ដោយ៖ ឡាយ សាមាន | ថ្ងៃចន្ទ ទី31 សីហា 2015, 04:48 PM
http://vodhotnews.com
លោក គង់ កន្តារ៉ា អនុរដ្ឋលេខាធិការក្រសួងវប្បធម៌ និងវិចត្រសិល្បៈ (រូបថត៖ ទេព សូនី)
មន្ត្រីជាន់ខ្ពស់នៃក្រសួងវប្បធម៌ នៅថ្ងៃចន្ទនេះបញ្ជាក់ថា ក្រសួងមិនដែលហាមឃាត់ការនាំចូល និងចាក់បញ្ចាំងភាពយន្តថៃនៅតាមកញ្ចក់ទូរទ្សសន៍របស់កម្ពុជានោះទេ។
ក្នុងពិធីបើកសិក្ខាសាលាថ្នាក់ជាតិស្តីពី សិទ្ធិអ្នកនិពន្ធ និងសិទ្ធិប្រហាក់ប្រហែល នៅព្រឹកថ្ងៃទី៣១ ខែសីហានេះ អនុរដ្ឋលេខាធិការក្រសួងវប្បធម៌ និងវិចត្រសិល្បៈ លោក គង់ កន្តារ៉ា បញ្ជាក់ថា ក្រោយពីមានចលនាដុតទូតថៃកាលពីឆ្នាំ២០០៣មក ក្រសួងវប្បធម៌មិនដែលហាមឃាត់ការចាក់បញ្ចាំងភាពយន្តថៃលើកញ្ចក់ទូរសទ្សន៍នោះទេ។ លោកបន្តថា ក្រោយពីហេតុការណ៍នោះ ម្ចាស់ស្ថានីយទូរទស្សន៍មិនហ៊ានចាក់បញ្ចាំងខ្សែភាពយន្តថៃ ដោយខ្លួនឯងប៉ុណ្ណោះ ពោលខ្លាចមានបាតុកម្មនៅមុខស្ថានីយទូរទស្សន៍របស់ខ្លួន។
តែលោកបញ្ជាក់ថា ការនាំចូលរឿងភាគថៃត្រូវតែមានច្បាប់ និងទិដ្ឋការពីក្រសួងវប្បធម៌ និងវិចិត្រសិល្បៈ ចំណែកការចាក់បញ្ចាំងភាពយន្តថៃនៅតាមទូរទស្សន៍វិញ ជាសិទ្ធិគ្រប់គ្រងរបស់ក្រសួងព័ត៌មាន។ លោកឲ្យដឹងទៀតថា បច្ចុប្បន្នក្រសួងកំពុងចុះបង្ក្រាបការនាំចូលរឿងភាគយន្តថៃមួយចំនួន ដែលមិនមានទិដ្ឋការពីក្រសួងវប្បធម៌។
ទោះជាយ៉ាងណាក៏ដោយ កាលពីដើមឆ្នាំ២០១៤ រដ្ឋលេខាធិការប្រសួងវប្បធម៌ និងវិចិត្រសិល្បៈ លោក ថៃ នរសត្យា បានព្រមានចាត់វិធានការផ្លូវច្បាប់ ទៅលើស្ថានីយ៍ទូរទស្សន៍ក្នុងស្រុកណាដែលចាក់បញ្ចាំងខ្សែភាពយន្តភាគថៃ។ លោកបានមានប្រសាសន៍ប្រាប់វីអូឌីថា ក្រសួងមិនបានចេញសេចក្តីណែនាំ ឬអនុញ្ញាតឲ្យស្ថានីយ៍ទូរទស្សន៍ក្នុងស្រុកចាក់បញ្ចាំងខ្សែភាពយន្ដរបស់ថៃទេ។ លោកថា បើមានករណីនេះកើតឡើង គឺជារឿងខុសទៅនឹងបទបញ្ញាតិរបស់ក្រសួង ហើយក្រសួងនឹងចាត់វិធានការផ្លូវច្បាប់ទៅលើស្ថានីយ៍ទូរទស្សន៍នោះ។
អ្នកនិពន្ធប្រលោមលោក និងរឿងនិទានកុមារ លោកស្រី កែម លីហៀង ដែលចូលរួមក្នុងសិក្ខាថ្នាក់ជាតិនៅថ្ងៃចន្ទនេះ មានប្រសាសន៍ថា ការនាំចូលរឿងភាពយន្តពីក្រៅប្រទេស គឺសុទ្ធតែប៉ះពាល់ដល់វប្បធម៌កម្ពុជា មិនថាតែភាពយន្តថៃនោះទេ។ ករណីនេះលោកស្រីពន្យល់ថា ក្រសួងពាក់ព័ន្ធត្រូវមានវិធានការទប់ស្កាត់ការចាក់បញ្ចាំងភាពយន្តបរទេស ជាពិសេសម៉ោងមាស(ម៉ោងដែលមានមនុស្សមើលច្រើនចន្លោះពីម៉ោង៦ ដល់៨ល្ងាច) ពោលគួរចាក់ភាពយន្តខ្មែរនៅម៉ោងមាសនេះ ដើម្បីឲ្យភាពយន្តខ្មែរ ដែលបង្កើតដោយស្នាដៃខ្មែរត្រូវបានផ្សព្វផ្សាយលើកញ្ចក់ទូរទស្សន៍។ លោកស្រីទទួលស្គាល់ថា បើប្រៀបធៀបភាពយន្តបរទេស និងភាពយន្តខ្មែរនោះ ផលិតកររបស់ខ្មែរពិតជាមានភាពទន់ខ្សោយជាងគេពិតមែន។
យ៉ាងនេះក្តីលោកស្រីជំរុញឲ្យផលិតករខ្មែរ ខិតខំពង្រឹងសមត្ថភាពបន្ថែមទៀតក្នុងការផលិតភាពយន្ត ដើម្បីប្រកួតប្រជែងជាមួយភាពយន្តបរទេស។
គួរបញ្ជាក់ថា រយៈពេលជាង១០ឆ្នាំមកហើយ នៅលើកញ្ចក់ទូរទស្សន៍ខ្មែរ មិនឃើញមានការចាក់បញ្ចាំងខ្សែភាពយន្តថៃនោះទេ បន្ទាប់ពីមានការដុតស្ថានទូតថៃកាលពីឆ្នាំ ២០០៣ ក្រោយពីតារាភាពយន្តថៃម្នាក់អះអាងថាប្រាសាទអង្គរវត្តជារបស់ថៃ។ តែប៉ុន្មានឆ្នាំចុងក្រោយនេះ ភាពយន្តថៃត្រូវបានចាក់បញ្ចាំងលើកកញ្ចក់ទូរទស្សន៍ខ្មែរវិញស្ទើរគ្រប់ប៉ុស្តិ៍៕
សូមសរសេរមកលោក ឡាយ សាមាន តាមរយៈ samean@vodhotnews.com
គិតយូរៗទៅ ស្រុកខ្មែរ លែងមានរឿងចាក់ផ្សាយខ្លួនឯងហើយ សព្វកំពុងតែខ្ចីវប្បធម៌របស់ថៃ មកសាបព្រោះមកលើកូនខ្មែរបន្ថែមទៀត លែងមានម្ចាស់ការខ្លួនឯងហើយ៕ សៀមគេចង់កប់ខ្មែរឲ្យបាត់ តាមរយៈការសាបព្រោះវប្បធម៌នេះឯង បើចឹងទៀត នឹងរលាយជាបន្តបន្ទាប់…….ហើយ…..
ស្រុកខ្មែរមិនមែនមានសុទ្ធតែមនុស្សល្ងង់ទេ។សូមពិចារណា។
រឿងភាពយន្តក៏ទិញរឺនាំចូលពីប្រទេសថៃ គ្រឿងសំភារៈប្រើប្រាស់គិតទាំងម្ហូបអាហារផងក៏នាំចូល ពីប្រទេថៃដែរភាគច្រើន។ តើមកពីមូលហេតុអ្វី? បើខ្មែរផលិតរបស់បានដូចគេ ហើយមានគុណភាពល្អ ដូចគេនោះ ប្រជាជនខ្មែរច្បាស់ជាប្រើរបស់ខ្មែរ មើលរបស់ខ្មែរហើយ។