ដោយ៖ ញឹម សុខន | ថ្ងៃពុធ ទី22 កក្កដា 2015, 05:44 PM
http://vodhotnews.com
ស្តាប់សំឡេង៖ |
ចម្លងទុក |
លោក ធន់ សារាយ ប្រធានសមាគមការពារសិទ្ធិមនុស្សអាដហុក (រូបថត៖ ញឹម សុខន)
សមាគមការពារសិទ្ធិមនុស្សក្នុងស្រុកមួយ ជំរុញឲ្យមេដឹកនាំកំពូល ពង្រឹងប្រសិទ្ធភាពនៃវប្បធម៌សន្ទនា ដើម្បីជួយរកយុត្តិធម៌ ដល់ជនរងគ្រោះក្នុងជម្លោះដីធ្លី ខណៈខ្លួនរកឃើញថា ការអនុវត្តច្បាប់បច្ចុប្បន្ន មានស្តង់ដារពីរ រវាងពលរដ្ឋក្រីក្រនិងមន្ត្រីអ្នកមានអំណាច។
ការជំរុញរបស់សង្គមស៊ីវិលនេះ ធ្វើឡើងក្នុងសន្និសីទសារព័ត៌មានមួយ នៅស្នាក់ការកណ្តាលរបស់សមាគមនេះ ក្នុងរាជធានីភ្នំពេញនាថ្ងៃពុធនេះ ក្រោមប្រធានបទ “ដីរបស់អ្នកណា”។
ប្រធានសមាគមការពារសិទ្ធិមនុស្សអាដហុក លោក ធន់ សារាយ លើកឡើងថា ការអនុវត្តច្បាប់បច្ចុប្បន្ននេះ ធ្វើឡើងខុសគ្នាដាច់ស្រះរវាងពលរដ្ឋក្រីក្រ និងអ្នកមាន ខ្នងបង្អែកជាមន្ត្រីជាន់ខ្ពស់របស់រដ្ឋាភិបាល ឬអ្នកមានងារជាឧកញ៉ា។
លោក ធន់ សារាយ ឲ្យដឹងទៀតថា អ្នកដែលមានខ្នងបង្អែក មិនសូវទទួលទោសទេ បើទោះជារកឃើញថា អ្នកមានអំណាច និងឧកញ៉ាទាំងនោះចូលរួមយ៉ាងជ្រៅ ក្នុងរឿងបណ្តេញពលរដ្ឋចេញ ក្នុងជម្លោះដីធ្លីក៏ដោយ។
មន្ត្រីសង្គមស៊ីវិលរូបនោះ ជំរុញឲ្យលោកនាយករដ្ឋមន្ត្រី ហ៊ុន សែន និងលោក សម រង្ស៊ី ត្រូវពង្រឹងវប្បធម៌សន្ទនានេះ ទៅជួយដោះស្រាយទុក្ខវេទនារបស់សកម្មជនដីធ្លី ដែលកំពុងជាប់ពន្ធនាគារ ដោយសារអំណាចព្រះរាជអាជអាជ្ញា និងចៅក្រមខ្លះ ដែលលោកថា មិនបានបំពេញវិជ្ជាជីវៈ ធ្វើឲ្យពលរដ្ឋទាំងពីរភេទស្នើភាពគ្នាចំពោះមុខច្បាប់។
កន្លងទៅសមាគមការពារសិទ្ធិមនុស្សអាដហុក ធ្លាប់ប្តឹងមន្ត្រីតុលាការពីររូបនៅខេត្តសៀមរាប ដោយចោទថា បានបញ្ជាឲ្យឃុំខ្លួនអ្នកមានជម្លោះដីធ្លីនៅខេត្តនេះ ដំណើរការខុសនីតិវិធីច្បាប់។ ប៉ុន្តែសមាគមនេះ អះអាងថា មកដល់ពេលនេះ តុលាការមិនបានកោះហៅចៅក្រម និងព្រះរាជអាជ្ញា ដែលលោកប្តឹងនោះទេ តែលោកថា តុលាការបែរជាចាត់ការលើមន្ត្រីអាដហុក ដែលប្តឹងមន្ត្រីតុលាការនោះទៅវិញ។
អគ្គលេខាធិការឧត្តមក្រុមប្រឹក្សានៃអង្គចៅក្រម លោក សំ ប្រជាមានិត សុំមិនធ្វើអត្ថាធិប្បាយ ដោយលោកអះអាងថា កំពុងជាប់រវល់។ អ្នកនាំពាក្យក្រសួងយុត្តិធម៌លោក គឹម សន្តិភាព អះអាងថា បើអាដហុក មានភស្តុតាងពាក់ព័ន្ធនឹងភាពមិនប្រក្រតីនេះ ក្រសួងនឹងពិចារណាតាមផ្លូវច្បាប់។ លោកថា ចំណែកឯពាក្យបណ្តឹងរបស់អាដហុកដែលប្តឹងមន្ត្រីតុលាការនៅខេត្តសៀមរាបនោះ លោកថាក្រសួងកំពុងពិនិត្យ។
ទាំងលោកនាយករដ្ឋមន្ត្រី ហ៊ុន សែន ទាំងលោក សម រង្ស៊ី ធ្លាប់អះអាងថា មានតែវប្បធម៌សន្ទនាទេ ដែលធ្វើពលរដ្ឋគ្រប់និន្នាការ អាចរស់នៅមានសេចក្តីសុខជាគ្រួសារខ្មែរតែមួយបាន និងឈានទៅដោះស្រាយបញ្ហាជាតិធំៗបាន។ ប៉ុន្តែមកដល់បច្ចុប្បន្ននេះ ជម្លោះដីធ្លីនៅតែបន្តផ្ទុះឡើង។
របាយការណ៍របស់អាដហុកបង្ហាញថា គិតត្រឹម៦ខែឆ្នាំ២០១៥នេះ ឲ្យដឹងថា សកម្មជនដីធ្លីចំនួន១៨នាក់ត្រូវបានចោទប្រកាន់ ខណៈឆ្នាំ២០១៤មានសកម្មជនដីធ្លី១២១នាក់ត្រូវបានចាប់ឃុំខ្លួន។
បើតាមលោក ធន់ សារាយ សកម្មជនសិទ្ធិមនុស្សនិងដីធ្លី នឹងត្រូវចាប់ឃុំខ្លួនច្រើនជាងនេះបន្ថែមទៀត នៅពេលច្បាប់គ្រប់គ្រងអង្គការដ៏ចម្រូវចម្រាស់ចូលជាធរមាន បើតុលាការនៅតែមិនឯករាជ្យ៕
សូមសរសេរមកលោក ញឹម សុខន តាមរយៈ sokhorn@vodhotnews.com