ដោយ៖ ទូច សុខា | ថ្ងៃពុធ ទី12 សីហា 2015, 05:28 PM
http://vodhotnews.com
ក្រុមប្រឹក្សាធម្មនុញ្ញសម្រេចថាសេចក្តីព្រាងច្បាប់ស្តីពីសមាគមនិងអង្គការមិនមែនរដ្ឋាភិបាលដែលរដ្ឋសភាបានអនុម័តនិងព្រឹទ្ធបានពិនិត្យនិងឯកភាពទាំងស្រុងកាលពីពេលកន្លងមកនោះ គឺស្របតាមរដ្ឋធម្មនុញ្ញ ទោះបីជាមានការមិនគាំទ្រពីគណបក្សសង្រ្គោះជាតិនិងសង្គមស៊ីវិលមួយចំនួនក៏ដោយ។
នៅរសៀលថ្ងៃពុធនេះ ក្រុមប្រឹក្សាធម្មនុញ្ញបានប្រជុំពេញអង្គនិងសម្រេចថាសេចក្តីព្រាងច្បាប់នេះស្របទៅតាមរដ្ឋធម្មនុញ្ញកម្ពុជា។ សេចក្តីសម្រេចនេះធ្វើឡើងបន្ទាប់ពីសមាជិកក្រុមប្រឹក្សាធម្មនុញ្ញបានស្តាប់របស់តំណាងរដ្ឋាភិបាលកាលពីថ្ងៃអង្គារនិងស្តាប់មតិជំទាស់របស់តំណាងរាស្រ្តគណបក្សប្រឆាំង លោក សុន ឆ័យ កាលពីព្រឹកមិញ។
សេចក្តីសម្រេចរបស់ក្រុមប្រឹក្សាធម្មនុញ្ញក៏បញ្ជាក់ដែរថាការសម្រេចស្ថាពរនេះបិទផ្លូវតវ៉ា ហើយមានអនុភាពអនុវត្តទៅលើអំណាចទាំងអស់ដែលមានចែងរដ្ឋធម្មនុញ្ញនិងត្រូវចុះផ្សាយក្នុងរាជកិច្ច។
អ្នកនាំពាក្យក្រុមប្រឹក្សាធម្មនុញ្ញ លោក ព្រហ្ម ញាណវិចិត្រ មានប្រសាសន៍ក្រោយពីការចេញសេចក្តីសម្រេចនេះថាសមាជិកក្រុមប្រឹក្សាធម្មនុញ្ញមិនត្រូវអនុញ្ញាតឲ្យមានការបកស្រាយអ្វីទាក់ទងនឹងសេចក្តីសម្រេចនេះទេ។ លោកថាសេចក្តីសម្រេចនេះជាការសម្រេចរួមរបស់សមាជិកទាំង៩រូប។ លោកបន្ថែមថា ៖ “តាមគោលការណ៍ខ្ញុំជម្រាបក្មួយអ៊ីចេះ កាលណាសេចក្តីសម្រេចចេញហើយអ៊ីចឹង សមាជិកក្រុមប្រឹក្សាធម្មនុញ្ញទាំង៩រូបនេះគ្មានសិទ្ធិធ្វើComment(ផ្តល់ជាយោបល់)អ្វីទេ ហើយក៏គ្មានសិទ្ធិបកស្រាយអ្វីដែរ ព្រោះសេចក្តីសម្រេចនេះជាបញ្ញាញាណរួមរបស់កិច្ចប្រជុំ”។
តំណាងរាស្រ្តគណបក្សសង្គ្រោះជាតិដែលដាក់លិខិតទៅក្រុមប្រឹក្សាធម្មនុញ្ញឲ្យពិនិត្យទៅធម្មនុញ្ញភាពរបស់ច្បាប់នេះ លោក សុន ឆ័យ មានប្រសាសន៍ថាលោកមិនទាន់បានឃើញសេចក្តីសម្រេចនេះនៅឡើយ។ លោកក៏មិនបានបញ្ចេញយោបល់អ្វីទាក់ទងនឹងសេចក្តីសម្រេចនេះទេ ដោយលោកថានេះជាការសម្រេចរបស់ក្រុមប្រឹក្សាធម្មនុញ្ញ។ ទោះយ៉ាងណា លោកថាលោកចង់មើលចម្លើយរបស់ក្រុមប្រឹក្សាធម្មនុញ្ញទាក់ទងទៅនឹងលិខិតរបស់លោកផងដែរ។
លោក សុន ឆ័យ ឲ្យដឹងដែរថាលោកនឹងបន្តស្នើឲ្យមានការធ្វើវិសោធនកម្មលើច្បាប់សមាគមនិងអង្គការមិនមែនរដ្ឋាភិបាល បន្ទាប់ពីច្បាប់នេះចូលជាធរមាន។លោកបន្ថែមថា៖ “បាទដូចជាមានវិធីតែមួយទេ គឺធ្វើសំណើវិសោធនកម្មច្បាប់ហ្នឹងនៅពេលច្បាប់ហ្នឹងចូលជាធរមានបាទ”។
មន្ត្រីឃ្លាំមើការរំលោសិទ្ធិមនុស្សនៅអង្គការលីកាដូ លោក អំ សំអាត មានប្រសាសន៍ថាលោកសោកស្តាយចំពោះសេចក្តីសម្រេចរបស់ក្រុមប្រឹក្សាធម្មនុញ្ញនេះ ដោយលោកថាច្បាប់នេះមានភាពចម្រូងចម្រាសរវាងរដ្ឋាភិបាលជាមួយអង្គការសមាគមជាតិនិងអន្តរជាតិ។ ទោះយ៉ាងណា លោកថាការសម្រេចនេះក៏មិនមែនអ្វីប្លែកនោះទេ ដោយលោកថាការអះអាងរបស់គណបក្សទាំងពីរកាលពីថ្ងៃទី១០ខែសីហាក្នុងជំនួបនៅវិមានរដ្ឋសភា ហាក់បានបើកផ្លូវដល់ការសម្រេចនេះរួចជាស្រេចទៅហើយ។
លោកបន្ថែមថា៖ “(គណបក្សទាំងពីរ)បានព្រមព្រៀងគ្នាថា បើច្បាប់នេះអនុវត្តទៅហើយមានការប៉ះពាល់ដល់សិទ្ធិសេរីភាពដល់ប្រជាពលរដ្ឋរំលោភសិទ្ធិមនុស្សនឹងធ្វើវិសោធនកម្ម អាហ្នឹងជាសញ្ញាមួយសម្រាប់ក្រុមប្រឹក្សាធ្វើការសម្រេចនេះ”។
កាលពីថ្ងៃទី៣០ខែកក្កដា ឆ្នាំ២០១៥ តំណាងរាស្រ្តគណបក្សសង្រ្គោះជាតិ១៣រូបបានស្នើឲ្យក្រុមប្រឹក្សាធម្មនុញ្ញ ពិនិត្យមើលធម្មនុញ្ញភាពនៃច្បាប់នេះ ដោយចាត់ទុកថាវាផ្ទុយនឹងរដ្ឋធម្មនុញ្ញនិងច្បាប់អន្តរជាតិ។ លិខិតរបស់តំណាងរាស្រ្តដែលបានដាក់ទៅក្រុមប្រឹក្សាធម្មនុញ្ញបានលើកឡើងពីមាត្រាមួយចំនួននៃច្បាប់អង្គការដែលពួកគេយល់ថារឹតត្បិតសិទ្ធិសេរីភាព ដូចជាការទាមទារឲ្យបុគ្គលមានអាយុគ្រប់១៨ឡើងទៅ ទើបអាចបង្កើតសមាគមឬអង្គការ ការតម្រូវឲ្យចុះបញ្ជី ការតម្រូវឲ្យចុះបញ្ជីនៅក្រសួងមហាផ្ទៃ ការតម្រូវឲ្យប្រកាន់ជំហរអព្យាក្រឹតចំពោះគណបក្សនយោបាយនិងការត្រួតពិនិត្យនិងសវនកម្មលើសមាគមឬអង្គការ។
គួរបញ្ជាក់ថា ថ្មីៗនេះ គណបក្សប្រជាជនកម្ពុជានិងគណបក្សសង្គ្រោះជាតិធ្លាប់អះអាងថានឹងធ្វើវិសោធនកម្មច្បាប់នេះ ប្រសិនបើច្បាប់នោះអនុវត្តទៅ មានការប៉ះពាល់ដល់សិទ្ធិសេរីភាពនិងប្រយោជន៍របស់ប្រជាពលរដ្ឋ៕
សូមសរសេរមកកាន់លោក ទូច សុខា តាមរយៈsokha@vodhotnews.com
លោក សុន ឆ័យ ស្នើឲ្យកែច្បាប់ NGO ខណៈក្រុមប្រឹក្សាធម្មនុញ្ញបិទផ្លូវតវ៉ា (វីដេអូ)
ដោយ៖ ឧស្សាហ៍ | ថ្ងៃពុធ ទី12 សីហា 2015, 06:37 PM
http://vodhotnews.com
លោក សុន ឆ័យ ស្នើឲ្យកែច្បាប់NGOខណៈក្រុមប្រឹក្សាធម្មនុញ្ញបិទផ្លូវតវ៉ា