ដោយ៖ ស៊ុន ណារិន | ថ្ងៃចន្ទ ទី7 កញ្ញា 2015, 10:20 PM
http://vodhotnews.com
រូបភាពដោយប្រជាពលរដ្ឋអ្នកសារព័ត៌មានវីអូឌី
យ៉ាងតិចមនុស្ស៧នាក់បានរងរបួសនៅក្នុងឧបទ្ទវហេតុឆេះក្លឹបមួយនៅយប់ថ្ងៃចន្ទនេះ នៅក្នុងសង្កាត់ចាក់អង្រែក្រោម ខណ្ឌមានជ័យ។
ហេតុការណ៍នេះបានកើតឡើងនៅម៉ោងជាង៨យប់ នៅក្នុងក្លឹបមួយឈ្មោះឃី តាមបណ្តោយផ្លូវជាតិលេខ២។ អ្នកយកព័ត៌មានរបស់វីអូឌីដែលចុះទៅយកព័ត៌មានបានរាយការណ៍មកថា បើតាមអ្នកឃើញហេតុការណ៍ មនុស្សយ៉ាងតិច៧នាក់ត្រូវបានបញ្ជូនចេញពីក្លឹប ហើយរងរបួសធ្ងន់។ មិនទាន់មានរបាយការណ៍ថាតើអ្នករងរបួសស្លាប់ឬយ៉ាងណានោះទេ។ ប្រភពឲ្យដឹងថាការសន្និដ្ឋានដំបូងនៃអគ្គិភ័យនោះដោយសារឆ្លងចរន្តអគ្គិសនី។
រហូតមកដល់ម៉ោងជាង១០យប់នេះ សមត្ថកិច្ចបានពន្លត់អគ្គិភ័យបានទាំងស្រុងនិងវាយក្លឹប ដើម្បីជួយសង្រ្គោះមនុស្ស។
គួរបញ្ជាក់ថា កាលពីខែមីនា ឆ្នាំ២០១៥ មនុស្ស៥នាក់បានស្លាប់ដោយសារអគ្គិភ័យឆេះក្លឹបកំសាន្តមួយនៅក្រុងបាវិត ខេត្តស្វាយរៀង។ ចំណែកកាលពីថ្ងៃទី១៨ ខែវិច្ឆិកា ឆ្នាំ២០១៤ អគ្គិភ័យមួយបានឆាបឆេះក្លឹបកម្សាន្តមានយីហោហ៊ីបហប នៅក្រុងសៀមរាប ដែលបណ្តាលឲ្យមនុស្ស៦នាក់ស្លាប់ និង២នាក់រងរបួស ៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com