ដោយ៖ វង្ស សុម៉ាលីន | ថ្ងៃអង្គារ ទី2 មិថុនា 2015
http://vodhotnews.com
រូបផ្ដល់ដោយកញ្ញា ឈីវ វណ្ណសិកា កូនស្រីរបស់អ្នកស្រី ដួង តារាវលក្ខណ៍
ខុសពីតារាសិល្បៈមួយចំនួនដែលប្រើប្រជាប្រិយភាពអំពាវនាវកៀរគររកជំនួយក្នុងពេលធ្លាក់ខ្លួនឈឺធ្ងន់ ឬពេលមានតម្រូវការខ្វះខាតក្នុងជីវភាពធ្ងន់ធ្ងរ អ្នកស្រី ដួង តារាវលក្ខណ៍ មិនត្រូវបានក្រុមគ្រួសារអនុញ្ញាតឲ្យលើកដៃសុំជំនួយបែបហ្នឹងនោះទេ ។ អ្នកស្រីត្រូវបានក្រុមគ្រួសារប្រឹងប្រែងព្យាបាលរហូតដល់ដំណាក់កាលចុងក្រោយ ស្ទើរមិនមានមហាជន និងតារាសិល្បៈដឹងឮ ។
អ្នកស្រី លុក សារឹម ម្ដាយបង្កើតរបស់អ្នកស្រី ដួង តារាវលក្ខណ៍ បានថ្លែងប្រាប់ថា ក្នុងពេលជំងឺមហារីករបស់កូនស្រីធ្វើទុក្ខធ្ងន់ តម្រូវការចាំបាច់បានបង្ខំឲ្យអ្នកស្រី និងក្រុមគ្រួសារប្រឈមនឹងការលំបាកហួសពីការស្មាន។ ប៉ុន្តែអ្នកស្រីមិនត្រឹមតែមិនទុកឲ្យកូនស្រីស្លាប់តាមសភាពជំងឺប៉ុណ្ណោះទេ គឺថែមទាំងប្រឹងពុះពារបញ្ជូនទៅវះកាត់អស់រាប់ពាន់ដុល្លារ ដើម្បីពន្យារជីវិត ។ អ្នកស្រីមិនព្រមឲ្យកូនស្រីប្រើមធ្យោបាយបង្ហោះជាវីដេអូឃ្លីបលើកដៃសំពះសុំការអាណិតអាសូរដើម្បីរកជំនួយដូចតារាដែលមានទុក្ខធ្ងន់ផ្សេងទៀតនោះទេ បើទោះជាស្ថានភាពគ្រួសារស្ថិតក្នុងការលំបាករឿងថ្លៃព្យាបាលក្ដី ។
ម្ដាយបង្កើតរបស់តារាសម្ដែង ដួង តារាវលក្ខណ៍ រូបនេះ មានប្រសាសន៍ថា «ក្នុងពេលកូនឈឺ ទាំងខ្ញុំទាំងក្រុមគ្រួសារអស់ហ្មងអូន ព្រោះជំងឺហ្នឹងវាចំណាយច្រើន ប៉ុន្តែខ្ញុំអត់ឲ្យកូនលើកដៃសំពះសុំជំនួយពីណាទេ ទោះជាលោក សុះ ម៉ាច គាត់ថាឲ្យយើងធ្វើអញ្ចឹងទៅ គាត់ជួយផ្សព្វផ្សាយ ក៏ខ្ញុំអត់ដាច់ចិត្តឲ្យកូនធ្វើដែរ អាណិតកូន ម្យ៉ាងគ្នាកើតជំងឺអញ្ចឹង តើឲ្យគ្នាទៅថតវីដេអូឃ្លីបប្រកូកប្រកាសប្រាប់គេឯងអញ្ចឹងកើតទេ ខ្ញុំធ្វើមិនរួច ទើបសម្ងំលំបាកតែឯងរហូតដល់គាត់ស្លាប់»។
អ្នកស្រី លុក សារឹម ប្រាប់ថា បើមានការអាណិតអាសូរ ហើយមានការផ្ដល់ជំនួយគឺជារឿងមិនសូវចោទទេ ប៉ុន្តែបើបានត្រឹមតែបើកកកាយពីស្ថានភាពរបស់កូនស្រីទៅកាន់មហាជន នោះជារឿងមិនសូវល្អស្ដាប់ឡើយ ចំពោះជំងឺមហារីកស្បូន ។ ម្យ៉ាងវានឹងបណ្ដាលឲ្យប៉ះពាល់សតិអារម្មណ៍របស់អ្នកជំងឺជាកូនស្រីនោះផង ទើបអ្នកស្រីមិនព្រមទម្លាយពីការខ្វះខាតនាពេលនោះ ដើម្បីឲ្យមានការជួយសង្គ្រោះណាមួយពីសប្បុរសជន ក្នុងពេលដែលកូនស្រីក៏ជាតារាមានគេស្គាល់ច្រើន ។ អ្នកស្រីប្រាប់ថា ត្រឹមតែរយៈពេលមួយខែក្រោយការវះកាត់ដុំសាច់មហារីកប៉ុណ្ណោះ ទើបអ្នកស្រី ដួង តារាវលក្ខណ៍ ត្រូវបានក្រុមគ្រួសារទម្លាយឲ្យដឹងពីស្ថានភាពជំងឺដែលបានកើតឡើង ។
អ្នកស្រី ដួង តារាវលក្ខណ៍ ត្រូវក្រុមគ្រួសារសម្រួលអារម្មណ៍រហូតដល់មានស្មារតីនឹងន៎ ដើម្បីឲ្យអ្នកស្រីអាចទទួលយកការពិតពីជំងឺមហារីកស្បូនហ្នឹង ។ អ្នកស្រី លុក សារឹម បន្តថា «ពីដំបូងយើងអត់ចង់ឲ្យកូនដឹងពីជំងឺហ្នឹងទេ ប៉ុន្តែមួយខែក្រោយវះកាត់រួចយើងប្រាប់គាត់ ពន្យល់គាត់ ហើយព្យាយាមសម្រួលអារម្មណ៍គាត់ គាត់ក៏ទទួលយកបាន គាត់យំសុំទោសពួកយើង ដែលគាត់មានជំងឺអញ្ចឹង ប៉ុន្តែយើងព្យាយាមពន្យល់គាត់កុំឲ្យគាត់ពិបាកចិត្ត ទាំងរឿងថ្លៃព្យាបាល ទាំងរឿងកូនស្រីរបស់គាត់ គឺយើងលើកទឹកចិត្តគាត់រហូត សូម្បីតែពេលដែលយើងដឹងថាស្ថានភាពជំងឺគាត់ឈានដល់ដំណាក់កាលពិបាកទៅហើយ ក៏យើងនៅតែហៅពេទ្យមកព្យាបាលគាត់រហូត គឺធ្វើរហូតទាល់តែដល់ដំណាក់កាលចុងក្រោយហ្នឹងតែម្ដង»។
អ្នកស្រី លុក សារឹម ប្រាប់ថា ស្ថានភាពគ្រួសារមិនមែនជាអ្នកមាននោះទេ ហើយក៏មិនមែនជាអ្នកធូរធារនោះដែរ ប៉ុន្តែសម្រាប់តម្រូវដែលមិនអាចខ្វះបាន គឺក្រុមគ្រួសារមានតែប្រឹងដុតដៃដុតជើងគ្រប់គ្នា ចាប់តាំងពីអ្នកស្រី ដួង តារាវលក្ខណ៍ ត្រូវក្រុមគ្រូពេទ្យរកឃើញថា មានជំងឺដុំសាច់មហារីកក្នុងស្បូន ។ អ្នកស្រីមានប្រសាសន៍ថា «បើនិយាយរឿងខ្វះគឺយើងខ្វះអូន ប៉ុន្តែដាច់ខាតខ្ញុំមិនឲ្យកូនទៅលើកដៃសំពះសុំលុយក្នុងពេលពួកយើងត្រូវការវះកាត់គាត់ និងពេលដែលកូនឈឺធ្ងន់កើតទេ លោក សុះ ម៉ាច និងអ្នកផ្សេងទៀត ចង់ឲ្យយើងធ្វើអញ្ចឹង ដើម្បីបានលុយជួយខ្លះ ប៉ុន្តែខ្ញុំប្រាប់វិញថា អត់ឲ្យកូនធ្វើទេ អាណិតកូនណាស់ ជាក់ស្ដែងសូម្បីតែខ្ញុំចុះផ្សាយពីរឿងកូនហ្នឹង ក៏ខ្ញុំអត់ត្រូវការអីពីការចុះផ្សាយហ្នឹងដែរ(ជំនួយ) ព្រោះគ្រួសារខ្ញុំអាចរ៉ាប់រងបាន» ។
គួរបញ្ជាក់ផងដែរថា អ្នកស្រី ដួង តារាវលក្ខណ៍ បានលាចាកលោកដោយសារជំងឺមហារីកស្បួន កាលពីថ្ងៃសុក្រ ទី២៨ ខែឧសភា ហើយពិធីបុណ្យ៧ថ្ងៃនឹងត្រូវប្រារព្ធនៅថ្ងៃពុធទី៣ ខែមិថុនានេះ ៕
អត្ថបទទាក់ទង៖ ដួង តារាវលក្ខណ៍ ជីវិតក្ដុកក្ដួល មុនថ្ងៃចែកឋាន
សូមសរសេរមកលោក វង្ស សុម៉ាលីន តាមរយៈ vongsomalin@yahoo.com
១. ខ្មែរយើងខ្វះការយកចិត្តទុកដាក់គ្នាទៅវិញទៅមក!! ខ្មែរយើងខ្វះការសាមគ្គី!!!
២. ខ្ញុំនិយាយរឿង២ ក្នុងចំណោមមន្រ្តីរាជការខ្មែរយើង៖
ក. រឿងទី១៖ លោកមេម្នាក់ចូលចិត្ត បន្តិចធ្វើខួបកំណើតអោយកូន បន្តិចអោយប្រពន្ធ បន្តិចអោយខ្លួនឯង បន្តិចបុណ្យចំរើនម្តាយ បន្តិចកឋិន បន្តិចបុណ្្យផ្កា…… កូនចៅក្រោមបង្គាប់វក់វីនិងទៅតាមការអញ្ជើញរបស់មេ ខែខ្លះសឹងដាច់បាយខ្លួនឯង!!! មិនទៅមិនកើត មេហើយ ខ្លាចមេមើលមិនឃើញ!! ស្រាប់តែថ្ងៃមួយ លោកមេនោះស្លាប់ដោយជំងឺផឹកច្រើន!!! ម្តាយអើយគ្មានកូនចៅណាម្នាក់ទៅចូលរួមបុណ្យសពសោះ!! អើបើវា ងាប់ហើយ ទៅយកចិត្តវាចុះនរកធ្វើស្អី??
ខ៖ រឿងទី២៖ គឺមានស្រ្តីម្នាក់ បានបំរើការងាររដ្ឋនិងបក្សប្រជាជនចំនួន៣០ឆ្នាំ!! ដល់ពេលចូលនិវត្ត ស្រាប់តែស្រ្តីនោះរត់ទៅរកមេបក្សប្រជាជនស្ថាប័ននោះនិងជារដ្ឋលេខាធិការផងដែរ ជួយដើម្បីអាចក្លាយជាជំនួយការ ពីព្រោះខ្លួនជាស្រ្តីមេមាយ គ្មានសល់អ្វីទេ!! តើលោកអ្នកដឹងទេ ថាតើមេបក្សប្រជាជននិងជារដ្ឋលេខាធិការនោះនិយាយថាម៉េច?? ម្តាយអើយ ឯកឧត្តមនោះនិយាយថា៖ បើដល់អាយុចូលនិវត្តហើយ ម្តេចមិនទៅផ្ទះទៅ នៅធ្វើអីទៀត!! ស្រ្តីនោះបានចេញពីបន្ទប់ ស្រក់ទឹកភ្នែកបណ្តើរ!! តើអ្នកដឹងទេថា ស្រ្តីនោះគិតអីនៅក្នុងចិត្ត?
៣. សង្គមបក្ខពួកនិងគ្រួសារនិយម គឺគេមិនអោយតម្លៃអ្នកដទៃ ក្រៅពីក្រុមខ្លួននោះទេ!!!