ដោយ៖ ទូច សុខា | ថ្ងៃពុធ ទី2 កញ្ញា 2015, 05:45 PM
http://vodhotnews.com
លោកនាយករដ្ឋមន្ត្រី ហ៊ុន សែន ថ្លែងក្នុងពិធីបិទសន្និបាតតំណាងសមាគមអតីតយុទ្ធជនទូទាំងប្រទេសលើកទី២ នៅព្រឹកថ្ងៃពុធនេះ (រូបភាព៖ ទេព សូនី)
លោកនាយករដ្ឋមន្ត្រី ហ៊ុន សែន បញ្ជាឲ្យក្រសួងសេដ្ឋកិច្ច និងហិរញ្ញវត្ថុ សហការជាមួយក្រសួងសង្គមកិច្ច អតីតយុទ្ធជន និងយុវនីតិសម្បទា ពន្លឿនការបើកប្រាក់ដែលក្រសួងជំពាក់មិនទាន់បានបើកឲ្យគ្រួសារសាកសពអតីយុទ្ធឲ្យបានមុនពិធីបុណ្យភ្ជុំបិណ្ឌ។
លោកនាយករដ្ឋមន្ត្រី ហ៊ុន សែន បានដាក់បទបញ្ជាដូចនេះនៅក្នុងពិធីបិទសន្និបាតតំណាងសមាគមអតីតយុទ្ធជនទូទាំងប្រទេសលើកទី២ នៅវិទ្យាស្ថានជាតិអប់រំ នាព្រឹកថ្ងៃពុធនេះ។
លោកនាយករដ្ឋមន្ត្រីឲ្យដឹងថា សព្វថ្ងៃនេះរដ្ឋនៅជំពាក់ប្រាក់ដែលត្រូវបើកឲ្យសាកសពអតីតយុទ្ធ១៥២៣សព ដែលលោកបញ្ជាក់ទំហំទឹកប្រាក់នេះថាប្រហែលជា១,៥លានដុល្លារ។ លោកឲ្យដឹងដែរថា រដ្ឋមានថវិកាសម្រាប់បើកឲ្យសពអតីយុទ្ធជនទាំងនេះ ហើយលោកបញ្ជាឲ្យក្រសួងពាក់ព័ន្ធទាំង២ពន្លឿនការបើប្រាក់ដល់ក្រុមគ្រួសារសពឲ្យបានមុនបុណ្យភ្ជុំបិណ្ឌ។
លោកនាយករដ្ឋមន្ត្រីបន្ថែមថា៖ “ឥឡូវទៅវិញត្រូវធ្វើយ៉ាងម៉េចរាយការណ៍ដាច់ខាតដល់ឯកឧត្តម អូន ព័ន្ធមុនីរ័ត្ន ដោះស្រាយដាច់ខាតទៅលើករណីនេះ…យើងមានថវិកា ហេតុអីបានមកជំពាក់ថវិកាសាកសព ឥឡូវធ្វើយ៉ាងម៉េចក៏ដោយគឺត្រូវធ្វើឲ្យលឿន…មុនភ្ជុំបិណ្ឌនេះ ព្រោះកុំឲ្យដល់ថ្នាក់រកលុយធ្វើបុណ្យឲ្យប្តីវាមិនបាន ឲ្យឪពុកម្តាយវាមិនបាន អត់បានទេ សុំទៅវិញត្រូវធ្វើការអាហ្នឹងឲ្យស្រូត"។
លោកនាយករដ្ឋមន្ត្រីឲ្យដឹងទៀតថា កន្លងមកក្រសួងសង្គមកិច្ច អតីតយុទ្ធជន និងយុវនីតិសម្បទា បានបើកប្រាក់សម្រាប់សាកសពអតីតយុទ្ធជននេះបានចំនួន៥៥១៣សពរួចមកហើយ។ លោកបន្តថា ក្នុង១ខែជាមធ្យមមានអតីតយុទ្ធជន១៥០នាក់បានស្លាប់។
អ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទា លោក តូច ចាន់នី មានប្រសាសន៍ថា មូលហេតុដែលនាំឲ្យមានការយឺតយ៉ាវក្នុងការបើកប្រាក់សម្រាប់សាកសពអតីយុទ្ធជនគឺដោយសារតែចំនួនអ្នកស្លាប់កើនលើសពីចំនួនរំពឹងទុករបស់សមាគមអតីតយុទ្ធជនកម្ពុជា។ លោកឲ្យដឹងថា ជាធម្មការសមាគមតម្រូវឲ្យមាជិកបង់វិភាគទានសម្រាប់អ្នកស្លាប់ចំនួន៣៥០០រៀលក្នុងមួយខែ ដែលលោកថា សមាគមរំពឹងថាក្នុងមួយខែមានអតីតយុទ្ធជនស្លាប់តែ៣៥នាក់ប៉ុណ្ណោះ។
លោក តូច ចាន់នី បន្ថែមថា ដោយសាតែចំនួនអ្នកស្លាប់កើនរហូតដល់ជាង១០០នាក់ក្នុងមួយខែទើបធ្វើឲ្យការបើកប្រាស់សម្រាប់សពអតីតយុទ្ធជនមានភាពយឺតយ៉ាវ។ ទោះយ៉ាងណាលោកថា បន្ទាប់ពីមានបទបញ្ជារបស់លោក នាយករដ្ឋមន្ត្រី ហ៊ុន សែន ក្រសួងនឹងដកយកថវិកាពីកញ្ចប់ថវិកាសង្គមសង្គ្រោះមកបើកឲ្យក្រុមគ្រួសារសពឲ្យបានមុនបុណ្យភ្ជុំបិណ្ឌ។
លោកបន្ថែមថា៖ “ចង់មិនឲ្យ(មានការបើកប្រាក់យឺត)នេះអ៊ីចឹងក៏បានដែរ ឧបមាថាបើស្លាប់១៥០(នាក់)អ៊ីចឹង យើងប្រមូលលុយ១៥០(នាក់)ដែរមកម្នាក់បង់១០០ៗ ឲ្យគ្រប់១៥ ០០០(រៀល)ដែរមក តែលុយសមាជិកយើងតិចដែរ អ៊ីចឹងប្រាក់ខែក៏វាតិចដែរ យើងមិនហ៊ានប្រមូលច្រើនខ្លាចប៉ះពាល់ដល់ជីវភាពរបស់គាត់ អ៊ីចឹងយើងឲ្យបង់ត្រឹមតែចំនួនណាមួយសមរម្យ មូលហេតុអ៊ីចឹងទេ ដែលវានៅសល់មិនព្រមដោះស្រាយ ដោយសារវាអ៊ីចឹង”។
អ្នកសម្របសម្រួលបណ្ដាញរួបរួមដើម្បីគណនេយ្យភាពសង្គមអាស៊ីបូព៌ា និងប៉ាស៊ីហ្វិច លោក សន ជ័យ មានប្រសាសន៍ថា ការបើកប្រាក់សម្រាប់សាកសពអតីតយុទ្ធមានភាពយឺតយ៉ាវមកពីក្រសួងពាក់ព័ន្ធគ្មានយន្តការច្បាស់លាស់ និងប្រព័ន្ធរដ្ឋបាលនៅមានភាពទន់ខ្សោយ។ លោកថា ការបើកប្រាក់សម្រាប់សាកសពអតីតយុទ្ធជនមានភាពយឺតយ៉ាវបែបនេះអាចធ្វើឲ្យប៉ះពាល់ដល់អារម្មណ៍ក្រុមគ្រួសារសព និងយុទ្ធជនដទៃទៀតដែលនៅរស់ ដោយលោកថា អ្នកអ្នកនោះអាចគិតថា រដ្ឋមិនគិតគូរពីពួកគាត់។
លោកមានប្រសាសន៍ថា៖ “ធ្វើឲ្យគេមើលឃើញថា គេ(រដ្ឋ)ត្រូវការតែពេលនៅរស់រានមានជីវិតទេ បានន័យថាគេ(រដ្ឋ)ត្រូវការតែពេលប្រើ ដល់ពេលអស់ការប្រើទៅ ដល់ពេលដែលស្លាប់ទៅគេបំភ្លេចចោល”។
បើតាមអ្នកនាំពាក្យក្រសួងសង្គមកិច្ចលោក តូច ចាន់នី ឲ្យដឹងថា សមាគមអតីតយុទ្ធជនកម្ពុជាដំណើរការបានជាង៧ឆ្នាំមកហើយ ដោយមានសមាជិកចូលរួមជាង៧ម៉ឺននាក់។ លោកថា សមាជិកដែលស្លាប់ម្នាក់សមាគមផ្តល់ថវិកាសម្រាប់ធ្វើបុណ្យសពចំនួន៤លានរៀល៕
សូមសរសេរមកកាន់លោក ទូច សុខា តាមរយៈ sokha@vodhotnews.com
សំដាច់ដេកស៊ីជោរទើបនឹងភ្ញាក់ថា សព្វថ្ងៃនេះរដ្ឋនៅជំពាក់ប្រាក់ដែលត្រូវបើកឲ្យសាកសពអតីតយុទ្ធ១៥២៣សព ដែលលោកបញ្ជាក់ទំហំទឹកប្រាក់នេះថាប្រហែលជា១,៥លានដុល្លារ។នេះមកពីមុន ពុំមានគេចាក់ក្រឡេកគាត់ អញ្ជឹងពួកគាត់ដេកលក់អស់ ឬស៊ីដាច់លុយនោះផងមិនដឹង???