ដោយ អ៊ុំ រង្សី
2015-07-22
RFA
ស្ដាប់ ឬ ទាញយកសំឡេង
នគរបាលនាំសកម្មជនគណបក្សសង្គ្រោះជាតិ លោក អ៊ុក ពេជ្រសំណាង ចេញពីបន្ទប់សវនាការសាលាដំបូងរាជធានីភ្នំពេញ ដើម្បីបញ្ជូនទៅដាក់ឃុំនៅពន្ធនាគារព្រៃស កាលពីថ្ងៃទី២១ កក្កដា ឆ្នាំ២០១៥។ RFA/Morm Moniroth
ការកាត់ទោសសកម្មជនគណបក្សប្រឆាំងទាំង ១១នាក់ ឲ្យជាប់ពន្ធនាគាររបស់សាលាដំបូងរាជធានីភ្នំពេញ ទទួលរងការរិះគន់ខ្លាំងៗ និងថ្កោលទោសជាបន្តបន្ទាប់ ទាំងមជ្ឈដ្ឋានជាតិ និងអន្តរជាតិ។ ពួកគេលើកឡើងថា រដ្ឋាភិបាលកំពុងតែប្រើប្រព័ន្ធតុលាការធ្វើជាឈ្នាន់ដើម្បីបំភ័យគណបក្សសង្គ្រោះជាតិ។ បណ្ដាមជ្ឈដ្ឋានទាំងនោះក៏បានអំពាវនាវកុំឲ្យតុលាការក្លាយជាឧបករណ៍នយោបាយ និងទាមទារឲ្យដោះលែងសកម្មជនបក្សប្រឆាំងទាំង ១១រូបនោះមកវិញជាបន្ទាន់។
ទាំងសង្គមស៊ីវិលជាតិ និងអន្តរជាតិ ព្រមទាំងបក្សប្រឆាំងចោទប្រកាន់ចំពោះការចាប់ឃុំខ្លួនសកម្មជនបក្សប្រឆាំងដាក់ពន្ធនាគារកាលពីថ្ងៃទី២១ ខែកក្កដា ថាគ្មានមូលដ្ឋានត្រឹមត្រូវ និងជារឿងនយោបាយសុទ្ធសាធ។
ការរិះគន់ និងថ្កោលទោសជាបន្តបន្ទាប់របស់សង្គមស៊ីវិលជាតិ និងអន្តរជាតិ ព្រមទាំងបក្សប្រឆាំងនៅពេលនេះ ធ្វើឡើងបន្ទាប់ពីសាលាដំបូងរាជធានីភ្នំពេញ សម្រេចកាត់ទោសសកម្មជនគណបក្សសង្គ្រោះជាតិទាំង ១១រូប ឲ្យជាប់ពន្ធនាគារពី ៧ ដល់ ២០ឆ្នាំ ពីបទជាប់ពាក់ព័ន្ធនឹងការធ្វើកុប្បកម្មដែលនាំឲ្យកើតអំពើហិង្សានៅស្ពាននាគ កាលពីឆ្នាំ២០១៤ កន្លងទៅ។
គណបក្សសង្គ្រោះជាតិ បានចេញសេចក្ដីថ្លែងការណ៍ក្រោយការចាប់ខ្លួនសកម្មជនរបស់ខ្លួនមួយថ្ងៃ ដែលចេញផ្សាយនៅថ្ងៃទី២២ កក្កដា ចាត់ទុកថា រដ្ឋាភិបាលកំពុងតែធ្វើឲ្យមានភាពតានតឹងខាងនយោបាយឡើងវិញ និងជាការអនុវត្តផ្ទុយទៅនឹងស្មារតីកិច្ចព្រមព្រៀងនយោបាយកាលពីថ្ងៃទី២២ ខែកក្កដា ឆ្នាំ២០១៤ កន្លងទៅ ដែលគណបក្សទាំងពីរមានអាសនៈក្នុងរដ្ឋសភាបានព្យាយាមជំរុញឲ្យកម្ពុជា ឈានទៅបញ្ចប់ភាពចម្រូងចម្រាសខាងនយោបាយនោះ។
សេចក្ដីថ្លែងការណ៍នោះក៏បានបញ្ជាក់ថា នៅថ្ងៃទី២២ ខែកក្កដា នេះគឺជាខួប ១ឆ្នាំនៃកិច្ចព្រមព្រៀងនយោបាយរវាងគណបក្សប្រជាជនកម្ពុជា និងគណបក្សសង្គ្រោះជាតិ ដើម្បីដោះស្រាយបញ្ហាផ្សេងៗ។ ជាងនេះទៀត គណបក្សសង្គ្រោះជាតិ កំពុងបន្តព្យាយាមគោរពស្មារតីនៃកិច្ចព្រមព្រៀងនយោបាយប្រកបដោយសុឆន្ទៈ ដើម្បីសហការគ្នាជាមួយនឹងគណបក្សប្រជាជនកម្ពុជា ក្នុងការស្វែងរកដំណោះស្រាយបញ្ហានានាជាប្រយោជន៍ជាតិ។
ទន្ទឹមនឹងសេចក្ដីថ្លែងការណ៍របស់គណបក្សប្រឆាំងនៅថ្ងៃទី២២ ខែកក្កដា នេះដែរ អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ក៏បានចេញសេចក្ដីថ្លែងការណ៍ជំរុញឲ្យតុលាការខ្មែរដោះលែងសកម្មជនគណបក្សប្រឆាំងទាំង ១១រូបដោយគ្មានលក្ខខណ្ឌ។ យូមែន រ៉ៃត៍ វ៉ច្ឆ ចាត់ទុកការសម្រេចរបស់តុលាការនៅពេលនេះ ថាជារឿងអយុត្តិធម៌ ព្រោះសកម្មជនគណបក្សប្រឆាំង ១១រូបនោះ មិនបានញុះញង់ ឬចូលរួមក្នុងការប្រើហិង្សាលើកម្លាំងសន្តិសុខកាលពីថ្ងៃទី១៥ ខែកក្កដា ឆ្នាំ២០១៤ នោះឡើយ។ ជាងនេះទៀត ការផ្ដន្ទាទោសរបស់តុលាការគ្រាន់តែជារឿងនយោបាយប៉ុណ្ណោះ។
នាយកអង្គការឃ្លាំមើលសិទ្ធិមនុស្សអន្តរជាតិប្រចាំតំបន់អាស៊ី លោក ប្រ៊ែដ អាដាម (Brad Adams) មានប្រសាសន៍នៅក្នុងសេចក្ដីថ្លែងការណ៍នេះថា ការផ្ដន្ទាទោសសកម្មជនបក្សប្រឆាំង គឺបង្ហាញឲ្យឃើញច្បាស់ថា ការសន្យារបស់លោកនាយករដ្ឋមន្ត្រី ហ៊ុន សែន ក្នុងការប្រើប្រាស់វប្បធម៌សន្ទនាជំនួសការប្រឈមមុខដាក់គ្នា គឺគ្មានន័យនោះទេ។ លើសពីនេះ លោក ប្រ៊ែដ អាដាម ថា លោក ហ៊ុន សែន នឹងធ្វើអ្វីៗគ្រប់យ៉ាងដើម្បីរក្សាអំណាចរបស់លោក។
លើសពីនេះទៀត មន្ត្រីការពារសិទ្ធិមនុស្សអន្តរជាតិរូបនេះ កត់សម្គាល់ដែរថា ការកាត់ទោសលើសកម្មជនបក្សប្រឆាំង និងការបង្កើតច្បាប់រឹតបន្តឹងលើអង្គការមិនមែនរដ្ឋាភិបាល គឺជាការបង្ហាញនូវការគាបសង្កត់របស់លោក ហ៊ុន សែន លើក្រុមមនុស្សដែលប្រឆាំងទៅនឹងរបបដឹកនាំរបស់លោក។
ទាក់ទងនឹងការរិះគន់លើការចាប់ខ្លួនសកម្មជនបក្សប្រឆាំងទាំង ១១រូបនេះដែរ នៅក្នុងសេចក្ដីថ្លែងការណ៍របស់អង្គការសិទ្ធិមនុស្សលីកាដូ (Licadho) ក៏បានចាត់ទុកថា ការសម្រេចភ្លាមៗរបស់តុលាការបានបង្ហាញយ៉ាងច្បាស់ថា សវនាការនេះគ្រាន់តែជាការសម្ដែង និងគិតជាមុន បង្កើតឡើងដើម្បីគំរាមកំហែងគណបក្សសង្គ្រោះជាតិ បន្ទាប់ពីព្រឹត្តិការណ៍នៅខេត្តស្វាយរៀងកាលពីចុងសប្ដាហ៍មុន ដែលមនុស្សពីរនាក់ក្នុងចំណោមមនុស្សទាំងបីនាក់ដែលត្រូវបានផ្ដន្ទាទោសដាក់ពន្ធនាគារ មានវត្តមាននៅក្នុងព្រឹត្តិការណ៍នៅព្រំដែនខេត្តស្វាយរៀង។
ទាក់ទងបញ្ហានេះ អ្នកសម្របសម្រួលបច្ចេកទេសស៊ើបអង្កេតនៃអង្គការលីកាដូ លោក អំ សំអាត បានបង្ហាញនៅក្នុងសេចក្ដីថ្លែងការណ៍នោះដែរថា ការផ្ដន្ទាទោសដ៏អយុត្តិធម៌លើសកម្មជនបក្សប្រឆាំង ធ្វើឡើងបន្ទាប់ពីការធ្វើពហិការរបស់តំណាងរាស្ត្រគណបក្សសង្គ្រោះជាតិ ទាំង ៥៥នាក់ កាលពីសប្ដាហ៍មុននៅក្នុងអង្គប្រជុំវិសាមញ្ញដែលបានស្នើឡើងដោយគណបក្សកាន់អំណាច ដើម្បីធ្វើការអនុម័តលើសេចក្ដីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាល។
ជាងនេះទៀត ទាំងមជ្ឈដ្ឋានជាតិ ទាំងអន្តរជាតិ និងបក្សប្រឆាំង ក៏អំពាវនាវកុំឲ្យរដ្ឋាភិបាលយកតុលាការធ្វើឧបករណ៍នយោបាយ ហើយនិងស្នើទៅតុលាការត្រូវតែដោះលែងសកម្មជនទាំង ១១រូបនោះ ដោយគ្មានលក្ខខណ្ឌ។
ឆ្លើយតបលើការរិះគន់ទាំងនេះ អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ី ផាន បានប្រតិកម្មលើសេចក្ដីថ្លែងការណ៍របស់សង្គមស៊ីវិល និងបក្សប្រឆាំង នៅថ្ងៃទី២២ ខែកក្កដា លោកចាត់ទុកថា ជារឿងដែលគួរឲ្យអាម៉ាស់ និងជាការប្រមាថមួយមកលើរដ្ឋាភិបាលកម្ពុជា។ លោកស្នើឲ្យសង្គមស៊ីវិលទាំងនោះពិចារណាឡើងវិញ ព្រោះថា តុលាការគឺជាស្ថាប័នឯករាជ្យ មិនពាក់ព័ន្ធនយោបាយនោះទេ៖ «ការចាប់ និងដាក់ពន្ធនាគារលើសកម្មជនរបស់គណបក្សសង្គ្រោះជាតិ លើកនេះ គឺជាឆន្ទានុសិទ្ធិរបស់ចៅក្រម និងជាអំណាចផ្តាច់មុខរបស់តុលាការ មិនមានអំណាចណាមួយរារាំងបានឡើយ ចឹងហើយខ្ញុំសូមឲ្យអង្គការក្រៅរដ្ឋាភិបាលទាំងហ្នឹង ត្រូវតែពិចារណាចំណុចនេះឡើងវិញ»។
ចំណែកអ្នកនាំពាក្យក្រសួងយុត្តិធម៌ លោក គឹម សន្តិភាព បានប្រាប់សារព័ត៌មាននៅក្នុងស្រុកថា សេចក្ដីសម្រេចផ្ដន្ទាទោសរបស់តុលាការ គឺបានបង្ហាញយ៉ាងច្បាស់ថា ប្រព័ន្ធតុលាការកម្ពុជា មានអំណាចឯករាជ្យពិតប្រាកដ មិនពាក់ព័ន្ធនឹងរឿងនយោបាយ បើទោះបច្ចុប្បន្ននេះមានវប្បធម៌សន្ទនារបស់ថ្នាក់ដឹកនាំគណបក្សនយោបាយទាំងពីរក៏ដោយ ហើយកិច្ចការនយោបាយ គឺត្រូវដោះស្រាយដោយនយោបាយ រីឯសំណុំរឿងព្រហ្មទណ្ឌគឺត្រូវតែដោះស្រាយតាមផ្លូវច្បាប់ ដែលមានស្ថាប័នឯករាជ្យ គឺតុលាការជាអ្នកសម្រេច។
សកម្មជនគណបក្សសង្គ្រោះជាតិ លោក មាជ សុវណ្ណារ៉ា និងសកម្មជន ២នាក់ទៀត ត្រូវបានតុលាការចោទពីបទចូលរួម និងដឹកនាំចលនាកុបកម្ម ហើយត្រូវបានតុលាការសម្រេចផ្ដន្ទាទោសឲ្យជាប់ពន្ធនាគារចំនួន ២០ឆ្នាំ។ ឯសកម្មជន ៨នាក់ទៀត ក្នុងនោះមានលោក អ៊ុក ពេជ្រសំណាង និងសកម្មជន ៧នាក់ផ្សេងទៀត ត្រូវបានចោទប្រកាន់ពីបទចូលរួមក្នុងចលនាកុបកម្ម ហើយផ្ដន្ទាទោសដាក់ពន្ធនាគារចំនួន ៧ឆ្នាំ។ ទោះជាយ៉ាងណា អ្នកទាំងនោះត្រូវបានតុលាការបញ្ជូនទៅកាន់ពន្ធនាគារម១ ភ្លាមៗបន្ទាប់ពីផ្ដន្ទាទោសរួច។
យ៉ាងណាក៏គណបក្សសង្គ្រោះជាតិ បានអះអាងថា នឹងបន្តវប្បធម៌សន្ទនាដើម្បីដោះស្រាយនូវបញ្ហារបស់ប្រទេសជាតិ និងប្រជាពលរដ្ឋខ្មែរ ជាពិសេសនឹងបញ្ចប់នូវភាពតានតឹងនយោបាយ រួមទាំងសហការគ្នាធ្វើឲ្យមានការដោះលែងសកម្មជនគណបក្សសង្គ្រោះជាតិទាំង ១១រូបនេះឲ្យមានសេរីភាពឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- ព្រឹទ្ធសមាជិកពីបក្សប្រឆាំងពហិការមិនចូលរួមពិនិត្យនិងផ្ដល់យោបល់លើច្បាប់អង្គការ
- អង្គការនិងសហគមន៍នៅតាមខេត្តមួយចំនួនទាមទារឲ្យព្រឹទ្ធសភាទម្លាក់ចោលច្បាប់អង្គការ
- លីកាដូខេត្តកំពង់ធំនិងពលរដ្ឋខេត្តត្បូងឃ្មុំធ្វើយុទ្ធនាការប្រឆាំងច្បាប់អង្គការសមាគម
- សង្គមស៊ីវិល៨ស្ថាប័នស្នើឲ្យគ.ជ.បផ្ដល់ឲ្យមានការចូលរួមពីស្ត្រីលើដំណើរការបោះឆ្នោត
- នារីដែលចោទថាអធិការស្រុកនៅកំពង់ឆ្នាំងចាប់រំលោភរកអន្តរាគមន៍ពីអង្គការសិទ្ធិមនុស្ស
- តំណាងពលរដ្ឋមានទំនាស់ដីធ្លីនៅឃុំបឹងប្រាំ៥នាក់ចូលបំភ្លឺនៅតុលាការ
- តុលាការផ្ដន្ទាទោសសកម្មជននិងមន្ត្រីបក្សសង្គ្រោះជាតិ១១នាក់ពី៧-២០ឆ្នាំ
- មេធាវីបរទេសគ្រោងដាក់ភស្តុតាងបន្ថែមជុំវិញបណ្ដឹងប្រឆាំងរដ្ឋាភិបាលលោក ហ៊ុន សែន
- តំណាងរាស្ត្របក្សទាំងពីរនៅខេត្តបាត់ដំបងជំរុញឲ្យអាជ្ញាធរមូលដ្ឋានរក្សាវប្បធម៌សន្ទនា
រិះគន់យ៉ាងណាក៏មិនអាចជួយពួកគាត់បាន នយោបាយរបស់គេគឺត្រូវធ្វើយ៉ាងនេះ តបស្នងទៅនឹង
គណបក្សសង្គ្រោះជាតិដែលបានបុករុកគណបក្សប្រជាជនឡើងរង្គើរទប់លែងចង់ជាប់ សូមកុំរាថយ
មួយជំហាននេះអ្នកបានពន្ទុរច្រើនណាស់ បើអ្នកថយក្រោយឈាមអ្នកលះបង់ លះបង់ឥតប្រយោជន៍
ហើយ
Everyone know very well, it is a political issue. To all the 11 conscioused prisoners, you sacrify will be remember by million Cambodian people. You have to be strong, because many people in this country need people like you all to motivate them to stand up against injustice in this country.
នាក់មានទោសឧក្រិត្តត្រូវតែទទួលទោស រឿងនេះបានកើត១ឆ្នាំមកហើយ ទោះបីនាយ ខា នាយ សុី ទាំងពីររួមទាំងបក្សប្រឆាំងខំយំឡាំបា៉ស្រែកតវា៉ឬក៏រកឡេះស្អីមកនិយាយគឹទៅលែងកើតហើយ ពួកអង្គការសិទ្រិតអោះនេះខំនាំចេញមករិះគន់យូៗទៅចង់ឲពួកមានទោសឧក្រិត្តរួចខ្លួន ចំណែកអាម្សៀ ប្រ៊ែដ នរគអវជ័យ អាដាម វិញលើកយករឿងម៉ែវាស្អីមក បើប្រទេសអាគាំងវានូវប្រកាន់ពូជសាសន៍នូវឡើយអាមេរិកស្បែកសរសម្លាប់ អាគាំងសប្បែកខ្មៅ ជាពិសេសគឹប៉ូលីសស្បែកសរនិងតែម្តង ដូចសិងតែរាល់ថ្ងៃម្តេចខ្លួនវាជាអាមេរិកស្បែកសរហើយក៏ជាប្រធានអង្គការសិទ្ធមនុស្សនូវប្រទេសខ្លួនស្រាបម្តេចក៏មិហា៊នអើតក្បាលចេញមុខតវា៉និងរដ្ឋាភិបាលអាមេរិកផង មកពីមិនហា៊នៗបានតែប្រទេសតូចៗដូចប្រទេសខ្មែរ ?
សារជាតិ វៀតណាម វា ពូកែ អាចធ្វើអោយខ្មែរ ធ្វើបាប សម្លាប់ ខ្មែរ ខ្លួនអែង ដោយមិនដឹងខ្លួន រួច
យកទឹកដីខ្មែរ បានជាបន្តបន្ទាប់ យ៉ាងស្រួល ដោយនយោបាយ ច្រេះស៊ីដែក ដោយ ជោគជ័យ !
ជាការពិតវាមិនអាចដល់ថ្នាក់នេះទេបើប្រៀបធៀបទៅនិងអំពើអ្នកមួយចំនួនដូចជា
ឈូក បណ្ឌិត ថោង សារ៉ាត់ ។ល។ ???????????????????
អោយគេឈ្នះទៅអ្នកមាន អ្នកមានលុយមានអំណាចសុទ្ធតែជាគ្នាគេទាំងអស់ សូម្បីតែជីវ កេង ប្រធាន
តុលាការកំពូលក៏គ្នាគេដែរ ប្រជារាស្រ្តក្រីក្រយកអ្វីទៅតតាំងជាមួយគេ រាស្រ្តមានតែសង្ឃឹមសន្លឹកឆ្នោត
នៅអាណត្តិក្រោយតែប៉ុណ្ណោះ ហើយប្រសិនបើឈ្នះក៏មិនសង្ឃឹមថាគេព្រមដែរ តែបើពួកមិនបោះឆ្នោត
ទេ មេចអាចនឹងបង្ហាញពីធាតុពិតរបស់រដ្ឋាភិបាលសព្វថ្ងៃនេះទៅ
Traitor hun sen jailed 11 national activist for admire his boss at Hanoi, going forward hun sen
have to build more prison for keeping nationalist as not only 11person but also million person will resist for khmer territorail integrity.