឋិសេរីភាពយើងគ្រប់យ៉ាង,,,,,វាស្រដៀងនឹងសម័យប៉ុលពតដែរ,ដែលមានពាក្យស្លោករបស់ប៉ុលពតថាៈ ” លាក់ការបានខ្ពស់,រស់បានយូរ “,,,។ អ្នកណាហ៊ានបញ្ចេញមតិយោបល់នឹងត្រូវចាប់ដាក់គុក,បាញ់សម្លាប់,,,,,,ជាដើម។ល។។។។។។