ដោយ៖ ទូច សុខា | ថ្ងៃសុក្រ ទី10 កក្កដា 2015
http://vodhotnews.com
លោកនាយករដ្ឋមន្ត្រី ហ៊ុន សែន ចូលរួមពិសារអាហារស្រាយបួសជាមួយខ្មែរឥស្លាមនៅវិហារអាល់សារកាលភ្នំពេញកាលពីថ្ងៃល្ងាចពុធ (រូបពីហ្វេសប៊ុក)
រដ្ឋាភិបាលកម្ពុជាបានសម្រេចអនុញ្ញាតឲ្យប្រជាពលរដ្ឋខ្មែរឥស្លាមអាចពាក់កាតឹប ឬទទូរក្បាលបាននៅពេលពួកគាត់ថតរូបសម្រាប់ធ្វើលិខិតឆ្លងដែន អត្តសញ្ញាណប័ណ្ណ ឬថតរូបសម្រាប់ឯកសាររដ្ឋបាលផ្សេងៗបាន បើសិនជាពួកគាត់ចង់ធ្វើដូច្នេះ។
លិខិតចុះថ្ងៃទី២៩ ខែមិថុនា ឆ្នាំ២០១៥ ទីស្តីការគណៈរដ្ឋមន្ត្រីផ្ញើជូនរដ្ឋមន្ត្រីក្រសួងមហាផ្ទៃ រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ចាងហ្វាងគណៈដឹកនាំជាន់ខ្ពស់នៃសានាឥស្លាមកម្ពុជា និងប្រធានអង្គការមូលនិធិអភិវឌ្ឍន៍មុស្លីមកម្ពុជា ថាគណៈរដ្ឋមន្ត្រីសម្រេចអនុញ្ញាតឲ្យប្រជាពលរដ្ឋខ្មែរឥស្លាម បុរសអាចពាក់កាតឹប និងស្ត្រីអាចទទូរក្បាលបាននៅពេលធ្វើលិខិតឆ្លងដែន អត្តសញ្ញាណប័ណ្ណ ឬថតរូបធ្វើឯកសាររដ្ឋបាលផ្សេងៗ។ សេចក្តីសម្រេចនោះបានប្រគល់តួនាទីអនុវត្តកិច្ចការនេះទៅក្រសួងមហាផ្ទៃ និងក្រសួងការបរទេស និងសហប្រតិបត្តិការអន្តរជាតិ។
ចំណែកលិខិតដាច់ដោយឡែកមួយទៀតចុះថ្ងៃទី២៩ ខែមិថុនា ឆ្នាំ២០១៥ដូចគ្នា ផ្ញើជូនក្រសូងអប់រំ យុវជន និងកីឡា ក្រសួងសេដ្ឋកិច្ច និងហិរញ្ញវត្ថុ និងក្រសួងមុខងារសាធារណៈ ថារដ្ឋាភិបាលបានសម្រេចបញ្ចូលគ្រូបង្រៀនខ្មែរឥស្លាមប្រមាណ១៥០០នាក់ចូលទៅក្នុងក្របខណ្ឌគ្រូបង្រៀនរបស់ក្រសួងអប់រំ យុវជន និងកីឡា។ លិខិតឲ្យដឹងថា សេចក្តីសម្រេចនេះនឹងត្រូវអនុវត្តចាប់ពីខែសីហា ឆ្នាំ២០១៥ តទៅ។
លិខិតដដែលនោះបានបង្គាប់ឲ្យក្រសួងសេដ្ឋកិច្ច និងហិរញ្ញវត្ថុ និងក្រសួងមុខងារសាធារណៈចូលរួមសហការជាមួយក្រសួងអប់រំ យុវជន និងកីឡា ឲ្យបានល្អ៕
សូមសរសេរមកកាន់លោក ទូច សុខា តាមរយៈ sokha@vodhotnews.com