ដោយ៖ ឆុង ស៊ីណាន | ថ្ងៃអង្គារ ទី1 កញ្ញា 2015, 06:27 PM
http://vodhotnews.com
រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទាន ឲ្យដឹងថា រដ្ឋាភិបាលចំណាយប្រាក់ជាង ៣០០ពាន់លានរៀល ឬស្មើនឹងប្រមាណ៧៣លានដុល្លារក្នុងមួយឆ្នាំ សម្រាប់ជាប្រាក់របបគោលនយោបាយផ្ដល់ឲ្យអតីតយុទ្ធជន ដើម្បីដោះស្រាយជីវភាពរស់នៅ។
នៅក្នុងមហាសន្និបាតតំណាងសមាគមអតីតយុទ្ធជនកម្ពុជាទូទាំងប្រទេសលើកទី២ ធ្វើឡើងទីស្ដីការក្រសួងនៅថ្ងៃអង្គារនេះ រដ្ឋមន្ត្រីក្រសួងសង្គមកិច្ចលោក វង សូត បានថ្លែងថា គិតត្រឹមខែមិថុនា ឆ្នាំ២០១៥នេះ មានអតីតយុទ្ធជនសរុបចំនួន ៨៧ ២៨៥នាក់ និងអ្នកនៅក្នុងបន្ទុកចំនួន ១៤០ ៥២៨នាក់ និងត្រូវចំណាយថវិកាសរុបជាង៣០០ពាន់លានរៀល។ លោកបន្តថា ប្រាក់របបគោលនយោបាយនេះត្រូវបានកែសម្រួលជាបន្តបន្ទាប់ ស្របតាមការការដំឡើងប្រាក់បៀវត្សមន្ត្រីរាជការ និងកងកម្លាំងប្រដាប់អាវុធ។
លោក វង សូត បន្តទៀតថា នៅក្នុងឆ្នាំ២០១៤ ក្រសួងបានកែសម្រួលប្រាក់បៀវត្សមូលដ្ឋានជូនជនពិការ និវត្តជន និងជនបាត់បង់សមត្ថភាពការងារមុនឆ្នាំ២០០៧ និងក្រោយឆ្នាំ២០០៧ ដើម្បីឲ្យតុល្យភាពគ្នា ហើយក្នុងនោះដែរក៏បានកែសម្រួលបង្កើនប្រាក់ជូនជនពិការក្នុងមួយនាក់ ៤៥ ០០០រៀលក្នុងមួយខែ។
រដ្ឋមន្ត្រីរូបនេះឲ្យដឹងដែរថា ក្រសួងបានកែសម្រួលបន្ថែមប្រាក់របបសន្តិសុខសង្គមជូនជនពិការ និវត្តជន និងជនបាត់បង់សមត្ថភាពការងារទៅតាមកម្រិត៦ផ្សេងៗគ្នា ដែលក្នុងនោះ ប្រាក់របបប្រចាំខែអប្បបរមាត្រូវបានដំឡើងដល់៣០០ ០០០រៀល ដែលលោកថា ត្រូវបានដាក់ឲ្យអនុវត្តចាប់ពីខែមេសា ឆ្នាំ២០១៥នេះមក។
លោក វង សូត ឲ្យដឹងទៀតថា សមាគមអតីតយុទ្ធជនកម្ពុជាត្រូវបានបង្កើតឡើង៨ឆ្នាំមកហើយ មានសមាជិកទូទាំងប្រទេសចំនួន ៧៥ ២៥៨នាក់។ លោកថា សមាគមក៏បានរៀបចំឲ្យមានបេឡាមរណសង្គ្រោះ ដើម្បីជួយដល់សមាជិកដែលបានទទួលមរណភាពផងដែរ៕
សរសេរមកកាន់ លោក ឆុង ស៊ីណាន តាមរយៈ Chhong.sinan@yahoo.com