ដោយ៖ យ៉ា រសាត់ | ថ្ងៃចន្ទ ទី31 សីហា 2015, 02:40 PM
http://vodhotnews.com
រូបយុវជន ខឹម សុផាត ក្នុងថ្ងៃគោរពវិញ្ញាណក្ខន្ធជនរង់គ្រោះបាត់បង់ជីវិតនៅផ្លូវវ៉េងស្រេង
ឪពុករបស់យុវជន ខឹម សុផាត ដែលបានបាត់ខ្លួនក្នុងពេលសមត្ថកិច្ចបាញ់ប្រហារទៅលើកម្មកររោងចក្រ កាលពីថ្ងៃទី៣ ខែមករា ឆ្នាំ២០១៤ នៅផ្លូវវ៉េងស្រេង អំពាវនាវឲ្យសមត្ថកិច្ចនិងមន្ដ្រីពាក់ព័ន្ធជួយបង្ហាញភស្ដុតាងនិងផ្ដល់យុត្តិធម៌ចំពោះការបាត់ខ្លួនកូនប្រុសរបស់លោក។
កម្មករ៤នាក់បានស្លាប់និងជាង៣០នាក់ទៀត បានរងរបួស ដោយសារការបាញ់ប្រហាររបស់កម្លាំងសមត្ថកិច្ចទៅលើកម្មករ កាលពីថ្ងៃទី០៣ខែមករា ឆ្នាំ២០១៤ នៅគ្រាពួកគេតវ៉ាទាមទារការដំឡើងប្រាក់ឈ្នួល។ យុវជនម្នាក់ អាយុ១៧ឆ្នាំ ឈ្មោះ ខឹម សុផាត បានបាត់ខ្លួនរហូតមកដល់ពេលនេះ។
ឪពុកជនរងគ្រោះ លោក ខឹម សឿន បានប្រាប់វីអូឌី(VOD)នៅថ្ងៃចន្ទនេះថាកូនប្រុសរបស់លោក ឈ្មោះ ខឹម សុផាត បានបាត់ខ្លួនក្រោយពេលមានផ្ទុះហិង្សានៅផ្លូវវ៉េងស្រេង ខណៈកូនរបស់លោកទៅឈរមើលការប្រតាយប្រតប់គ្នារវាងមន្ដ្រីសន្ដិសុខនិងកម្មកររោងចក្រ។ លោកបន្ដថារហូតមកដល់ពេលនេះ គ្មានដំណឹងអ្វីមួយអំពីកូនគាត់ឡើយ ហើយលោកក៏ថាគ្មានសមត្ថកិច្ចឬក៏អ្នកជំនាញរបស់រដ្ឋាភិបាលណាមួយចុះទៅសួរនាំលោកអំពីករណីបាត់ខ្លួនកូនរបស់លោកផងដែរ។ លោកថាបើទោះបីជាកូនរបស់លោកមានរឿងអ្វីមួយកើតឡើងឬស្លាប់ក៏ដោយ ក៏លោកសុំស្នើឲ្យមន្ដ្រីមានសមត្ថកិច្ចរកយុត្តិធម៌តាមរយៈការបង្ហាញភស្ដុតាងនិងមូលហេតុបញ្ជាក់ពីការបាត់ខ្លួនឲ្យបានពិតប្រាកដ។
លោក ខឹម សឿន បានរៀបរាប់ទាំងក្តុកក្តួលថា៖ “បាទខ្ញុំអំពាវនាវឲ្យជួយទាំងអស់អង្គការ អ្នកថ្នាក់លើៗឲ្យជួយដោះស្រាយ រកយុត្ដិធម៌ឲ្យកូនខ្ញុំ កុំឲ្យវាងាប់ទៅដូចខ្មោចដូចឆ្កែអញ្ចឹង បើវាស្លាប់ឲ្យឃើញសាកសពអីផងទៅ”។
ជាការឆ្លើយតប អ្នកនាំពាក្យក្រសួងមហាផ្ទៃ លោក ខៀវ សុភ័គ បានលើកឡើងថាក្រសួងមហាផ្ទៃនៅតែបន្ដស្វែងរកមូលហេតុនៃការបាត់ខ្លួនរបស់យុវជន ខឹម សុផាត ប៉ុន្ដែលោកថាហាក់មិនមានតំរុយអ្វីមួយបញ្ជាក់ថាតើយុវជន សុផាតនោះ បានបាត់ខ្លួនពិតឬយ៉ាងណានោះទេ។
លោក ខៀវ សុភ័គ មានប្រសាសន៍ថា៖ “ឥឡូវយើងមានការសោកស្ដាយណាស់ចំពោះការបាត់ខ្លួនហ្នឹង ហើយមិនថារកនៅទីណាដែរកន្លងមកឃើញថាយកទៅដុតនៅទីណា ដល់ទៅមើលទៅមិនមែនទេ… នៅកន្លែងកើតហេតុហ្មងវាមិនដឹងជាអាថ៌កំបាំងដែរ ព្រោះកាលនោះតួលេខយើងដឹងទាំងអស់គ្នាតែម្ដង មានចាប់ខ្លួន២៣នាក់ ស្លាប់បួននាក់ របួសប៉ុន្មាននាក់អីចឹងទៅ ប៉ុន្ដែដល់ពេលស្លាប់៦នាក់ដូចអត់មានកត់ត្រាទុកនៅក្នុងអ្វីដែលយើងឃើញនោះទេ”។
ឪពុកជនរងគ្រោះ ឈ្មោះ លោក ខឹម សឿន
លោកបន្ដថាលោកក៏សុំអំពាវនាវឲ្យអ្នកដែលបានឃើញហេតុការណ៍ដែលថាយុវជន ខឹម សុផាត ដួលនៅផ្លូវ រាយការណ៍ទៅសមត្ថកិច្ចផងដែរ ដើម្បីសមត្ថកិច្ចធ្វើការស្រាវជ្រាវបន្ដ។
កាលពីថ្ងៃអាទិត្យទី៣០ខែសីហា ក្នុងទិវាអន្ដរជាតិជនរងគ្រោះនៃបាត់ខ្លួនដោយបង្ខំ មជ្ឈមណ្ឌលសិទ្ធិមនុស្សកម្ពុជា(CCHR) បានចេញសេចក្ដីថ្លែងការណ៍មួយដោយអំពាវនាវឲ្យរដ្ឋាភិបាលកម្ពុជា ធ្វើការស៊ើបអង្កេតឲ្យបានត្រឹមត្រូវលើការបាត់ខ្លួនរបស់យុវជនម្នាក់ ឈ្មោះ ខឹម សុផាត។
របាយការណ៍របស់CCHRបញ្ជាក់ថាយុវជន ខឹម សុផាត ត្រូវបានឃើញចុងក្រោយនៅកន្លែងកូដកម្ម នៅពេលដែលរូបលោកដួលនៅលើដីដោយសារត្រូវគ្រាប់កាំភ្លើង ហើយក្រោយមកក៏បាត់ខ្លួនតែម្ដង។ របាយការណ៍ បានដាក់ការសង្ស័យថាការបាត់ខ្លួននោះអាចជាមូលហេតុនៃការបាត់ខ្លួនដោយបង្ខំ។
របាយការណ៍នោះលើកឡើងថា “ម.ស.ម.ក (មជ្ឈមណ្ឌលសិទ្ធិមនុស្សកម្ពុជា) មានការព្រួយបារម្ភថា ការបាត់ខ្លួនរបស់យុវជន ខឹម សុផាត គឺមិនត្រឹមតែជាការបាត់ខ្លួនដោយបង្ខំនោះទេ ប៉ុន្ដែវាជាការបារម្ភផងដែរដែលរដ្ឋាភិបាលបរាជ័យក្នុងការបពេញកាតព្វកិច្ចដែលខ្លួនបានព្រមព្រៀងនៅក្នុងអនុសញ្ញាអន្ដរជាតិ ស្ដីពីការការពារជនគ្រប់ពីការបាត់ខ្លួនដោយបង្ខំ។ ក្នុងទិវាជនរងគ្រោះអន្ដរជាតិនៃការបាត់ខ្លួនដោយបង្ខំនេះ ម.ស.ម.ក សូមរំឭកដល់រដ្ឋាភិបាលកម្ពុជាអំពីកាតព្វកិច្ចអន្ដរជាតិក្នុងការស៊ើបអង្កេតទៅលើករណីដែលត្រូវបានចោទថាជាការបាត់ខ្លួនដោយបង្ខំ ហើយប្រសិនបើករណីនេះជាការពិត សិទ្ធិទទួលបានការពិតនិងផ្ដល់សំណងដល់គ្រួសារជនរងគ្រោះគួរត្រូវបានធានា”។
របាយការណ៍នោះក៏បានបញ្ជាក់ផងដែរថាអាជ្ញាធរបានអះអាងថាខ្លួនបានធ្វើការស៊ើបអង្កេតលើករណីបាត់ខ្លួននេះ ដោយបានធ្វើកោសល្យវិច័យទៅលើភស្ដុតាងដេលគេបានរកឃើញ ប៉ុន្ដែអាជ្ញាធរបានបញ្ជាក់ថាអ្វីដែលគេបានរកឃើញនោះមិនមែនជារូបរបស់យុវជន ខឹម សុផាតនោះទេ។ របាយការណ៍នោះបន្ដថា រដ្ឋាភិបាលក៏មិនបានបង្ហាញពីព័ត៌មានលម្អិតទាក់ទងនឹងការស៊ើបអង្កេតនោះផងដែរ។
មន្ដ្រីសម្របសម្រួលគម្រោងការពារសិទ្ធិសេរីភាពមូលដ្ឋាននៃមជ្ឈមណ្ឌលសិទ្ធិមនុស្សកម្ពុជា កញ្ញា ឆាយ ឈុនលី លើកឡើងថារដ្ឋាភិបាលកម្ពុជាបានព្រមព្រៀងទៅលើកិច្ចព្រមព្រៀងស្ដីពីអនុសញ្ញាអន្ដរជាតិស្ដីពីការការពារជនគ្រប់រូបពីការបាត់ខ្លួនដោយបង្ខំរួចហើយ។ កញ្ញាថាអនុសញ្ញានេះតម្រូវឲ្យរដ្ឋាភិបាលចាត់វិធានការសមស្របណាមួយដើម្បីស៊ើបអង្កេតរកមូលហេតុនៃការបាត់ខ្លួនដោយបង្ខំឲ្យឃើញហើយនាំយកជនល្មើសទៅផ្ដន្ទាទោស។ ប៉ុន្ដែកញ្ញាថាប្រសិនបើរដ្ឋាភិបាលមិនបានដោះស្រាយចំពោះបញ្ហានេះទេ នោះវាបង្ហាញថារដ្ឋាភិបាលមិនមានខុសត្រូវលើអ្វីដែលបានកើតឡើងនោះឡើយ។
កញ្ញា ឆាយ ឈុនលី មានប្រសាសន៍ថា៖ “ខ្ញុំអាចនិយាយបានថាអាហ្នឹងវាអាស្រ័យលើឆន្ទៈរបស់រដ្ឋាភិបាលដែរណា ហេតុអីបានជារឿងហ្នឹងនៅកបចោលយូម្ល៉េះ ហើយហេតុអីបានមិនមានព័ត៌មានបើសិនជាស៊ើបអង្កេតទៅមិនបញ្ជាក់ថាជាខឹម សុផាត អីអញ្ចឹងប៉ុន្តែយ៉ាងហោចណាស់គួរផ្តល់ព័ត៌មានណាលម្អិតតិចដែរ ថាមូលហេតុអីហេតុអី”។
គួរបញ្ជាក់ថាក្រសួងការបរទេសសហរដ្ឋអាមេរិកបានចេញផ្សាយរបាយការណ៍មួយស្តីពីបញ្ហាសិទ្ធិមនុស្សនៅកម្ពុជាសម្រាប់ឆ្នាំ២០១៤ ដោយបារម្ភពីបញ្ហានិទណ្ឌភាពនៃការបាញ់សម្លាប់កម្មករនៅផ្លូវវ៉េងស្រេង៕
សរសេរមកកាន់លោក យ៉ា រសាត់ តាមរយៈ rorsart@vodhotnews.com