ដោយ៖​ នួន បូរិន​ | ថ្ងៃពុធ ទី2 កញ្ញា 2015, 03:43 PM​
http://vodhotnews.com

លោក​នាយករដ្ឋមន្ត្រី ហ៊ុន សែន​ (រូបថត៖ ទេព សូនី)

លោកនាយក​រដ្ឋមន្ត្រី ​ហ៊ុន​ សែន ប្រកាសថា រដ្ឋ​ពុំ​មានប្រាក់បៀវត្សសម្រាប់​បើក​ឱ្យអ្នកតំណាងរាស្ត្រគណបក​សង្គ្រោះ​ជាតិ ដែលចូលរួម​ធ្វើ​បាតុកម្ម កាល​ពី​ក្រោយការបោះឆ្នោត សភា​អាណត្តិ​ទី​៦នោះទេ។​

​លោក​ ហ៊ុន សែន ថ្លែង​រំឭក​អំពី​រឿងនេះ នៅក្នុង​សន្និបាត​តំណាង​សមាគម​អតីត​យុទ្ធជន​ទូទាំង​ប្រទេសនៅ​វិទ្យាស្ថាន​ជាតិ​អប់រំ នាព្រឹក​ថ្ងៃទី​២ ខែ​កញ្ញា ឆ្នាំ​២០១៥​នេះ​។​

លោក​ ហ៊ុន ​សែន​ បានបញ្ជាក់​ថា​ តំណាងរាស្ត្រ​បក្ស​ប្រឆាំង​មួយ​ចំនួន បាន​ជំរុញ​ឱ្យ​លោក សម រង្ស៊ី យក​រឿង​នេះ​ទៅ​ជជែកនៅពេល​ជួប​ផ្ទាល់​ជាមួយ​លោក ប៉ុន្តែ​លោក​ថា​លោក សម រង្ស៊ី មិន​បាន​លើកយក​មក​ពិភាក្សាតាម​ការស្នើ​សុំ​នោះ​ទេ​។​

ទោះបីជា​យ៉ាងណា​លោកនាយក​រដ្ឋមន្ត្រី​ថ្លែងថា កម្ពុជាពុំមាន​ប្រាក់ខែ​សម្រាប់​បើក​ឱ្យ​អ្នកដើរ​ធ្វើបាតុកម្មមិន​ចូល​ធ្វើការ​នោះទេ​។​

ទោះជា​យ៉ាងនេះ​ក្ដី តំណាងរាស្ត្រគណបក​សង្គ្រោះ​ជាតិតែងតែ​អះអាងថា ពួកគាត់​មិន​បានគិតពីបញ្ហាប្រាក់បៀវត្ស​នោះ​ទេ​។​

សូម​រំឭក​ថា អ្នកតំណាងរាស្ត្រគណបក​សង្គ្រោះ​ជាតិ​ មាន៥៥​រូប។ ពួកគាត់​ពុំ​បានស្បថ​ចូលកាន់​តំណែង បន្ទាប់​ពី​ គ.ជ.ប ប្រកាស​សុពលភាពនៅក្រោយថ្ងៃ​បោះឆ្នោត ២៨ កក្កដា ២០១៣ ហើយក្រោយមក​បានចូល​ស្បថនៅ​ខែ​កក្ក​ដា ឆ្នាំ២០១៤ គឺ​រយៈពេល​១​ឆ្នាំ​។ ប្រាក់ខែ​អ្នកតំណាងរាស្ត្រមាន​ប្រហាក់ប្រហែល២០០០​ដុល្លារ​អាមេរិក៕

សូមសរសេរមកលោក នួន បូរិន តាមរយៈ borinnoun@gmail.com