ដោយ៖ មាឃ ចាន់ និងឆុង ស៊ីណាន | ថ្ងៃចន្ទ ទី7 កញ្ញា 2015, 05:43 PM
http://vodhotnews.com
តំបន់ប្រាសាទសំបូរព្រៃគុក (រូបថតដោយប្រជាពលរដ្ឋអ្នកសារព័ត៌មានពីខេត្តកំពង់ធំ)
ព្រះមហាក្សត្របានត្រាស់បង្គាប់ឲ្យបង្កើតអាជ្ញាធរចំណុះដោយក្រសួងវប្បធម៌និងវិចិត្រសិល្បៈ ដើម្បីការពារ អភិរក្សនិងអភិវឌ្ឍរមណីយដ្ឋាននៃប្រាសាទសំបូរព្រៃគុកក្នុងខេត្តកំពង់ធំ។
ព្រះរាជក្រឹត្យចុះថ្ងៃទី៣១ខែសីហា ឆ្នាំ២០១៥ ស្តីពីការរៀបចំនិងប្រព្រឹត្តទៅរបស់អាជ្ញាធរជាតិដើម្បីការពារនិងអភិវឌ្ឍរមណីយដ្ឋានវប្បធម៌នៃប្រាសាទសំបូរព្រៃគុកឲ្យដឹងថាអាជ្ញាធរនេះមានតួនាទីក្នុងការការពារ អភិរក្សនិងលើកតម្លៃឧទ្យានបុរាណវិទ្យា វប្បធម៌ បរិស្ថាននិងប្រវត្តិសាស្ត្រនៃរមណីយដ្ឋាន។ ព្រះរាជក្រឹត្យបន្តថាអាជ្ញាធរនេះគ្រប់គ្រងនិងចាត់ចែងការប្រើប្រាស់ដីធ្លីក្នុងតំបន់រមណីយដ្ឋាន ទប់ស្កាត់បទល្មើសព្រៃឈើនិងអំពើអនាធិបតេយ្យនៅក្នុងតំបន់ប្រាសាទ។
បើតាមព្រះរាជក្រឹត្យ អាជ្ញាធរដើម្បីការពារនិងអភិវឌ្ឍរមណីយដ្ឋាននៃប្រាសាទសំបូរព្រៃគុកនេះនឹងសហការជាមួយក្រុមប្រឹក្សាអភិវឌ្ឍន៍កម្ពុជា ដើម្បីផ្តល់ការអនុញ្ញាតឲ្យវិនិយោគនូវគម្រោងទាំងឡាយរបស់អាជ្ញាធរ ដោយសហការជាមួយក្រសួង ស្ថាប័ន មូលនិធិ អង្គការ សហគមន៍ជាតិនិងអន្តរជាតិ ព្រមទាំងស្ថាប័នរដ្ឋាភិបាល។
បើតាមព្រះរាជក្រឹត្យដដែល អាជ្ញាធរក្រោមជាតិត្រូវចូលរួមសហការជាមួយអាជ្ញាធរក្នុងការទប់ស្កាត់ការសាងសង់ខុសច្បាប់និងបទល្មើសផ្សេងៗដែលកើតឡើងក្នុងរមណីយដ្ឋាន។ ព្រះរាជក្រឹត្យបញ្ជាក់បន្ថែមថាអាជ្ញាធរដើម្បីការពារនិងអភិវឌ្ឍរមណីយដ្ឋាននៃប្រាសាទសំបូរព្រៃគុកមានសិទ្ធិទទួលនិងចាត់ចែង ប្រើប្រាស់គ្រប់នីតិវិធីដែលបានចែងជាធរមាននូវមូលនិធិដែលបានមកពីដៃគូរអភិវឌ្ឍន៍និងប្រភពផ្សេងៗទៀត។
អាជ្ញាធរនេះស្ថិតនៅក្រោមការគ្រប់គ្រងរបស់ក្រសួងវប្បធម៌និងវិចិត្រសិល្បៈ។
អ្នកនាំពាក្យក្រសួងវប្បធម៌ និងវិចិត្រសិល្បៈ លោក ថៃ នរៈសត្យា បដិសេធអត្ថាធិប្បាយលើបញ្ហានេះ ដោយបង្វែរសំណួរទៅក្រុមការងារខាងបេតិកភណ្ឌវិញ។
អភិបាលខេត្តកំពង់ធំ លោក អ៊ុត សំអន ប្រាប់វីអូឌី(VOD)ថារហូតមកដល់ពេលនេះ ភូមិនិងឃុំបានជួយអភិរក្សតំបន់នេះ ដោយអះអាងថាមិនមានបញ្ហាអ្វីនោះទេ រហូតមកដល់ពេលនេះ។ លោកបន្តថាលោកកំពុងតែបំពេញលិខិត ដើម្បីឆ្លើយតបបំពេញលក្ខខណ្ឌសុំដាក់បញ្ចូលប្រាសាទសំបូរព្រៃគុកនេះជាបេតិកភណ្ឌពិភពលោក។ លោកបានបញ្ជាក់បន្ថែមថា៖ ”ដោយសារតែអាយុនិងប្រវត្តិគាត់គឺជាទីក្រុងចាស់មុនអង្គរ គាត់មានឥទ្ធិពលអាចទាញភ្ញៀវជាតិអន្តរជាតិទៅទស្សនា ហើយដោយសារតែវាមានសារៈសំខាន់អញ្ចឹងហើយបានជារដ្ឋាភិបាលដូចជាក្រសួងសាមី គឺបានរៀបចំហេដ្ឋារចនាសម្ព័ន ចាក់ក្រាលផ្លូវកៅស៊ូចូលទៅទីនោះ”។
ប្រាសាទសំបូរព្រៃគុក ស្ថិតនៅឃុំសំបូរ ស្រុកប្រាសាទសំបូរ ខេត្តកំពង់ធំ ដែលមានចម្ងាយប្រមាណ៣៧គីឡូម៉ែត្រពីទីរួមខេត្តកំពង់ធំ។ ប្រាសាទនេះកសាងឡើងដោយព្រះបាទឥសានវរ្ម័នទី១ នៅពាក់កណ្តាលសតវត្សរ៍ទី៧(គ.ស ៦១៦-៦៣៥) ដើម្បីឧទ្ទិសចំពោះព្រហ្មញ្ញសាសនា(ព្រះហរិហរៈ)។ ប្រាសាទនេះមានរចនាបថសំបូរព្រៃគុក គឺជារចនាបថស្ថាបត្យកម្មដំបូងបំផុត ដែលមានលក្ខណៈជាខ្មែរ។
បើតាមឯកសារប្រវត្តិសាស្រ្ត ក្រុមប្រាសាទសំបូរព្រៃគុកនេះត្រូវបានបោះបង់ចោលតាំងពីឆ្នាំ១៩៧១ហើយត្រូវបានរៀបចំសារជាថ្មីនៅឆ្នាំ១៩៨០៕
សរសេរមកកាន់លោក មាឃ ចាន់ តាមរយៈchanmeak981@gmail.com និងលោក លោក ឆុង ស៊ីណាន តាមរយៈ Chhong.sinan@yahoo.com