ដោយ៖​ ឈុន វួ​ចលាង​ | ថ្ងៃអង្គារ ទី21 កក្កដា 2015, 04:48 PM​
http://vodhotnews.com

សមាគម​គ្រូបង្រៀន​កម្ពុជា​ឯករាជ្យ (CITA) ស្នើ​ឲ្យ​រដ្ឋមន្ត្រី​ក្រសួង​អប់រំ​អន្តរាគមន៍​ចំពោះ​ករណី​ប្រាក់​ម៉ោង​បន្ថែម និងប្រាក់​បង្រៀន​នៅ​ថ្ងៃ​ព្រហស្បតិ៍ ដល់​គ្រូ​បង្រៀន​នៅ​ខេត្ត​ដាច់ស្រយាល​។​

​លិខិត​របស់​សមាគម​គ្រូបង្រៀន​កម្ពុជា​ឯករាជ្យ ផ្ញើជូន​លោក ហង់ ជួន​ណារ៉ុន រដ្ឋមន្ដ្រី​ក្រសួង​អប់រំ យុវជន និង​កីឡា នៅ​ថ្ងៃ​ទី​២០ ខែកក្កដាលើកឡើងថា នៅ​ខេត្ត​ព្រះវិហារ​មាន​ករណី​ពីរ​ផ្សេង​គ្នា​គឺ​ប្រាក់​ម៉ោង​បន្ថែម និងប្រាក់​ថ្ងៃ​ព្រហស្បតិ៍ ដែល​មិន​ទាន់​បាន​បើក​។​

​លិខិត​បន្តទៀតថា ករណី​ប្រាក់​ម៉ោង​បន្ថែម​នៅ​វិទ្យាល័យគូលែន ក្នុង​ខេត្ត​ព្រះវិហារ គ្រូ​បង្រៀន​បាន​លើកឡើង​ថា រយៈពេល​មួយ​ឆ្នាំ​ហើយ​ដែល​ពួកគេ​មិន​ទាន់​បាន​ទទួល​ប្រាក់​ម៉ោង​បន្ថែម ហើយ​ពេលនេះ​ទើប​លោក​នាយក​វិទ្យាល័យ​ប្រាប់ថា វិទ្យាល័យ​នេះ​ពុំ​មាន​និយាម​ទេ​។​ ប៉ុន្តែ​ក្រុម​គ្រូបង្រៀន​បន្ទោស​ចំពោះ​ការគ្រប់គ្រង​របស់​លោក​នាយក ថា​ពុំ​មាន​ការទទួលខុសត្រូវ​លើ​បុគ្គលិក​។​

​លិខិត​របស់​សមាគម​គ្រូបង្រៀន​កម្ពុជា​ឯករាជ្យបាន​បន្ថែម ករណី​មួយ​ផ្សេងទៀត គឺ​នៅ​គ្រប់​សាលាបឋមសិក្សា​ទូទាំង​ខេត្ត​ព្រះវិហារ គ្រូ​បង្រៀន​មិន​ទាន់​បាន​ទទួល​ប្រាក់​បង្រៀន​ថ្ងៃ​ព្រហស្បតិ៍​រយៈពេល​៣​ត្រីមាស​មកហើយ ដោយ​មិន​ដឹង​មូលហេតុ​។​

​វី​អូ​ឌី​(VOD)​មិនអាច​សុំ​ការ​អត្ថាធិប្បាយ​ពី​លោក រស់ សា​លីន អ្នកនាំពាក្យ​ក្រសួង​អប់រំ​យុវជន និង​កីឡា បាន​នៅឡើយ​ទេ ដោយ​ទូរស័ព្ទ​ចូល​តែ​ពុំ​មាន​អ្នកទទួល៕​

សូមសរសេរមកកញ្ញា ឈុន វួ​ចលាង​ តាមរយៈ chhun.vouchleang@yahoo.com